Genesis 15 - Jiñi Tsiji' bʌ Wen T'añ cha'añ Estudio

Dios tsi' su'be Abram tal i yalobil

¹ Che' ujtemix iliyi tsa' tili i t'añ lac Yum ba'añ Abram che' bajche' ti' ñajal, tsi' yʌlʌ: —Abram, mach a cha'len bʌq'uen, joñon a mʌctʌjibon, wen ñuc a chobejtʌbal mi caj a taj.

² Abram tsi' jac'ʌ: —C Yum Dios, ¿Chuqui ye'tel c chu'bʌañ che' c'ʌlʌl wʌle ma'añic woli a wʌq'ueñon calobil, che' cojach añ x'e'tel c cha'añ ti cotot jiñi Eliezer ch'oyol bʌ ti Damasco?

³ Tsi' yʌlʌ ja'el Abram: —Come ma'añic tsa' wʌq'ueyon c p'olbal, jiñi mu' bʌ caj i ch'ʌm c chu'bʌañ jiñʌch juntiquil x'e'tel tsa' bʌ i yila pañimil ti cotot.

⁴ Ti wi'il lac Yum tsi' su'be: —Ma'añic mi caj i ch'ʌm a chu'bʌañ ili wiñic, jiñi mu' bʌ caj i ch'ʌm a chu'bʌañ jiñʌch ch'itoñ bʌ a walobil.

⁵ Jiñi cha'añ lac Yum tsi' pʌyʌ loq'uel Abram ti jumpat, tsi' su'be: —Q'uele wʌle jiñi panchan, tsiqui jiñi ec' tac mi tsa' mejli a tsic. Tsi' cha' alʌ: —Che'ʌch mi' caj ti p'ojlel a p'olbal.

⁶ Abram tsi' ñopo lac Yum, jiñi cha'añ tsa' q'uejli ti toj.

⁷ Lac Yum tsi' su'be: —Joñon Yumʌlon, tsa' bʌ c pʌyʌyet loq'uel ti Ur ba'añ caldeojob cha'añ mi cʌq'ueñet ti a wenta ili lum.

⁸ Abram tsi' jac'ʌ: —C Yum Dios, ¿Bajche' mic ña'tan mi mux caj c ch'ʌm ili lum?

⁹ Lac Yum tsi' su'be: —Ch'ʌmbeñon tilel juncojt xch'oc wacax am bʌ uxp'ejl i ja'bilel, yic'ot juncojt xch'oc chivo am bʌ uxp'ejl i ja'bilel, yic'ot juncojt xtat tʌñʌme' am bʌ uxp'ejl i ja'bilel, yic'ot juncojt xpurwoc, yic'ot juncojt alʌ x'ujcuts.

¹⁰ Abram tsi' laj pʌyʌ tilel jiñi alʌc'ʌl tac, tsi' tsepe ti ojlil ti jujuncojt jiñi majtañʌl tac, cojach jiñi te'lemut tac ma'añic tsi' tsepe ti ojlil.

¹¹ Tsa' wejli ju'bel tilel ca'bʌl mut tac cha'añ mi' c'ux jiñi we'elʌl, pero Abram tsi' ñijca tac majlel.

¹² Che' woli' ti bʌjlel q'uiñ, tsa' ochi i wʌyel Abram yic'ot tsa' caji ti bʌq'uen cha'añ ac'ʌlelix.

¹³ Jiñi cha'añ lac Yum tsi' su'be: —Yom ma' ña'tan cha'añ a p'olbalob mi caj i yajñelob ti lum ba' mach i cha'añobic, mi caj i yochelob ti majtañ e'tel ti' yum, mi caj i yu'biñob wocol jumbajc' ja'b.

¹⁴ Pero joñon ja'el mi caj c mel jiñi tejclum mu' bʌ caj i tic'lañob ti majtañ e'tel; ti wi'il mi caj i loq'uelob yic'ot ca'bʌl i chu'bʌañ.

¹⁵ Ixcu jatet, ti' ñʌch'tʌlel a pusic'al mi caj a majlel ba'añ a ñojte'elob tsa' bʌ chʌmiyob. Mi caj a mujquel che' wen ñoxetix.

¹⁶ Che' ti' chʌnlajmlel a p'olbalob mi caj i cha' sujtelob tilel ilayi, jal mi caj i yajñelob ti yam bʌ lum, ti wi'il mi caj i cha' tilelob ilayi che' i yorajlelix mi cʌq'ueñob i toj i mul amorreojob che' cʌlʌxobix i jontolil.

¹⁷ Che' bʌ tsa' bʌjli q'uiñ, che' ac'ʌlelix, tsi' pʌsʌ i bʌ jump'ejl horno am bʌ i buts'il yic'ot xutunte' woli bʌ ti lejmel, tsa' ñumi ti ojlil ba'añ jiñi majtañʌl t'oxbil bʌ ti ojlil tac.

¹⁸ Ti jimbʌ q'uiñ lac Yum tsi' yʌc'ʌ jump'ejl xuc'ul bʌ t'añ ti' tojlel Abram, tsi' yʌlʌ: —Jiñi a p'olbal mi caj cʌq'ueñob ili lum, c'ʌlʌl ti jiñi ja' am bʌ ti Egipto c'ʌlʌl ti colem ja' i c'aba' Éufrates:

¹⁹ Jiñʌch i lumal ceneojob yic'ot cenezeojob yic'ot cadmoneojob,

²⁰ i lumal heteojob yic'ot ferezeojob yic'ot refaítajob,

²¹ i lumal amorreojob yic'ot cananeojob yic'ot gergeseojob yic'ot jebuseojob.