Genesis 14 - Jiñi Tsiji' bʌ Wen T'añ cha'añ Estudio

Abram tsi' colta Lot

¹ Che' ti' yorajlel Amrafel rey bʌ ti Sinar, Arioc rey bʌ ti Elasar, Quedorlaomer rey bʌ ti Elam yic'ot Tidal rey ti Goim.

² Ili reyob tsi' cha'leyob guerra ti' contra Bera, rey bʌ ti Sodoma, ti' contra Birsa, rey bʌ ti Gomorra, ti' contra Sinab rey bʌ ti Adma, ti' contra Semeber rey bʌ ti Zeboim, yic'ot ti' contra jiñi rey ti Bela, mu' bʌ i pejcʌntel ti Zoar ja'el.

³ Ti pejtelelob tsi' tempayob i bʌ ti joctʌl i c'aba' Sidim, ba'añ jiñi Tsaj bʌ Mar.

⁴ Lajchʌmp'ejl (12) ja'b tsi' yumayob Quedorlaomer, che' ti yuxlujump'ejlel (13) ja'b tsa' caji i contrajiñob.

⁵ Che' ti' chʌnlujump'ejlel (14) ja'b tsa' tili Quedorlaomer yic'ot jiñi uxtiquil reyob tsi' tempayob i bʌ ti guerra. Tsa' mʌjli i cha'añob ti' contra jiñi refaítajob am bʌ ti Astarot Karnaim yic'ot ti' contra zuzitajob am bʌ ti Ham, yic'ot ti' contra emitajob am bʌ ti Save-quiriataim,

⁶ yic'ot ti' contra jiñi horeojob ya' ti wits i c'aba' Seir c'ʌlʌl ti joctʌlel Parán, am bʌ ya' ti ti' i tiquiñal pañimil.

⁷ Ti wi'il tsa' sujtiyob, tsa' c'otiyob ti En-mispat, mu' bʌ i pejcʌntel ti Cades ja'el. Tsi' jisayob majlel i lumal amalecob yic'ot amorreojob chumulo' bʌ ti Hazezon-tamar.

⁸ Che' jiñi tsa' loq'uiyob tilel i rey Sodoma yic'ot i rey Gomorra yic'ot i rey Adma yic'ot i rey Zeboim yic'ot i rey Bela, jiñʌch Zoar; ya' ti joctʌl i c'aba' Sidim tsa' cajiyob ti guerra

⁹ ti' contra Quedorlaomer rey bʌ ti Elam yic'ot ti' contra Tidal rey bʌ ti Goim, yic'ot ti' contra Amrafel rey bʌ ti Sinar, yic'ot ti' contra Arioc rey bʌ ti Elasar; añ chʌntiquil reyob ti' contra jo'tiquil reyob.

¹⁰ Jiñi joctʌl i c'aba' Sidim but'ul ti' pozojlel tac asfalto, che' bʌ tsa' puts'iyob i rey Sodoma yic'ot i rey Gomorra, tsa' yajliyob lamital i wiñicob ya' ti' jiñi pozo tac; yaño' bʌ tsa' puts'iyob majlel ti wits.

¹¹ Jiñi xcontrajob tsa' ochiyob ti Sodoma yic'ot ti Gomorra cha'añ mi' ch'ʌmbeñob pejtelel i chu'bʌañ yic'ot pejtelel i bʌlob i ñʌc', che' jiñi tsa' majliyob.

¹² Tsi' pʌyʌyob majlel Lot ja'el, i yalobil i yeran Abram, jiñi chumul bʌ ti Sodoma, tsi' laj chilbeyob i chu'bʌañ, tsa' majliyob.

¹³ Juntiquil tsa' bʌ puts'i, tsa' majli i su'ben Abram chuqui tsa' ujti; Abram mi' pejcʌntel ti hebreo, ya'ʌch chumul ti alʌ te'el ya' ti' lum Mamre, mu' bʌ i pejcʌntel ti amorreo, i yijts'iñʌch Escol yic'ot Aner, ti yuxticlel tsi' coltayob Abram.

¹⁴ Che' bʌ tsi' yu'bi Abram chucbil majlel i yalobil i yʌscun, tsi' pʌyʌ majlel jo'lujunc'al yic'ot waxʌclujuntiquilob (318) i wiñicob chajpʌbilo' bʌ i cha'añ, tsa' bʌ i yilayob pañimil ti yotot, tsi' yajñesayob majlel i contrajob c'ʌlʌl ti Dan.

¹⁵ Tsa' ochi ac'ʌlel, temel yic'ot i wiñicob tsa' caji i cha'leñob guerra che' ti ac'ʌlel, tsi' yajñesayob majlel c'ʌlʌl ti Hoba, am bʌ ti norte ti Damasco.

¹⁶ Abram tsi' cha' laj chilbeyob pejtelel tsa' bʌ i xujch'iyob majlel yic'ot tsi' cha' pʌyʌ tilel ja'el Lot i yalobil i yeran, yic'ot i chu'bʌañ, yic'ot x'ixicob yic'ot yaño' bʌ wiñicob.

Melquisedec tsi' yʌq'ue i yutslel i t'añ Abram

¹⁷ Che' ba' ora woli i cha' sujtel Abram che' bʌ tsi' mʌlbe Quedorlaomer yic'ot jiñi yaño' bʌ reyob tsa' bʌ i pi'leyob ti guerra; tsa' tili i rey Sodoma cha'añ mi' taj Abram ya' ti joctʌl i c'aba' Save, i joctʌl Rey.

¹⁸ Che' jiñi Melquisedec, rey bʌ ti Salem yic'ot i motomajʌch jiñi C'ax Ñuc Bʌ Dios tsi' yʌq'ue Abram waj yic'ot vino.

¹⁹ Melquisedec tsi' yʌq'ue i yutslel i t'añ Abram, tsi' yʌlʌ: “La' aq'uentic Abram i yutslel i t'añ jiñi C'ax Ñuc Bʌ Dios, tsa' bʌ i mele panchan yic'ot pañimil.

²⁰ La' sujbic i ñuclel jiñi C'ax Ñuc Bʌ Dios, tsa' bʌ i yʌq'ueyet a t'uchtan a contrajob.” Abram tsi' yʌq'ue Melquisedec i diezmojlel pejtelel i chu'bʌañ.

²¹ Jiñi cha'añ i rey Sodoma tsi' su'be Abram: —Aq'ueñon jiñi wiñicob x'ixicob, ixcu jiñi chu'bʌañʌl ch'ʌmʌ jatet.

²² Abram tsi' jac'be i rey Sodoma: —Tsa' cʌc'ʌ c t'añ ti' tojlel c Yum, jiñi C'ax Ñuc Bʌ Dios, jiñi tsa' bʌ i mele panchan yic'ot pañimil,

²³ ma'añic chuqui mi caj c ch'ʌm ti a c'ʌb, mi junt'ujmic puy, mi i ch'ajñalic xʌñʌb, mi yan tac bʌ a chu'bʌañ, cha'añ ma'añic mi caj a wʌl: “Wen chumul Abram, come tsa' cʌq'ue i chu'bʌañ;”

²⁴ cojach mic ch'ʌm lojon chuqui tsi' c'uxuyob jiñi c wiñicob. Pero jiñi wiñicob tsa' bʌ majliyob quic'ot, Aner, Escol yic'ot Mamre, yomʌch mi' ch'ʌmob, che' tsi' yʌlʌ Abram.