Genesis 13 - Jiñi Tsiji' bʌ Wen T'añ cha'añ Estudio

Lot tsi' tʌts'ʌ i bʌ ba'añ Abram

¹ Abram tsa' loq'ui ti Egipto, tsa' tili ti jiñi lum am bʌ ti Neguev, yic'ot i yijñam, yic'ot pejtelel i chu'bʌañ, yic'ot Lot.

² Abram wen ca'bʌl i chu'bʌañ, añ i yʌlac' yic'ot añ i cha'añ plata yic'ot oro.

³ Tsa' ñumi tac majlel ti jiñi lum am bʌ ti Neguev c'ʌlʌl ti Bet-el, c'ʌlʌl jinto tsa' c'oti ya' ba' tsi' ñaxan wa'choco pisil bʌ i yotot, xinlʌpʌl bʌ ti' yojlil Bet-el yic'ot Hai,

⁴ ya' ba' tsi' melbe i pulʌntib i majtañ Dios; ya'i tsi' ch'ujutesa i c'aba' lac Yum.

⁵ Che' ja'el Lot tsa' bʌ majli yic'ot Abram, añ i cha'añ tʌñʌme', wacax yic'ot pisil tac bʌ i yotot.

⁶ Mach jasʌlic jumpejt lum cha'añ temel mi' yajñelob jiñi cha'tiquil, come ca'bʌl i yʌlac'ob, jiñi cha'añ mach chʌn mejlobix ti tem chumtʌl.

⁷ Jiñi xcʌnta wacax i cha'añ Abram yic'ot xcʌnta wacax i cha'añ Lot tsa' cajiyob ti leto. (Ti jim bʌ ora ya' to chumulob jiñi cananeojob yic'ot ferezeojob ti jiñi lum.)

⁸ Jiñi cha'añ Abram tsi' su'be Lot: “Mach yomic mi lac cha'len leto, mi jiñic jax xcʌnta tʌñʌme' lac cha'añ yom mi' cha'leñob leto, come la queran lac bʌ.

⁹ ¿Mach ba jocholic pejtelel ili lum ti' tojel a wut? Awocolic yom ma' tʌts' a bʌ ba'añon. Mi a wom majlel ti' tojel jiñi am bʌ ti lac ts'ej, joñon mux c majlel ti lac ñoj; o mi a wom majlel ti' tojel am bʌ ti lac ñoj, joñon mux c majlel ti lac ts'ej.”

¹⁰ Lot tsi' joy q'uele jiñi lum, tsi' q'uele jiñi joctʌl am bʌ ti Jordán ja', wen uts'atax c'ʌlʌl ti Zoar, come mi' bajñel ach'esan i bʌ yilal jiñi lum, che'ʌch yilal bajche' i pʌc'ʌb lac Yum am bʌ ti Edén, yic'ot che' bajche' jiñi lum am bʌ ti Egipto, che'ʌch añ che' maxto añic tsi' jisa lac Yum Sodoma yic'ot Gomorra.

¹¹ Jiñi cha'añ Lot tsi' yajca pejtelel jiñi lum ti Jordán; che' jiñi tsa' majli ti' tojel i pasibal q'uiñ. Che'ʌch tsi' cʌyʌyob i bʌ jiñi cha'tiquil.

¹² Abram tsa' chumle ti' lumal Canaán; jiñi Lot tsa' chumle ti tejclum tac am bʌ ti joctʌl, c'ʌlʌl tsa' c'oti ti chumtʌl ti' lumal Sodoma.

¹³ Pero jiñi wiñicob x'ixicob año' bʌ ti Sodoma wen jontolob jax, tsi' cha'leyob ñuc tac bʌ mulil ti' contra lac Yum.

¹⁴ Che' bʌ tsa'ix i tʌts'ʌ i bʌ Lot ba'añ Abram, lac Yum tsi' su'be Abram: “Joy q'uele pañimil, q'uele ti norte yic'ot ti sur yic'ot ba' mi' pasel q'uiñ yic'ot ba' mi' bʌjlel q'uiñ.

¹⁵ Pejtelel jiñi lum woli bʌ a q'uel mi caj cʌq'ueñet yic'ot mi caj cʌq'ueñob a p'olbal ti pejtelel ora.

¹⁶ Mi caj c p'ojlesan a p'olbal che' bajche' i ts'u'bejñal lum. Mi añ majqui mi' mejlel i tsic i ts'u'bejñal lum, mi caj i mejlel i tsic a p'olbal ja'el.

¹⁷ Ch'ojyen, cucu xʌñʌ ñumel ti' joytʌlel jiñi lum, come mi caj cʌq'ueñet.”

¹⁸ Jiñi cha'añ Abram tsi' ch'ʌmʌ majlel pisil bʌ i yotot, tsa' majli ti chumtʌl ya' ba'añ alʌ te'el, ti' lum Mamre am bʌ ti Hebrón, ya'i tsi' melbe i pulʌntib i majtañ lac Yum.