Genesis 12 - Jiñi Tsiji' bʌ Wen T'añ cha'añ Estudio

2. CHE' BAJCHE' TSA' AJÑIYOB ABRAHAM, ISAAC, JACOB YIC'OT JOSE ( 12.1—50.26 ) Dios tsi' pʌyʌ Abram

¹ Lac Yum tsi' su'be Abram: Loq'uen ti a lumal ba'añ a pi'ʌlob yic'ot ti' yotot a tat, cucu ya' ti jiñi lum mu' bʌ caj c pʌsbeñet.

² Mi caj cʌq'ueñet ca'bʌl a p'olbal, mi caj cʌq'ueñet a wenlel, mi caj cʌc' ti cʌjñel a c'aba', yic'ot mi caj i tajob i wenlel wiñicob x'ixicob ti pejtelel pañimil cha'añet.

³ Mi caj cʌq'uen i wenlel jiñi mu' bʌ i yʌq'ueñet i yutslel i t'añ yic'ot jiñi mu' bʌ i ts'a'leñet, mi caj c ts'a'len; cha'añet mi caj i tajob i wenlel wiñicob x'ixicob ti jujunmojt ti pañimil.

⁴ Tsa' majli Abram che' bajche' lac Yum tsi' su'be, tsa' majli yic'ot Lot. Añix jo'lujump'ejl i chʌnc'al (75) i ja'bilel Abram che' bʌ tsa' loq'ui ti Harán.

⁵ Abram tsi' pʌyʌ majlel Sarai i yijñam yic'ot Lot, i yalobil i yʌscun yic'ot pejtelel i chu'bʌañ tsa' bʌ i tajayob yic'ot pejtelel wiñicob x'ixicob tsa' bʌ i tajayob ya' ti Harán, tsa' loq'uiyob cha'añ mi' majlelob ti' lum Canaán. Tsa' c'otiyob ti Canaán,

⁶ Abram tsa' ñumi ti jiñi lum c'ʌlʌl tsa' c'oti ti Siquem ya' ba'añ colem te' am bʌ ti More. Ti jim bʌ ora ya' chumulob i yalobilob Canaán.

⁷ Tsi' pʌsʌ i bʌ lac Yum ti' wut Abram, tsi' su'be: “Mi caj cʌq'uen a p'olbal ili lum.” Abram tsi' wa'chocobe i pulʌntib i majtañ lac Yum, ba' tsi' pʌsʌ i bʌ ti' wut Abram.

⁸ Tsa' loq'ui ya'i, tsa' majli ti wits am bʌ ti' tojel Bet-el ya' ti' pasibal q'uiñ, tsi' wa'choco pisil bʌ i yotot ti ojlil i bijlel Bet-el ya' ti' bʌjlibal q'uiñ yic'ot Hai ya' ti' pasibal q'uiñ; ya'i tsi' wa'chocobe i pulʌntib i majtañ lac Yum, tsi' ch'ujutesa i c'aba' lac Yum.

⁹ Ti wi'il Abram tsa' loq'ui ya'i, tsa' caji ti c'unte' majlel c'ʌlʌl ti jiñi lum i c'aba' Neguev.

Abram ya' ti Egipto

¹⁰ Ti jimbʌ ora tsa' tili wi'ñal ti jiñi lum; jiñi cha'añ Abram tsa' ju'bi majlel ti Egipto cha'añ mi' chumtʌl ya'i, come wen ca'bʌl wi'ñal ti jiñi lum.

¹¹ Che' lʌc'ʌlix yom c'otel ti Egipto, tsi' su'be Sarai i yijñam: “Cujil wen a t'ojol jax.

¹² Che' mi' q'ueletob jiñi año' bʌ ti Egipto, mi caj i yʌlob: Jiñʌch i yijñam. Che' jiñi mi caj i tsʌnsañoñob, ixcu jatet cuxul mi caj a wajñel.

¹³ Jiñi cha'añ su'beñob cha'añ jatet querañet, cha'añ uts'at mi cajñel a wic'ot; che' jiñi cuxul mi caj cajñel cha'añ a coltaya.”

¹⁴ Che' ba' ora tsa' ochi Abram ti Egipto, jiñi egiptojob tsi' q'ueleyob wen i t'ojol jax jiñi x'ixic.

¹⁵ Che' ja'el i wiñicob faraón tsi' q'ueleyob jiñi x'ixic, tsi' su'beyob faraón cha'añ wen i t'ojol jax; jiñi cha'añ tsa' pʌjyi majlel jiñi x'ixic ti' yotot faraón.

¹⁶ Faraón tsi' yʌq'ue i majtañ Abram cha'añ ti' caj jiñi x'ixic, tsi' yʌq'ue tʌñʌme', wacax, xtat burro, yic'ot i mozojob, yic'ot i criadajob, yic'ot xña'a burro tac, yic'ot camello tac.

¹⁷ Pero lac Yum tsi' yʌq'ue wocol faraón yic'ot ca'bʌl c'am-ʌjel ti' tojlel jiñi año' bʌ ti' yotot cha'añ ti' caj Sarai, i yijñam Abram.

¹⁸ Jiñi cha'añ faraón tsi' pʌyʌ tilel Abram, tsi' su'be: “¿Chucoch tsa' melbeyon che' bajche' iliyi? ¿Chucoch ma'añic tsa' su'beyon mi a wijñam jiñi x'ixic?

¹⁹ ¿Chucoch tsa' wʌlʌ cha'añ jiñʌch a wijts'in; che' colelix c pʌy cha'añ quijñam? Jiñi cha'añ wʌle, wʌ'an a wijñam, pʌyʌ majlel, cucux a wic'ot.”

²⁰ Faraón tsi' yʌq'ue mandar i wiñicob cha'añ mi' coltañob majlel Abram yic'ot i yijñam yic'ot pejtelel i chu'bʌañ.