Genesis 11 - Jiñi Tsiji' bʌ Wen T'añ cha'añ Estudio

Jiñi chañ bʌ ts'ajc ti Babel

¹ Ti jiñi bʌ ora junchajp jach i t'añ wiñicob x'ixicob ti pejtelel pañimil, ma'añic yam bʌ t'añ tsa' bʌ i cha'leyob.

² Che' bʌ tsa' loq'uiyob majlel wiñicob x'ixicob ba' mi' pasel q'uiñ, tsi' tajayob jumpejt joctʌl bʌ lum i c'aba' Sinar, ya'i tsa' chumleyob.

³ Ti jump'ejl bʌ q'uiñ tsa' caji i yʌlob: “La' lac mel ladrillo, mi lac pul ti c'ajc cha'añ mi lac c'ʌn.” Jiñi ladrillo tsi' c'ʌñʌyob i wentajlel xajlel, jiñi asfalto tsi' c'ʌñʌyob i wentajlel mezcla.

⁴ Ti wi'il tsi' yʌlʌyob: “La' lac mel tejclum yic'ot chañ bʌ q'ueloñib mu' bʌ c'ʌlʌl c'otel ti panchan; la' lac ñuq'uesan laj c'aba' ame pujquiconla ti pejtelel pañimil.”

⁵ Lac Yum tsa' ju'bi tilel i q'uel jiñi tejclum yic'ot jiñi chañ bʌ ts'ajc woli bʌ i melob wiñicob x'ixicob.

⁶ Lac Yum tsi' yʌlʌ: “Junmojt jach añ wiñicob x'ixicob yic'ot junchajp jach i t'añob ti pejtelel; tsa'ix i teche i cha'leñob e'tel ma'añic chuqui mi caj i mʌctañob cha'añ mi' melob pejtelel chuqui tsi' ña'tañob.

⁷ Jiñi cha'añ conla ti ju'bel cha'añ mi lac socbeñob i t'añ cha'añ ma'añic mi' ch'ʌmbeñob isujm che' mi' pejcañob i pi'ʌlob.”

⁸ Che'ʌch tsi' pam pucuyob lac Yum ti pejtelel pañimil, che' jiñi tsi' cʌyʌ i melob jiñi tejclum.

⁹ Jiñi cha'añ tsa' otsʌbenti i c'aba' jiñi tejclum Babel, come ya'i lac Yum tsi' socbeyob i t'añ pejtelel año' bʌ ti pañimil, yic'ot tsi' pam pucuyob ti pejtelel pañimil.

I p'olbalob Sem

¹⁰ Jiñʌch i p'olbal Sem: Che' añix jo'c'al i ja'bilel Sem, tsi' yila pañimil Arfaxad i yalobil, che' cha'p'ejlix ja'b i ñumel but'ja'.

¹¹ Che' bʌ tsi' yila pañimil Arfaxad, tsa' to jal-a Sem jo'c'al i cha'bajc' (500) ja'b; tsi' yila pañimil ch'itoñ bʌ yic'ot xch'oc bʌ i yalobilob.

¹² Che' añix jo'lujump'ejl i cha'c'al (35) i ja'bilel Arfaxad, tsi' yila pañimil Sala i yalobil.

¹³ Che' bʌ tsi' yila pañimil Sala, tsa' to jal-a Arfaxad jumbajc' yic'ot uxp'ejl (403) ja'b; tsi' yila pañimil ch'itoñ bʌ yic'ot xch'oc bʌ i yalobilob.

¹⁴ Che' lujump'ejlix i cha'c'al (30) i ja'bilel Sala, tsi' yila pañimil Heber i yalobil.

¹⁵ Che' bʌ tsi' yila pañimil Heber, tsa' to jal-a Sala jumbajc' yic'ot uxp'ejl (403) ja'b; tsi' yila pañimil ch'itoñ bʌ yic'ot xch'oc bʌ i yalobilob.

¹⁶ Che' chʌnlujump'ejlix i cha'c'al (34) i ja'bilel Heber tsi' yila pañimil Peleg i yalobil.

¹⁷ Che' bʌ tsi' yila pañimil Peleg tsa' to jal-a Heber jumbajc' yic'ot lujump'ejl i cha'c'al (430) ja'b; tsi' yila pañimil ch'itoñ bʌ yic'ot xch'oc bʌ i yalobilob.

¹⁸ Che' lujump'ejlix i cha'c'al (30) i ja'bilel Peleg tsi' yila pañimil Reu i yalobil.

¹⁹ Che' bʌ tsi' yila pañimil Reu tsa' to jal-a Peleg lujunc'al yic'ot bolomp'ejl (209) ja'b; tsi' yila pañimil ch'itoñ bʌ yic'ot xch'oc bʌ i yalobilob.

²⁰ Che' lajchʌmp'ejlix i cha'c'al (32) i ja'bilel Reu tsi' yila pañimil Serug i yalobil.

²¹ Che' bʌ tsi' yila pañimil Serug tsa' to jal-a Reu lujunc'al yic'ot wucp'ejl (207) ja'b; tsi' yila pañimil ch'itoñ bʌ yic'ot xch'oc bʌ i yalobilob.

²² Che' lujump'ejlix i cha'c'al (30) i ja'bilel Serug tsi' yila pañimil Nacor i yalobil.

²³ Che' bʌ tsi' yila pañimil Nacor tsa' to jal-a Serug lujunc'al (200) ja'b; tsi' yila pañimil ch'itoñ bʌ yic'ot xch'oc bʌ i yalobilob.

²⁴ Che' bolomp'ejlix i cha'c'al (29) i ja'bilel Nacor tsi' yila pañimil Taré i yalobil.

²⁵ Che' bʌ tsi' yila pañimil Taré tsa' to jal-a Nacor jo'c'al yic'ot lujump'ejl yic'ot bolomp'ejl i wʌcc'al (119) ja'b; tsi' yila pañimil ch'itoñ bʌ yic'ot xch'oc bʌ i yalobilob.

²⁶ Che' lujump'ejlix i chʌnc'al (70) i ja'bilel Taré, tsi' yila pañimil Abram, Nacor yic'ot Harán.

I p'olbalob Taré

²⁷ Jiñʌch i p'olbal Taré: Taré i tatʌch Abram, Nacor yic'ot Harán; jiñi Harán i tatʌch Lot.

²⁸ Ñaxan tsa' chʌmi Harán wi'ilix i tat; tsa' chʌmi ya' ti Ur i lumal caldeojob ya' ba' tsi' yila pañimil

²⁹ Abram yic'ot Nacor tsi' pʌyʌyob i yijñam; i c'aba' i yijñam Abram jiñʌch Sarai; i c'aba' i yijñam Nacor jiñʌch Milca, xch'oc bʌ i yalobil Harán; Harán jiñʌch i tat Milca yic'ot Isca.

³⁰ Pero Sarai to'ol wa'al jach bʌ x'ixic, ma'añic i yalobil.

³¹ Taré tsi' pʌyʌ majlel Abram i yalobil yic'ot Lot jiñi i buts i yalobil bʌ Harán, yic'ot Sarai i yʌ'lib, i yijñam bʌ Abram. Temel tsa' loq'uiyob ti Ur i cha'añ caldeojob cha'añ mi' majlelob ti' lumal Canaán, pero che' bʌ tsa' c'otiyob ti Harán, ya' tsa' cʌleyob ti chumtʌl.

³² Che' añix lujunc'al yic'ot jo'p'ejl (205) i ja'bilel Taré ti pejtelel, tsa' chʌmi ya' ti Harán.