Filipenses 4 - Jiñi Tsiji' bʌ Wen T'añ cha'añ Estudio

3. TIJICÑɅYEL YIC'OT I SU'BENTEL WOCOLIX I YɅLɅ ( 4.1-20 ) Chʌn tijicñesan la' bʌ ti lac Yum

¹ C'uxbibil bʌ quermañujob, c pi'ʌlob com j q'ueletla, wen tijicñayon yic'ot mic taj c ñuclel ti jatetla, jiñi cha'añ ajñenla ti xuc'ul ti lac Yum, c'uxbibilet bʌ la.

² Ti wocol t'añ mic su'beñet Evodia yic'ot Síntique, yom jump'ejl la' pusic'al ti lac Yum.

³ Che' ja'el ti wocol t'añ mic su'beñetla, mero c pi'ʌlet bʌ la ti e'tel, coltañla jiñi x'ixicob tsa' bʌ i cha'leyob e'tel quic'ot ti jiñi wen t'añ, yic'ot ja'el Clemente, yic'ot yaño' bʌ c pi'ʌlob ti e'tel chucbilo' bʌ i c'aba' ti' juñ Dios yic'ot pejtelel año' bʌ i cuxtʌlel.

⁴ Tijicñesan la' pusic'al ti lac Yum ti pejtelel ora. Mic cha' su'beñetla: Tijicñesan la' pusic'al.

⁵ Pʌsbeñob i yutslel la' pusic'al pejtelel wiñicob x'ixicob. Lʌc'ʌlix añ lac Yum.

⁶ Mach mi la' cha'len tsic pusic'al, pero ti pejtelel chuqui tac mi' yujtel su'benla Dios chuqui tac yom ti oración, chʌn c'ajtibenla, su'benla wocolix i yʌlʌ.

⁷ Che' jiñi, i ñʌch'tʌlel la' pusic'al ch'oyol bʌ ti Dios mi caj i cʌntan la' pusic'al yic'ot la' ña'tʌbal ti Cristo Jesús, ma'añic i p'isol i ñʌch'tʌlel lac pusic'al mu' bʌ i yʌq'ueñonla.

Ña'tanla iliyi

⁸ Che' ja'el, hermañujob, yom mi la' ña'tan chuqui tac isujm, chuqui tac toj, chuqui tac uts'at, chuqui tac sʌc, chuqui tac i t'ojol, chuqui tac wen; mi añ chuqui c'ax wen, mi añ chuqui yom sujbel ti ñuc, ña'tanla.

⁹ Melela ti pejtelel che' bajche' cʌntesʌbiletla, che' bajche' tsa' la' ñopo, che' bajche' tsa' la' wu'bi ti joñon, che' bajche' tsa' la' q'uele ti joñon, che' jiñi mux i yajñel Dios la' wic'ot, jiñʌch mu' bʌ i yʌq'ueñonla i ñʌch'tʌlel lac pusic'al.

Uts'at bʌ i melbal jiñi año' bʌ ti Filipos

¹⁰ C'ax tijicña c pusic'al ti lac Yum wʌle come tsa' cha' caji la' coltañon; añix ora la' wom, pero ma'añic tsa' mejli la' taj bajche' mi la' coltañon.

¹¹ Ma'añic woli cʌl mi añ to chuqui yom c cha'añ, come cujil ajñel ti tijicña bajche' jach añon.

¹² Cujil i ñusʌntel wocol che' ma'añic c chu'bʌañ, che' ja'el cujil chumtʌl che' añ c chu'bʌañ; cʌntesʌbilon ti pejtelel chuqui jach mi' yujtel, che' ñajon, che' wi'ñayon, che' ca'bʌl c chu'bʌañ, o che' ma'añic c chu'bʌañ.

¹³ Ti Cristo mu' bʌ i p'ʌt-esañon mi mejlel c mel pejtelel chuqui com.

¹⁴ Wen uts'at tsa' la' mele che' bʌ tsa' la' coltayon tic wocol.

¹⁵ La' wujil jatetla añet bʌ la ti Filipos, che' bʌ tsa' caji ti sujbel jiñi wen t'añ, che' bʌ tsa' majliyon ti Macedonia, ma'añic yam bʌ xñopt'añob tsa' bʌ i coltayoñob, cojach jatetla.

¹⁶ Che' ya'añon ti Tesalónica ja'el cha'yajl tsa' la' chocbeyon tilel chuqui añ to yom c cha'añ.

¹⁷ Ma'añic woli j c'ajtin c majtañ, pero com mi' p'ojlel wen bʌ la' melbal cha'añ ñumen ca'bʌl mi la' taj la' chobejtʌbal.

¹⁸ Tsa'ix la' wʌq'ueyon pejtelel chuqui yom, añ i ñumel; jasʌlix, Epafrodito tsi' ch'ʌmbeyon tilel ti pejtelel; la' wofrenda, xojocña i yujts'il yilal, lajal bajche' pulbil bʌ i majtañ Dios mu' bʌ i mulan, uts'at bʌ mi' q'uel.

¹⁹ Lac Yum Dios mi caj i yʌq'ueñetla pejtelel chuqui añ to yom la' cha'añ che' bajche' c'amel añ i cha'añ Cristo Jesús ya' ti panchan.

²⁰ La' sujbic i ñuclel Dios lac Tat ti pejtelel ora. Amén.

I YUJTIBAL: COJIX BɅ I YUTSLEL I T'AÑ ( 4.21-23 )

²¹ Aq'uenla saludo pejtelel i cha'año' bʌ Dios ti Cristo Jesús. Pejtelel la quermañujob año' bʌ quic'ot mi' yʌq'ueñetla saludo ja'el.

²² Pejtelel i cha'año' bʌ Dios mi' yʌq'ueñetla saludo, cojco jiñi año' bʌ ti' yotot César.

²³ La' ajñic ti la' pusic'al i yutslel i pusic'al lac Yum Jesucristo ti la' pejtelel. Amén.