Filipenses 3 - Jiñi Tsiji' bʌ Wen T'añ cha'añ Estudio

Com c'otel ba' jaxʌl c bijlel

¹ Jiñi cha'añ hermañujob, tijicñesan la' pusic'al ti lac Yum. Cha'añon, ma'añic mic lujb-an c cha' ts'ijbubeñetla jiñi jach bʌ t'añ, che'ʌch yom cha'añ mi la' wen jac'.

² Tsajiletla come añ wiñicob lajalo' bʌ bajche' ts'i', chʌcʌ q'uele la' bʌ ti' tojlel jiñi jontol bʌ x'e'telob, tsajiletla ti' tojlel jiñi woli bʌ i su'bob wersa mi' tsejpel lac pʌchʌlel cha'añ mi laj coltʌntel.

³ Tsepbil lac pʌchʌlel ti isujm, joñonla mu' bʌ lac ch'ujutesan Dios ti Espíritu, mi' ñuc añ lac pusic'al ti Cristo Jesús, la cujil mach mejlic lac bajñel coltañ lac bʌ,

⁴ mi añ majqui tsi' lon ña'ta i bajñel coltañ i bʌ, che' ja'el joñon. Mi añ majqui mi mejlel i pʌs i bʌ ti ñuc ti' tojlel Dios, ñumen to joñon,

⁵ come tsa' c ch'ʌmʌ tsep pʌchʌlel che' waxʌcp'ejl jaxto j q'uiñilel, loq'uemon ti' p'olbal israelob, ti' p'olbal Benjamín, hebreojon come puro hebreojob c ñojte'el, fariseojon cha'añ ti' jac'ol mandar.

⁶ Ti isujm ca'bʌl tsa' c tic'la jiñi xñopt'añob; ma'añic c mul ti' tojlel jiñi mandar.

⁷ Pero lolom jach pejtel c bajñel ñuclel, tsa' c ña'ta la'ix sajtic pejtelel jiñi cha'añ mij c'uxbintel ti Cristo.

⁸ Isujm, ma'añic i c'ʌjñibal jiñi tsa' bʌ c ñaxan q'uele ti ñuc come ñumen ñuc i cʌñol Cristo Jesús, c Yum, cha'añ i c'uxbintel Cristo wʌle woli j q'uel che' bajche' misujelʌl pejtelel tsa' bʌ j q'uele ti ñuc ti yam bʌ ora cha'añ mic taj c wenlel ti Cristo,

⁹ cha'añ mi cajñel ti' tojlel. Mach cha'añic ti' jac'ol mandar wolic taj, pero cha'añ wolic ñop Cristo, come Dios mi' yʌq'ueñonla toj bʌ lac pusic'al che' mi lac ñop.

¹⁰ Com jach j cʌn Cristo, yic'ot i p'ʌtʌlel Dios tsa' bʌ i teche ch'ojyel, com cu'bin i wocol jinto mic chʌmel lajal bajche' tsa' chʌmi,

¹¹ jiñi cha'añ mic pijtan cha'añ mic cha' ch'ojyel ja'el ti' tojlel chʌmeño' bʌ.

¹² Maxto añic tsa' c taja ti' pejtelel jiñi, maxto ts'ʌctiyemic c wenlel; pero wolic cha'len wersa cha'añ ts'ʌcʌl mic taj chuqui yom i yʌq'ueñon Cristo Jesús tsa' bʌ i tajayon.

¹³ Hermañujob, ma'añic wolic ña'tan mi ts'ʌcʌlix tsa' c taja; pero junsujm jach wolic ña'tan: Wolic ñajʌtesan jiñi am bʌ tic pat, wolic cha'len wersa cha'añ mic taj jiñi am bʌ ti' tojel c wut,

¹⁴ wolic cha'len wersa cha'añ mij c'otel ya' ba' jaxʌl c bijlel, cha'añ mic taj jiñi c'ax uts'at bʌ ti' tojlel Dios jiñi tsa' bʌ i pʌyʌyon ti Cristo Jesús.

¹⁵ Jiñi cha'añ, ti pejtelelonla tsa'ix bʌ lac taja laj colel, che'ʌch yom mi lac ña'tan ti lac pusic'al; mi tilel bixel jach la' pusic'al, Dios mi caj i pʌsbeñetla.

¹⁶ Mi añ chuqui tsa' lac taja ti Cristo, la' lac chʌn tsajcan ti jump'ejl lac pusic'al che' bajche' cʌntesʌbilonla, [yom junlajal lac ña'tʌbal.]

¹⁷ Hermañujob, melela che' bajche' wolic mel, wen q'uelela jiñi mu' bʌ i melob che' bajche' joñon lojon.

¹⁸ Come woli' yujtel che' bajche' tsa' c wʌn su'beyetla, ca'bʌlob ti la' tojlel woli' contrajiñob i cruz Cristo, wolic cha' su'beñetla yic'ot i ya'lel c wut;

¹⁹ mi caj i jisʌntelob come woli' diosiñob chuqui yom i bʌc'tal, mi' lon q'uelob i bʌ ti ñuc cha'añ i melbalob anquese quisintic; mi' yʌc'ob ti' pusic'al chuqui jach añ ti pañimil.

²⁰ Pero joñonla añ lac lumal ya' ti panchan ba' mi caj lac taj la caj Coltaya, lac Yum Jesucristo woli bʌ lac pijtan;

²¹ jiñi mi caj i q'uextʌbeñonla lac bʌc'tal am bʌ i tsuculel cha'añ lajal mi' yajñel che' bajche' i bʌc'tal am bʌ i ñuclel, come añ i p'ʌtʌlel cha'añ mi' ch'ʌm ti' wenta pejtelel chuqui tac añ.