Exodo 9 - Jiñi Tsiji' bʌ Wen T'añ cha'añ Estudio

I tic'lʌntelob i wacax

¹ Jiñi cha'añ lac Yum tsi' su'be Moisés: —Cucu ba'añ faraón, su'ben ili t'añ: “Jiñi c Yum lojon, i Dios hebreojob woli' yʌl: Ac'ʌ a t'añ cha'añ mi' majlelob c cha'año' bʌ cha'añ mi' ch'ujutesañoñob,

² come mi ma'añic ma' wʌc' a t'añ cha'añ mi' majlelob, mi mux a chʌn mʌctañob,

³ jiñi i p'ʌtʌlel i c'ʌb lac Yum mi caj i c'otel, mi caj i tilel leco bʌ i c'am-ʌjel jiñi alʌc'ʌl tac am bʌ ti jamil che' bajche' caballo, burro, camello, wacax yic'ot tʌñʌme'.

⁴ Pero lac Yum ma'añic mi caj i yʌq'ueñ i c'am-ʌjel i yʌlac'ob israelob; ma'añic mi caj i chʌmel mi juncojtic i yʌlac'ob jiñi israelob.”

⁵ Lac Yum tsi' su'be baqui ora mi caj i yujtel, tsi' yʌlʌ: —Ijc'ʌl mi caj c mel ili wocol, ti ili lum.

⁶ Che' ti yijc'ʌlal lac Yum tsi' yʌc'ʌ jiñi wocol, tsa' chʌmi pejtelel i wacax egiptojob; pero ma'añic tsa' chʌmi mi juncojtic i wacax jiñi israelob.

⁷ Jiñi faraón tsi' choco ti q'uelol i wacax israelob, che' jiñi tsa' tsictiyi cha'añ ma'añic tsa' chʌmi mi juncojtic i wacax israelob. Pero tsa' chʌn tsʌts-a i pusic'al faraón, ma'añic tsi' choco majlel jiñi israelob.

I tic'lʌntelob ti tsoy tac

⁸ Jiñi cha'añ lac Yum tsi' su'be Moisés yic'ot Aarón: —Ch'ʌmʌla cha'jojp tañ am bʌ ti horno; jiñi Moisés mi caj i wejtun letsel ti chañ che' ya'añ faraón,

⁹ mi caj i sujtel ti ts'u'bejn ti pejtelel i lumal Egipto, mi caj i yʌc' ti pasel tsoy ti' cuctal wiñicob x'ixicob yic'ot ti alʌc'ʌl tac ti pejtelel i lumal Egipto.

¹⁰ Moisés yic'ot Aarón tsi' ch'ʌmʌyob tañ am bʌ ti horno, tsa' wa'leyob ti' tojel faraón; tsi' wejtu letsel Moisés ti chañ, che' jiñi tsa' pasi tsoy tac ti' cuctal wiñicob x'ixicob yic'ot ti alʌc'ʌl tac.

¹¹ Mi jiñic xwujtob tsa' mejli ti wa'tʌlob ti' tojel Moisés cha'añ jiñi tsoy, come jiñi xwujtob ca'bʌlob i tsoy yic'ot pejtelel egiptojob.

¹² Pero lac Yum tsi' tsʌts-esʌbe i pusic'al faraón, jiñi cha'añ ma'añic tsi' jac'ʌ jiñi t'añ, che' bajche' lac Yum tsi' su'be Moisés.

I tic'lʌntelob ti tuñija'

¹³ Ti wi'il lac Yum tsi' su'be Moisés: —Ch'ojyen ti wen sʌc'ajel, cucu ti' tojlel faraón, su'ben: “Jiñi c Yum lojon, i Dios hebreojob, woli' yʌl: Ac'ʌ a t'añ cha'añ mi' majlelob c cha'año' bʌ, cha'añ mi' ch'ujutesañoñob,

¹⁴ come wʌle mi caj c choc tilel pejtelel jujunchajp wocol ti' a tojlel, ti' tojlel x'e'telob a cha'añ yic'ot ti' tojlel pejtelel a lumal, cha'añ ma' ña'tan ma'añic yam bʌ Dios bajche'on ti pejtelel pañimil.

¹⁵ Che' muq'uic jax c sʌts' j c'ʌb wʌle cha'añ mic lowet yic'ot a tejclum yic'ot junchajp wocol, che' jiñi mi caj la' jilel ti la' lumal.

¹⁶ Pero isujm tsa' c wa'chocoyet cha'añ mic pʌs c p'ʌtʌlel ti a tojlel, yic'ot cha'añ mi cʌc' ti cʌjñel c'aba' ti pejtelel pañimil.

¹⁷ ¿Mu' toj ba a chʌn mʌctañob jiñi c cha'año' bʌ, cha'añ ma'añic mi' majlelob?

¹⁸ Ijc'ʌl, che' bajche' ti ili ora, mi caj c choc tilel colem tac bʌ tuñija', mach bʌ añic ba' ujtem ti Egipto, c'ʌlʌl ti' cajibal la' lumal.

¹⁹ Wʌle choco ti mʌjquel a wʌlac' yic'ot pejtelel a chu'bʌañ am bʌ ti a lum, come pejtelel wiñicob yic'ot pejtelel alʌc'ʌl am bʌ ti jamil mach bʌ añobic ti otot, jiñi tuñija' mi caj i yajlel ti tojlelob, che' jiñi mi caj i chʌmelob.”

²⁰ Jiñi x'e'telob i cha'añ faraón tsa' bʌ i bʌc'ñayob i t'añ lac Yum, tsi' pʌyʌyob ochel i mozojob yic'ot i yʌlac'ob ti otot,

²¹ pero jiñi mach bʌ añic tsi' p'isiyob ti' wenta i t'añ lac Yum, tsi' cʌyʌyob i mozojob yic'ot i yʌlac'ob ya' ti jamil.

²² Jiñi cha'añ lac Yum tsi' su'be Moisés: —Sʌts'ʌ a c'ʌb ti chañ, cha'añ mi' yajlel tilel tuñija' ti pejtelel i lumal Egipto, cha'añ mi' c'otel ti' tojlel wiñicob x'ixicob, ti' tojlel alʌc'ʌl tac yic'ot ti' tojlel pejtelel pʌc'ʌbʌl tac ti' lumal Egipto.

²³ Moisés tsi' letsa i barajte' ti chañ, che' jiñi lac Yum tsi' yʌc'ʌ ti tojmel chajc yic'ot tsi' yʌc'ʌ ti yajlel tuñija'; tsa' yajli tac i c'ʌc'al chajc ti pejtelel Egipto, che' jiñi lac Yum tsi' choco ju'bel tuñija' ti' lumal egiptojob.

²⁴ Tsa' yajli tuñija' temel yic'ot i c'ʌc'al chajc, ma'añic ba' ora ujtem ti Egipto lajal bajche' iliyi c'ʌlʌl ti' cajibal jiñi tejclum.

²⁵ Jiñi tuñija' tsi' jisa pejtelel añ tac bʌ ti' lum Egipto, che' bajche' wiñicob yic'ot alʌc'ʌl tac; che' ja'el jiñi tuñija' tsi' jisa pejtelel pʌc'ʌbʌl tac yic'ot te' tac.

²⁶ Cojach ya' ti' lum Gosén ya' ba'añ israelob ma'añic tsa' yajli tuñija'.

²⁷ Jiñi cha'añ faraón tsi' choco ti pʌyol Moisés yic'ot Aarón, tsi' su'beyob: —Tsa'ix c cha'le mulil ti ili ora; tojʌch lac Yum, joñon yic'ot c pi'ʌlob xmulilon lojon.

²⁸ C'ajtiben lac Yum, cha'añ mi ñʌjch'el ti t'añ i chajc Dios yic'ot jiñi tuñija', che' jiñi mi caj c choquetla majlel, ma'añix mi caj c chʌn mʌctañetla.

²⁹ Moisés tsi' jac'be: —Che' mic loq'uel ti tejclum, mi caj c sʌts' j c'ʌb ba'añ lac Yum; mi caj i ñʌjch'el i t'añ chajc yic'ot tuñija', cha'añ ma' ña'tan i cha'añʌch lac Yum jiñi pañimil.

³⁰ Pero cujil cha'añ jatet yic'ot a pi'ʌlob ti e'tel ma'añic mi la' bʌc'ñan lac Yum Dios.

³¹ Jiñi cha'añ jiñi lino yic'ot cebada tsa' laj jili, come jiñi cebada añix i wut yic'ot jiñi lino wolix ti ñich.

³² Pero jiñi trigo yic'ot centeno ma'añic tsa' jili, come maxto i yorajlelic i wut.

³³ Che' bʌ Moisés tsa' loq'ui ti' tojlel faraón, che' loq'uemix ti jiñi tejclum, tsi' sʌts'ʌ i c'ʌb ba'añ lac Yum, che' jiñi tsa' ñʌjch'i i t'añ chajc yic'ot tuñija', che' ja'el ma'añix tsa' chʌn yajli ja'al ti lum.

³⁴ Che' bʌ tsi' q'uele faraón lajmeñix jiñi ja'al yic'ot tuñija' yic'ot i t'añ chajc, tsi' chʌn cha'le mulil yic'ot tsi' chʌn tsʌts-esa i pusic'al temel yic'ot i wiñicob.

³⁵ Tsi' chʌn tsʌts-esa i pusic'al faraón, jiñi cha'añ ma'añic tsi' choco majlel jiñi israelob, che' bajche' lac Yum tsi' wʌn su'be Moisés.