Exodo 8 - Jiñi Tsiji' bʌ Wen T'añ cha'añ Estudio

I tic'lʌntelob ti xpequejc tac

¹ Jiñi cha'añ lac Yum tsi' su'be Moisés: —Cucu ba'añ faraón, su'ben: “Lac Yum woli yʌl: La' majlicob wiñicob x'ixicob c cha'año' bʌ cha'añ mi' ch'ujutesañoñob,

² mi ma'añic ma' wʌc' a t'añ cha'añ mi' majlelob, mi caj c tic'lan pejtelel a lumal ti xpequejc tac.

³ Ya' ti ja' Nilo mi caj i p'ojlel xpequejc tac, mi caj i loq'uel tilel, mi caj i yochelob ti a wotot, ba' ma' wʌyel, yic'ot ti' pam a wʌyib yic'ot ti yotot tac a mozojob, yic'ot ti yotot pejtelel año' bʌ ti Egipto, mi caj i yochelob ti horno tac yic'ot ya' ba' ma' mel a waj.

⁴ Jiñi xpequejc tac mi caj i letselob ti a cuctal yic'ot ti' cuctal a pi'ʌlob yic'ot ti' cuctal x'e'telob a cha'añ.”

⁵ Lac Yum tsi' su'be Moisés: —Su'ben Aarón: “Sʌts'ʌ a c'ʌb yic'ot a te' ti' pam jiñi ja' tac yic'ot ti pa' tac yic'ot ti' yajñib tac ja'; pʌyʌ tilel xpequejc tac ti pejtelel i lumal Egipto.”

⁶ Che' jiñi Aarón tsi' sʌts'ʌ i c'ʌb ti' pam ja' tac am bʌ ti Egipto. Tsa' pam p'ojli xpequejc ti' lumal Egipto.

⁷ Pero jiñi xwujtob lajal tsi' meleyob yic'ot mucul tac bʌ i ña'tʌbalob, tsi' pʌyʌyob tilel xpequejc tac ti' lumal Egipto.

⁸ Che' jiñi faraón tsi' pʌyʌ tilel Moisés yic'ot Aarón, tsi' su'beyob: —C'ajtiben la' Yum cha'añ mi' cha' loc'san jiñi xpequejc tac tic tojlel lojon, che' jiñi mux caj c choc loq'uel a pi'ʌlob cha'añ mi' majlelob i yʌq'ueñ tsʌnsʌbil bʌ i majtañ la' Yum.

⁹ Moisés tsi' jac'be faraón: —Yom ma' su'b baqui ora awom mij c'ajtiben Dios cha'añ mi' jisan jiñi xpequejc tac ti la' tojlel yic'ot ti la' wotot, ya' jax mi caj i yajñel ti ja' Nilo.

¹⁰ Faraón tsi' yʌlʌ: —Ijc'ʌl to. Moisés tsi' jac'ʌ: —Mi caj i yujtel che' bajche' woli a wʌl, cha'añ ma' ña'tan ma'añic yam bʌ lajal bʌ bajche' lac Yum Dios.

¹¹ Jiñi xpequejc tac mi caj i cʌyet, mi caj i loq'uel ti a wotot tac yic'ot ti' tojlel a wiñicob yic'ot a pi'ʌlob ti Egipto. Ya' jax mi caj i yajñel ti ja' Nilo.

¹² Jiñi cha'añ Moisés yic'ot Aarón tsa' loq'uiyob ti' tojlel faraón. Moisés tsi' pejca lac Yum cha'añ mi' lajmel jiñi wocol cha'añ xpequejc tac tsa' bʌ i choco tilel ti' tojlel faraón.

¹³ Lac Yum tsi' mele che' bajche' tsi' yʌlʌ Moisés: tsa' chʌmi jiñi xpequejc tac ya' ti yotot tacob yic'ot ti pat otot tac yic'ot ti' cholob.

¹⁴ Tsi' much'quiyob, tsa' wen tuw-a pañimil.

¹⁵ Pero che' bʌ tsi' q'uele faraón lajmeñix wocol, tsa' cha' tsʌts-a i pusic'al, ma'añic tsi' jac'beyob che' bajche' tsi' yʌlʌ lac Yum.

I tic'lʌntelob ti uch' tac

¹⁶ Lac Yum tsi' su'be Moisés: —Su'ben Aarón: “Sʌts'ʌ a te', jats'ʌ i ts'u'bejñal lum cha'añ mi' pʌntʌyel ti uch' ti pejtelel i lumal Egipto.”

¹⁷ Che'ʌch tsi' meleyob; Aarón tsi' sʌts'ʌ i c'ʌb yic'ot i te', tsi' jats'ʌ i ts'u'bejñal lum cha'añ mi' pʌntʌyel ti uch', tsa' caji tic'lan wiñicob yic'ot alʌc'ʌl. Pejtelel i ts'u'bejñal lum tsa' pʌntʌyi ti uch' tac ti pejtelel i lumal Egipto.

¹⁸ Che' ja'el jiñi xwujtob tsa' caji ñopob i p'olob uch' ti mucul tac bʌ i ña'tʌbal, pero ma'añic tsa' mejliyob. Tsa' ajñi uch' ti' tojlel wiñicob yic'ot ti alʌc'ʌl tac.

¹⁹ Jiñi cha'añ jiñi xwujtob tsi' su'beyob faraón: —Jiñʌch i yal i c'ʌb Dios. Pero i pusic'al faraón tsa' tsʌts-a, ma'añic tsi' jac'beyob che' bajche' tsi' yʌlʌ lac Yum.

I tic'lʌntelob ti jaj

²⁰ Lac Yum tsi' su'be Moisés: —Ch'ojyen ti sʌc'ajel. Cucu pejcan faraón che' mi' majlel ti ja', su'ben: “Lac Yum woli yʌl: La' majlicob jiñi wiñicob x'ixicob c cha'año' bʌ cha'añ mi' ch'ujutesañoñob,

²¹ come mi ma'añic ma' chocob majlel c cha'año' bʌ, mi caj c choc tilel jaj tac ti a tojlel yic'ot ti' tojlel x'e'telob a cha'añ yic'ot ti pejtelel a pi'ʌlob, ti' chajp ti' chajp jiñi jaj mi caj i yochel ti la' wotot, mi caj i pam pujquel ti la' lumal.

²² Ti jim bʌ ora ma'añic mi caj i tic'lʌntelob c cha'año' bʌ chumulo' bʌ ti' lumal Gosén, ma'añic mi caj i yajñel jaj ya'i, che' jiñi mi caj a ña'tan joñon Yumʌlon ti pañimil.

²³ Joñon mi caj cʌc'ob ti libre c tejclum, mach lajalic mi caj j q'ueletla che' bajche' c cha'año' bʌ. Ijc'ʌl mi caj a q'uel i yejtal c p'ʌtʌlel.”

²⁴ Che'ʌch tsi' mele lac Yum, tsa' tili jaj ti' chajp ti' chajp tsa' bʌ i tic'la ti yotot faraón yic'ot ti yotot tac i wiñicob ti pejtelel Egipto; tsa' asiyi i lumal egiptojob cha'añ jiñi jaj.

²⁵ Jiñi cha'añ faraón tsi' pʌyʌ tilel Moisés yic'ot Aarón, tsi' su'beyob: —Cucula, aq'uenla Dios tsʌnsʌbil bʌ i majtañ pero wʌ' jach yom ti ili lum.

²⁶ Pero Moisés tsi' jac'ʌ: —Mach che'ic yom mic mel lojon, come ts'a' mi caj i q'uelon lojon jiñi egiptojob che' mi cʌq'uen lojon c Yum Dios tsʌnsʌbil bʌ i majtañ. Che' mi cʌq'uen lojon Dios tsʌnsʌbil bʌ i majtañ ts'a' bʌ mi q'uelob jiñi egiptojob, ¿mach ba muq'uic i julon lojon ti xajlel?

²⁷ Mi caj c majlel lojon ti jochol bʌ lum, uxp'ejl bʌ q'uiñ ti xʌñol cha'añ mi cʌq'uen lojon tsʌnsʌbil bʌ i majtañ c Yum lojon Dios che' bajche' mi caj i su'beñon lojon.

²⁸ Faraón tsi' yʌlʌ: —Mi caj c choquetla majlel cha'añ mi la' wʌq'uen tsʌnsʌbil bʌ i majtañ la' Yum Dios ya' ti jochol bʌ lum, pero mach ñajtic yom, pejcanla Dios tic tojlel.

²⁹ Moisés tsi' jac'ʌ: —Che' mic loq'uel ti a tojlel, mi caj j c'ajtiben ti wocol t'añ lac Yum cha'añ ijc'ʌl mi' cʌyet jiñi jaj tac, cha'añ mi' cʌy i tic'lan x'e'telob a cha'añ yic'ot a pi'ʌlob; cojach mach ma' chʌn lotiñon lojon, yom ma' choc loq'uel c pi'ʌlob cha'añ mi' yʌq'ueñob tsʌnsʌbil bʌ i majtañ c Yum lojon.

³⁰ Jiñi cha'añ Moisés tsa' loq'ui ti' tojlel faraón, tsi' pejca lac Yum.

³¹ Lac Yum tsi' mele che' bajche' tsi' c'ajtibe Moisés, tsi' loc'sa jaj ti' tojlel faraón yic'ot ti' tojlel x'e'telob i cha'añ yic'ot ti pejtelel i pi'ʌlob. Ma'añic tsa' cʌle mi juncojtic.

³² Pero ti ili ora, faraón tsi' cha' tsʌts-esa i pusic'al, ma'añic tsi' choco majlel jiñi wiñicob x'ixicob.