Exodo 5 - Jiñi Tsiji' bʌ Wen T'añ cha'añ Estudio

Moisés yic'ot Aarón ti' tojlel faraón

¹ Moisés yic'ot Aarón tsa' majliyob ba'añ faraón, tsi' su'beyob: —Lac Yum i Dios Israel tsi' pejcayon lojon, tsi' yʌlʌ: “La' majlicob c tejclumob cha'añ mi' melbeñoñob q'uiñijel ya' ti colem bʌ i tiquiñal pañimil.”

² Pero jiñi faraón tsi' jac'ʌ: —¿Majqui jiñi la' Yum? ¿Chucoch yom mic ñopben i t'añ cha'añ mic chocob majlel? Mach cʌmbilic c cha'añ la' Yum. Ma'añic mi caj c choc majlel jiñi israelob.

³ Tsi' yʌlʌyob: —I Dios hebreojob tsi' pejcayon lojon. Jiñi cha'añ wersa mic majlel lojon uxp'ejl q'uiñ xʌmbal ya' ti colem bʌ i tiquiñal pañimil. Mi caj cʌq'uen lojon tsʌnsʌbil bʌ i majtañ c Yum Dios, ame i tsʌnsañon lojon ti c'am-ʌjel yic'ot ti guerra.

⁴ Jiñi cha'añ i rey Egipto tsi' su'be: —Jatet Moisés yic'ot Aarón: ¿Chucoch mi la' mʌctʌbeñob i ye'tel wiñicob? Cucula ti la' we'tel.

⁵ Jiñi faraón tsi' yʌlʌ ja'el: —Wʌle ca'bʌlʌch la' pi'ʌlob tic lumal, la' womix la' tic'ob cha'añ ma'añix mi' chʌn melob i ye'tel.

⁶ Ti jiñi jach bʌ q'uiñ faraón tsi' yʌq'ueyob mandar jiñi xq'uel e'telob i cha'añ faraón yic'ot jiñi xq'uel e'telob israelo' bʌ:

⁷ —Ti ili ora ma'añix mi caj la' wʌq'ueñob jam jiñi x'e'telob woli bʌ i melob ladrillo, la' i bajñel tempañob tilel jam.

⁸ Pero wersa lajal mi caj i melob i yonlel i tsicol ladrillo che' bajche' ti yam bʌ ora. Mach i cʌy i melob ti ts'ʌcʌl. Cha'añ ts'u'bob jiñi cha'añ woli' yʌlob: “La' majlicon lojon cha'añ mi cʌq'uen lojon tsʌnsʌbil bʌ i majtañ Dios.”

⁹ Aq'ueñob tsʌts bʌ e'tel jiñi wiñicob cha'añ mi' bʌx-añob ti ye'tel cha'añ ma'añic mi' jac'ob lot.

¹⁰ Che' jiñi, jiñi xq'uel e'telob i cha'añ faraón yic'ot xq'uel e'telob israelo' bʌ tsa' majli i su'beñob x'e'telob: —Che'ʌch tsi' yʌlʌ faraón: “Ma'añix mi caj la' wʌq'uentel jam.

¹¹ Cucula, bajñel sʌclanla jam baqui jach mi la' taje', pero ts'ʌcʌl mi caj la' mel ladrillo che' bajche' c'amel añ ti la' wenta.”

¹² Jiñi cha'añ tsa' pam pujquiyob majlel wiñicob ti pejtelel i lumal Egipto cha'añ mi' tempañob tilel tiquin jam.

¹³ Tsʌts tsi' pejcayob jiñi xq'uel e'telob i cha'añ faraón: —Ts'ʌcʌl yom mi la' mel ladrillo tac ti jujump'ejl q'uiñ, lajal i yonlel mi la' mel che' bajche' tsa' la' mele che' mu' to la wʌq'uentel jam.

¹⁴ Jiñi xq'uel e'telob i cha'añ faraón tsi' bajbeyob jiñi xq'uel e'telob israelo' bʌ. Tsi' c'ajtibeyob: —¿Chucoch mach ts'ʌcʌlic mi la' mel ladrillo che' bajche' ti yam bʌ ora?

¹⁵ Jiñi xq'uel e'telob israelo' bʌ tsa' majli i pejcañob faraón ti wocol t'añ, tsi' yʌlʌyob: —¿Chucoch tsʌts ma' tic'lan x'e'telob a cha'añ?

¹⁶ Ma'añix woli' yʌq'ueñtelob jam jiñi x'e'telob. Pero jiñi xq'uel e'telob a cha'añ mi' chʌn su'beñob cha'añ mi' chʌn melob ladrillo. Awilan jiñi israelo' x'e'telo' bʌ a cha'añ woli' jajts'elob, pero jiñi año' bʌ i mul jiñobʌch a wiñicob.

¹⁷ Faraón tsi' su'beyob: —Wen ts'u'betla, jiñi cha'añ woli la' wʌl: “Conla, la' lac tsʌnsʌben i majtañ lac Yum.”

¹⁸ Cucula ti la' we'tel come ma'añic mi caj la' wʌq'uentel jam, pero wersa mi caj la' mel ti ts'ʌcʌl jiñi ladrillo.

¹⁹ Jiñi xq'uel e'telob i cha'añ israelob tsi' yu'biyob i ch'ijiyemlel, che' bʌ tsa' su'bentiyob: “Ma'añic mi caj i jojmel i ye'telob, wersa mi caj i ts'ʌctesañob i mel ladrillo che' bajche' c'amel añob ti' wenta ti jujump'ejl q'uiñ.”

²⁰ Che' bʌ tsa' loq'uiyob ba'añ faraón, tsi' tajayob Moisés yic'ot Aarón come woli' pijtañob.

²¹ Tsi' yʌlʌyob: —La' i meletla lac Yum come tsa'ix la' wʌc'ʌyon lojon ti ts'a'lentel ti' tojlel faraón yic'ot ti' tojlel c pi'ʌlob lojon. Tsa'ix la' techbe i mich'ajel faraón cha'añ mi' tsʌnsañon lojon.

Lac Yum tsi' yʌq'ue i ye'tel Moisés yic'ot Aarón

²² Jiñi cha'añ Moisés tsa' caji pejcan lac Yum, tsi' c'ajtibe: —C Yum, ¿chucoch tsa' wʌc'ʌ ti tic'lʌntel a wiñicob? ¿Chucoch tsa' chocoyon tilel?

²³ Come c'ʌlʌl che' bʌ tsa' caji c pejcan faraón ti a c'aba', tsa' caji i tic'lan a tejclum, pero jatet ma'añic tsa' colta.