Exodo 4 - Jiñi Tsiji' bʌ Wen T'añ cha'añ Estudio

¹ Jiñi cha'añ Moisés tsi' jac'ʌ, tsi' yʌlʌ: —Ma'añic mi caj i ñopoñob, mi muq'uic cajel i yu'biñob c t'añ, mi caj i yʌlob: “Mach isujmic tsi' pʌsʌ i bʌ lac Yum ba' añet.”

² Lac Yum tsi' c'ajtibe: —¿Chuqui jiñi chucul bʌ a cha'añ ti a c'ʌb? Tsi' jac'ʌ Moisés: —Junts'ijt barajte'.

³ Lac Yum tsi' su'be: —Choco ti lum. Che' jiñi Moisés tsi' choco ti lum i barajte', tsa' sujti ti lucum. Moisés tsi' puts'ta jiñi lucum.

⁴ Che' jiñi lac Yum tsi' su'be Moisés: —Sʌts'ʌ a c'ʌb, chucben i ñej. Moisés tsi' sʌts'ʌ i c'ʌb, tsi' chucu; tsa' cha' sujti ti barajte'.

⁵ —Che' jiñi mi caj i ña'tañob tsa' c pʌsʌ c bʌ ti a tojlel. A Yumon, i Dioson a tatob, i Dioson Abraham, i Dioson Isaac yic'ot i Dioson Jacob.

⁶ Lac Yum tsi' cha' su'be: —Wʌle otsan a c'ʌb ti a tajñ. Moisés tsi' yotsa i c'ʌb ti' tajñ, che' bʌ tsi' cha' loc'sa, sʌsʌquix che' bajche' sʌsʌc bʌ i ña'al tsʌñal.

⁷ Dios tsi' su'be: —Cha' otsan a c'ʌb ti a tajñ. Moisés tsi' cha' otsa i c'ʌb ti' tajñ. Che' bʌ tsi' loc'sa, cha' lajalix che' bajche' i bʌc'tal.

⁸ —Mi ma'añic mi' ñopob a t'añ, mi ma'añic mi ñopob jiñi ñaxan bʌ i yejtal c p'ʌtʌlel, mi caj i ñopob jiñi wi'il bʌ.

⁹ Mi ma'añic mi' ñopob a t'añ che' ma' pʌsbeñob ti' cha'yajlel i yejtal c p'ʌtʌlel, mi caj a luch ja' ya' ti colem ja', mi caj a bec' ya' ti lum; jiñi ja' mi caj i sujtel ti ch'ich' ya' ti' pam lum.

¹⁰ Jiñi cha'añ Moisés tsi' su'be lac Yum: —C Yum, c'ʌlʌl ti wajali, c'ʌlʌl wʌle ma'añic mic wen mejlel ti t'añ. Come c'unte' jach mic cha'len t'añ, wocol mi' loq'uel c t'añ.

¹¹ Lac Yum tsi' jac'be: —¿Majqui tsi' melbe i yej wiñic? ¿Majqui tsi' mele x'uma' yic'ot xcojc yic'ot xpots' yic'ot jiñi mu' bʌ i c'otel i wut? ¿Mach ba joñoñic, jiñi la' Yum?

¹² Jiñi cha'añ, cucu, mi caj cajñel yic'otet che' ma' cha'len t'añ, yic'ot mi caj cʌntesañet chuqui mi caj a su'b.

¹³ Pero tsi' yʌlʌ: —Awocolic c Yum, choco majlel yam bʌ wiñic.

¹⁴ Che' jiñi lac Yum tsi' mich'le Moisés, tsi' yʌlʌ: —¿Mach ba j cʌñʌyic a wʌscun Aarón, jiñi levita, wen yujil bʌ t'añ? Awilan tal i tajet. Che' mi' q'uelet mi caj i yu'bin i tijicñʌyel i pusic'al.

¹⁵ Mi caj a pejcan Aarón, mi caj a su'ben c t'añ cha'añ mi' su'b, mi caj cajñel quic'otetla ti la' cha'ticlel, mi caj j coltañetla ti t'añ, mi caj cʌntesañetla chuqui yom mi la' mel.

¹⁶ Aarón mi caj i pejcan wiñicob x'ixicob; mi caj i cha' su'b chuqui tac ma' su'ben, i wentajet Dios ti' tojlel Aarón.

¹⁷ Mi caj a chuc ili barajte' ti a c'ʌb cha'añ ma' pʌs i yejtal c p'ʌtʌlel.

Moisés tsa' cha' sujti majlel ti Egipto

¹⁸ Che'ʌch tsa' cha' majli Moisés ba'añ Jetro i ñij-al, tsi' su'be: —Mi caj c majlel ba'añ c pi'ʌlob año' bʌ ti Egipto, cha'añ mij q'uel mi cuxulob to. —Cucu ti' ñʌch'tʌlel a pusic'al —che' tsi' su'be Jetro jiñi Moisés.

¹⁹ Lac Yum tsi' su'be Moisés ya' ti Madián: —Sujten ya' ti Egipto, come tsa'ix chʌmiyob pejtelel wiñicob tsa' bʌ i ña'tayob i tsʌnsañet.

²⁰ Che' jiñi Moisés tsi' pʌyʌ majlel i yijñam yic'ot i yalobilob, tsi' c'ʌchchocoyob ti burro, tsa' majliyob ti' lumal Egipto. Che' ja'el Moisés tsi' chucu majlel i barajte' Dios.

²¹ Lac Yum tsi' su'be Moisés: —Che' ma' c'otel ti Egipto, yom ma' pʌsben faraón pejtelel i yejtal tac c p'ʌtʌlel tsa' bʌ c pʌsbeyet; pero mi caj c tsʌts-esʌben i pusic'al, ma'añic mi caj i choc majlel jiñi israelob.

²² Che' jiñi mi caj a su'ben faraón: “Lac Yum woli' yʌl che' bajche' iliyi: Israel jiñʌch ascuñʌl bʌ calobil.

²³ Tsa'ix c su'beyet cha'añ yom ma' choc majlel calobil cha'añ mi' ch'ujutesañon; mi ma'añic ma' choc majlel, mi caj c tsʌnsan jiñi ascuñʌl bʌ a walobil.”

²⁴ Ya' ba' tsa' jijliyob ti bij, lac Yum tsa' tili ba'añ Moisés cha'añ tsi' ña'ta i tsʌnsan.

²⁵ Pero Séfora tsi' ch'ʌmʌ jay bʌ xajlel, ti orajach tsi' tsepbe i pʌchʌlel jiñi ch'itoñ bʌ i yalobil, tsi' choco ya' ti' yoc Moisés, tsi' yʌlʌ: —Isujm, cha'añ ti' caj c ñoxi'alet tsa' bejq'ui i ch'ich'el calobil.

²⁶ Ti wi'il lac Yum tsi' cʌyʌ Moisés che' bʌ tsi' yʌlʌ Séfora: “Cha'añ ti' caj c ñoxi'alet tsa' tsepbenti i pʌchʌlel calobil.”

²⁷ Lac Yum tsi' su'be Aarón: —Cucu taja Moisés ya' ti i tiquiñal lum. Aarón tsa' majli, tsa' c'oti i taj Moisés ya' ti wits Dios, tsi' ts'ujts'u.

²⁸ Jiñi cha'añ Moisés tsi' su'be Aarón pejtelel chuqui tsi' yʌlʌ lac Yum yic'ot ñuc tac bʌ i yejtal i p'ʌtʌlel che' bajche' cʌntesʌbil ti Dios.

²⁹ Temel tsa' majliyob Moisés yic'ot Aarón cha'añ mi' tempañob pejtelel jiñi xñoxob ti Israel.

³⁰ Aarón tsi' laj su'beyob che' bajche' lac Yum tsi' su'be Moisés yic'ot tsi' pʌsbeyob i yejtal tac i p'ʌtʌlel ti' tojlel israelob.

³¹ Jiñi wiñicob x'ixicob tsi' ñopoyob che' bʌ tsi' yu'biyob mux caj i coltañob lac Yum come q'uelel i cha'añ pejtelel i wocol jiñi israelob, tsi' lijiyob i bʌ, tsi' ch'ujutesayob Dios.