Exodo 39 - Jiñi Tsiji' bʌ Wen T'añ cha'añ Estudio

I pislel motomajob

¹ Tsi' c'ʌñʌyob jiñi yʌjyʌx bʌ pisil yic'ot chʌccojan bʌ, yic'ot chʌchʌc bʌ cha'añ ti' melol jiñi bujcʌl tac mu' bʌ i c'ʌjñel ti e'tel ti ch'ujul bʌ ajñibʌl, che' ja'el tsa' mejli ch'ujul bʌ bujcʌl tac cha'añ Aarón che' bajche' lac Yum tsi' yʌq'ue mandar Moisés.

² Jiñi i cha'lajmlel bujcʌl i c'aba' efod tsa' mejli ti oro, yic'ot yʌjyʌx bʌ pisil yic'ot chʌccojan bʌ yic'ot chʌchʌc bʌ yic'ot wen jalbil bʌ lino.

³ Tsi' cujuyob jiñi oro cha'añ mi' pech i bʌ, che' bʌ pechelix tsi' bic'ti siliyob cha'añ i wentajlel puy cha'añ mi' jalob yic'ot jiñi yʌjyʌx bʌ pisil, yic'ot chʌccojan bʌ, yic'ot chʌchʌc bʌ yic'ot lino bʌ pisil, wen uts'atax tsi' meleyob.

⁴ Tsi' melbeyob cha't'ujm i ch'ajñal cha'añ mi' yajñel ti' quejlab ti' cha'wejlel.

⁵ Che' ja'el i cajchi i ñʌc' jalbil ochel oro ti yʌjyʌx bʌ pisil, yic'ot ti chʌccojan bʌ, yic'ot ti chʌchʌc bʌ, yic'ot ti wen jalbil bʌ lino, che'ʌch bajche' lac Yum tsi' yʌq'ue mandar Moisés.

⁶ Tsi' chajpayob xajlel tac i c'aba' ónice, tsi' ñʌp'chocoyob ti oro, ya' ts'ijbubil i c'aba' i yalobilob Israel;

⁷ tsi' yʌc'ʌ jiñi xajlel ya' ti' ch'ajñal am bʌ ti' quejlab ti jujunwejl cha'añ mi' c'ajtesañob i yalobilob Israel che' bajche' lac Yum tsi' yʌq'ue mandar Moisés.

⁸ Tsa' mejli ja'el i pislel i tajñ ti wen uts'at, che' bajche' tsa' mejli jiñi bujcʌl i c'aba' efod ti oro yic'ot ti yʌjyʌx bʌ pisil, yic'ot chʌccojan bʌ, yic'ot chʌchʌc bʌ yic'ot wen jalbil bʌ lino.

⁹ Junlajal i ñuclel, jujunñajb ti' joytʌlel che' mi' pʌjquel.

¹⁰ Tsi' yʌc'ʌyob ti chʌntsolom jiñi xajlel tac. Ti jiñi juñ tsolom añ sardio yic'ot topacio yic'ot carbunclo.

¹¹ Ti' cha'tsolomlel añ esmeralda yic'ot zafiro yic'ot diamante.

¹² Ti yuxtsolomlel añ jacinto, yic'ot ágata yic'ot amatista.

¹³ Ti' chʌntsolomlel añ berilo, yic'ot ónice yic'ot jaspe. Ti jujump'ejl jiñi xajlel ñʌp'ʌl tac ti oro.

¹⁴ Ti' pejtelel jiñi xajlel tac jiñʌch lajchʌmp'ejl, che' bajche' añob i c'aba' jiñi lajchʌntiquil i yalobilob Israel, che' bajche' jump'ejl sello tsa' cʌle ba' ochem i c'aba' jiñi lajchʌntiquil.

¹⁵ Tsi' meleyob ja'el i ch'ajñal jaxbil bʌ ti puro oro che' bajche' lazo cha'añ jiñi bujcʌl welel bʌ ti' tajñ yic'ot jiñi efod.

¹⁶ Tsi' meleyob cha'xojt xotol bʌ oro cha'añ mi' yʌc' jiñi i ch'ajñal ti jujunwejl i pislel i tajñ.

¹⁷ Tsi' yotsayob jiñi cha't'ujm jalbil bʌ oro ti jiñi cha'xojt xotol bʌ am bʌ ti jujunwejl i pislel i tajñ.

¹⁸ Tsi' yotsayob ja'el ti' cha'wejlel jiñi i ch'ajñal jalbil bʌ oro, tsi' cʌchʌyob ti' cha'wejlel i quejlab jiñi bujcʌl i c'aba' efod ya' ba' xotol tac.

¹⁹ Tsi' meleyob yam bʌ cha'xojt melbil bʌ ti oro, tsi' yotsayob ti' ye'bal i pislel i tajñ ti' pam jiñi efod.

²⁰ Tsi' cʌchʌyob yam bʌ cha'xojt melbil bʌ ti oro ya' ti ye'bal jiñi i ch'ajñal am bʌ ti bujcʌl, tsi' yʌc'ʌyob lʌc'ʌl ya' ba'añ i cajchi ñʌc'.

²¹ Che' jiñi tsi' cʌchʌyob ti yʌjyʌx bʌ i ch'ajñal jiñi xotol tac bʌ otsʌbil bʌ ya' ti' pislel i tajñ yic'ot jiñi xotol tac bʌ otsʌbil bʌ ya' ti efod, cha'añ ma'añic mi' ñijcan i bʌ i pislel i tajñ yic'ot jiñi efod, che' bajche' lac Yum tsi' yʌq'ue mandar Moisés.

²² Tsi' meleyob ja'el jiñi bujcʌl i c'aba' efod, wen jalbil bʌ ti yʌjyʌx bʌ puy,

²³ che' ja'el ya' ti yojlil melbil i bic' i bujc ba' mi yochel i jol jiñi motomaj. Joch'bil i ti' cha'añ ma'añic mi' tsijlel.

²⁴ Che' ja'el ya' ti' joytʌlel i yoc jiñi pʌl bʌ bujcʌl tsi' yotsʌbeyob i ch'ʌjlil che' yilal bajche' ch'um ac' yʌjyʌx bʌ yic'ot chʌccojan bʌ yic'ot chʌchʌc bʌ yic'ot wen jalbil bʌ lino bʌ pisil.

²⁵ Tsi' yotsʌbeyob ja'el jump'ejl alʌ campana melbil bʌ ti oro yic'ot jump'ejl ch'um ac', jump'ejl alʌ campana yic'ot jump'ejl ch'um ac', che'ʌch tsi' meleyob ti' joytʌlel i ti' jiñi pʌl bʌ bujcʌl;

²⁶ jump'ejl alʌ campana yic'ot jump'ejl ch'um ac' ya' ti' joytʌlel i ti' jiñi pʌl bʌ bujcʌl, tsa' bʌ c'ʌjñi che' bʌ tsi' mele i ye'tel, che' bajche' lac Yum tsi' yʌq'ue mandar Moisés.

²⁷ Che' ja'el tsi' melbeyob tam bʌ i pislel Aarón yic'ot i yalobilob melbil bʌ ti lino, wen jalbil bʌ;

²⁸ tsi' c'ʌñʌ wen bʌ lino bʌ pisil cha'añ i pixintib i jol, yic'ot i ch'ʌjlil tac yic'ot i borwex;

²⁹ che' ja'el tsi' c'ʌñʌyob wen jalbil bʌ lino ti' melol i cajchi ñʌc', yʌjyʌx bʌ, chʌccojan bʌ yic'ot chʌchʌc bʌ, joch'bil bʌ, che' bajche' lac Yum tsi' yʌq'ue mandar Moisés.

³⁰ Tsi' meleyob ja'el junxojt ch'ujul bʌ melbil bʌ ti oro cha'añ mi' yʌc' ti' pam, ba' tsi' ts'ijbayob ili t'añ: “CH'UJUL CHA'AÑ LAC YUM.”

³¹ Tsi' cʌchʌyob ti yʌjyʌx bʌ i ch'ajñal ya' ti' pixintib i jol, che' bajche' lac Yum tsi' yʌq'ue mandar Moisés.

Tsa' ujti jiñi e'tel cha'añ Tabernáculo

³² Che'ʌch tsa' ujti ti melol pejtelel jiñi e'tel cha'añ Tabernáculo, jiñi otot ba' mi' tempañob i bʌ; jiñi israelob tsi' meleyob pejtelel che' bajche' lac Yum tsi' yʌq'ue mandar Moisés.

³³ Tsi' yʌq'ueyob ti' wenta Moisés jiñi Tabernáculo, jiñi pisil bʌ i yotot Dios, yic'ot pejtelel mu' bʌ i c'ʌjñel; i joc'lib tac, i tablajlel tac, i te'el tac, i yoyel tac yic'ot i c'ʌclib i yoyel tac,

³⁴ yic'ot i mʌjquil tac melbil bʌ ti' pʌchʌlel tat tʌñʌme' ts'ajbil bʌ ti chʌchʌc bʌ i bojñil, yic'ot ti wen tac bʌ pʌchi, yic'ot jiñi joc'ol bʌ pisil mu' bʌ i t'ox jiñi ajñibʌl;

³⁵ yic'ot jiñi Arca ba' lotbil jiñi mandar, yic'ot i te'el tac, yic'ot i majc jiñi Arca;

³⁶ yic'ot jiñi mesa, yic'ot pejtelel vaso tac, yic'ot jiñi waj mu' bʌ i yʌq'uentel Dios;

³⁷ yic'ot i c'ʌclib jiñi lámpara tac melbil bʌ ti oro, yic'ot jiñi lámpara tac, yic'ot olivo aceite cha'añ c'ajc, jiñi lámpara tac yic'ot jiñi yan tac bʌ mu' bʌ i c'ʌjñel yom wen tsolbil;

³⁸ yic'ot jiñi pulʌntib melbil bʌ ti oro, yic'ot olivo aceite cha'añ bojñibʌl, yic'ot xojocña bʌ pom, yic'ot jiñi cortina cha'añ i mʌjquil ba' mi' yochelob ti Tabernáculo;

³⁹ yic'ot jiñi pulʌntib melbil bʌ ti bronce, yic'ot jiñi chincholtic bʌ melbil bʌ ti bronce yic'ot i te'el tac, yic'ot pejtelel mu' bʌ i c'ʌjñel tac, yic'ot i yajñib ja' yic'ot i buchlib;

⁴⁰ yic'ot jiñi cortina tac cha'añ patio, yic'ot i yoyel tac, yic'ot i c'ʌclib tac yic'ot jiñi cortina mu' bʌ i joc'chocontel ya' ti ti' jiñi ajñibʌl yic'ot i ch'ajñal tac yic'ot i te'el tac, yic'ot pejtelel mu' bʌ i c'ʌjñel cha'añ e'tel ya' ti Tabernáculo ba' mi' tempañob i bʌ;

⁴¹ yic'ot jalbil tac bʌ pisil cha'añ mi' c'ʌñob che' mi' melbeñob i ye'tel Dios ti Ch'ujul bʌ Ajñibʌl, yic'ot jiñi Ch'ujul bʌ i pislel Aarón jiñi motomaj, yic'ot i pislel ja'el i yalobilob cha'añ mi' cha'leñob e'tel ti motomaj.

⁴² Jiñi israelob tsi' meleyob ti' pejtelel che' bajche' lac Yum tsi' yʌq'ue mandar Moisés.

⁴³ Che' bʌ Moisés tsi' q'uele jiñi e'tel, cha'añ uts'atʌch tsi' meleyob ti' pejtelel che' bajche' tsi' yʌlʌ lac Yum, che' jiñi Moisés tsi' yʌq'ueyob i yutslel i t'añ.