Exodo 38 - Jiñi Tsiji' bʌ Wen T'añ cha'añ Estudio

¹ Bezaleel tsi' mele jiñi pulʌntib cha'añ i majtañ lac Yum ti acacia te', i tamlel jiñʌch cha'p'ejl metro yic'ot jo'p'ejl i cha'c'al centímetro (2.25) ti jujunwejl; i chañlel jiñʌch jump'ejl metro yic'ot jo'p'ejl i cha'c'al centímetro (1.25).

² Tsi' melbe i xulub ti' chʌmp'ejlel i xujc, ya' jach tsa' tem loq'ui i xulub ya' ti pulʌntib yic'ot tsi' tep'e ti bronce.

³ Tsi' mele tac ja'el pejtelel mu' bʌ i c'ʌjñibʌyel ya' ti pulʌntib che' bajche': jiñi poc' tac, tenaza tac, taza tac, yic'ot rocol tac bʌ yic'ot pala tac; laj melbil ti bronce.

⁴ Tsi' mele chincholtic bʌ ti bronce, tsi' yʌc'ʌ ti ye'bal ya' ba' joy mʌcbil jiñi pulʌntib. Jiñi chincholtic bʌ añ ti yojlil jiñi pulʌntib.

⁵ Ya' ti ti' jiñi chincholtic bʌ tsi' yʌc'ʌ chʌmp'ejl xotol tac bʌ melbil bʌ ti bronce cha'añ mi' yochel jiñi bara tac.

⁶ Tsi' mele jiñi bara tac ti acacia te' yic'ot tsi' tep'e ti bronce.

⁷ Tsi' yotsa jiñi bara tac ba'añ jiñi xotol tac bʌ ti jujunwejl jiñi pulʌntib cha'añ mi' mejlel i ch'uyob majlel. Jiñi pulʌntib tocol i mal yic'ot melbil ti tabla tac.

⁸ Che' ja'el tsi' mele i yajñib ja' ti bronce yic'ot i buchlib, tsa' loq'ui jiñi bronce ti espejo tac tsa' bʌ i yʌc'ʌyob jiñi x'ixicob tsa' bʌ i meleyob i ye'tel ya' ti ti' jiñi Tabernáculo ba' mi' tempañob i bʌ.

I patiojlel Tabernáculo

⁹ Tsi' mele ja'el jiñi patio. Ya' ti sur tsi' joc'choco cortina melbil bʌ ti wen jalbil bʌ pisil i c'aba' lino am bʌ i tamlel ti jo'p'ejl i yuxc'al (45) metro.

¹⁰ Añ junc'al i yoyel yic'ot junc'al i c'ʌclib melbil bʌ ti bronce yic'ot i joc'lib melbil bʌ ti plata.

¹¹ Che' ja'el ti norte tsi' joc'choco yam bʌ cortina am bʌ i tamlel ti jo'p'ejl i yuxc'al (45) metro yic'ot junc'al i yoyel yic'ot junc'al i c'ʌclib melbil bʌ ti bronce yic'ot i joc'lib tac melbil bʌ ti plata.

¹² Ya' ti bʌjlibal q'uiñ tsi' joc'choco cortina am bʌ i tamlel ti cha'p'ejl i cha'c'al yic'ot ojlil metro (22.50) yic'ot lujunts'ijt i yoyel tac yic'ot lujump'ejl i c'ʌclib tac. Jiñi i joc'lib tac ya' ti yoyel melbil ti plata.

¹³ I tamlel jiñi cortina tac ti' tojel i pasibal q'uiñ jiñʌch cha'p'ejl i cha'c'al yic'ot ojlil metro (22.50);

¹⁴ jiñi cortina ti jujunwejl ba' mi' yochelob ya' ti Tabernáculo jiñʌch wucp'ejl (7) metro. Añ uxts'ijt i te'el yic'ot i c'ʌclib tac,

¹⁵ ya' ti junwejl ya' ba'añ i ti' jiñi patio añ pisil cortina i tamlel jiñʌch wucp'ejl (7) metro, añ uxts'ijt i te'el yic'ot uxts'ijt i c'ʌclib.

¹⁶ Pejtelel jiñi cortina tac am bʌ ti' joytʌlel jiñi patio melbil ti wen jalbil bʌ pisil i c'aba' lino.

¹⁷ Melbil ti bronce i c'ʌclib tac i te'el; melbil ti plata i joc'lib tac yic'ot jiñi xotol tac bʌ; che' ja'el tep'bil ti plata i pam i ñi' i postejlel jiñi patio yic'ot pejtelel i te'el tac añ xotol tac bʌ melbil bʌ ti plata.

¹⁸ I mʌjquil jiñi patio jiñʌch cortina am bʌ bolomp'ejl metro (9) i tamlel, cha'p'ejl metro yic'ot jo'p'ejl i cha'c'al centímetro (2.25) i chañlel, melbil bʌ ti yʌjyʌx bʌ pisil, yic'ot chʌccojan bʌ pisil, yic'ot chʌchʌc bʌ pisil, wen jalbil bʌ pisil i c'aba' lino, lajal che' bajche' jiñi cortina am bʌ ti patio.

¹⁹ Añ chʌnts'ijt i te'el tac yic'ot chʌmp'ejl i c'ʌclib melbil bʌ ti bronce; i joc'lib tac yic'ot jiñi xotol tac bʌ melbil tac ti plata yic'ot i jol i yoyel tac tsi' tep'eyob ti plata.

²⁰ Pejtelel i te'el tac jiñi Tabernáculo yic'ot i te'el tac i patiojlel melbil ti bronce.

I q'uelol jiñi e'tel

²¹ Jiñʌch che' bajche' c'amel tsa' jili jiñi tsucul taq'uiñ tac ti' melol jiñi Tabernáculo ba' mi' lojtel jiñi mandar, tsa' bʌ mejli ti' t'añ Moisés yic'ot tsa' bʌ i mele jiñi levijob che' bajche' tsi' yʌlʌ Itamar i yalobil jiñi motomaj Aarón.

²² Bezaleel i yalobil Uri i buts bʌ Hur loq'uem bʌ ti' p'olbal Judá tsi' laj mele pejtelel chuqui tac tsi' yʌlʌ lac Yum ti' tojlel Moisés,

²³ ya'añ ja'el Aholiab i yalobil Ahisamac loq'uem bʌ ti' p'olbal Dan, wen yujil e'tel ti tsucul taq'uiñ tac, yic'ot wen yujil i jalol yic'ot i joch'ol pisil ti yʌjyʌx bʌ, yic'ot ti chʌccojan bʌ, yic'ot ti chʌchʌc tac bʌ yic'ot wen bʌ lino bʌ pisil.

Jiñi tsucul taq'uiñ tac tsa' bʌ c'ʌjñi ti' yotot Dios

²⁴ Pejtelel jiñi oro tsa' bʌ c'ʌjñi cha'añ i yotot Dios, jiñi oro tsa' bʌ aq'uenti lac Yum añ i yalel che' bajche' 965 kilo yic'ot lujump'ejl i cha'c'al gramo che' bajche' añ jiñi p'isoñib ya' ti ch'ujul bʌ ajñibʌl.

²⁵ Jiñi plata tsa' bʌ i yʌc'ʌyob wiñicob jiñʌch 3,319 kilo yic'ot 525 gramo che' bajche' añ jiñi p'isoñib ya' ti ch'ujul bʌ ajñibʌl;

²⁶ tsi' yʌc'ʌyob jujuntiquil jo'p'ejl gramo yic'ot ojlil plata che' bajche' añ jiñi p'isoñib ti ch'ujul bʌ ajñibʌl, pejtelel jiñi tsa' bʌ tsijquiyob jiñobʌch añobix bʌ junc'al (20) i ja'bilelob c'ʌlʌl ti' ñoxlel, ti' pejtelelob jiñʌch 603,550.

²⁷ Tsa' c'ʌjñi yam bʌ che' bajche' 3,300 kilo jiñi plata cha'añ i melol i c'ʌclib tac jiñi Tabernáculo, yic'ot cha'añ i melol i joc'lib jiñi colem bʌ pisil; ti jo'c'al i c'ʌclib tsa' c'ʌjñi uxp'ejl i yuxc'al (33) kilo jiñi plata ti jujump'ejl i c'ʌclib.

²⁸ Jiñi 525 gramo jiñi plata tsa' c'ʌjñi cha'añ i melol i ch'ʌjlil i ñi' i yoyel tac, tsi' tep'eyob pejtelel i chañelal yic'ot tsi' laj cʌchʌyob.

²⁹ Jiñi bronce tsa' bʌ i yʌc'ʌyob jiñʌch che' bajche' 2,336 kilo yic'ot 400 gramo,

³⁰ tsa' c'ʌjñi jiñi bronce ti' melol i c'ʌclib tac i te'el i puertajlel jiñi Tabernáculo ba' mi tempañob i bʌ yic'ot jiñi pulʌntib, yic'ot jiñi chincholtic bʌ, yic'ot pejtelel chuqui tac yom c'ʌñol ya' ti pulʌntib,

³¹ tsa' c'ʌjñi jiñi bronce ja'el cha'añ i c'ʌclib tac i patiojlel, yic'ot i c'ʌclib tac i puertajlel, yic'ot pejtelel i te'el tac jiñi Tabernáculo yic'ot i te'el tac i patiojlel.