Exodo 37 - Jiñi Tsiji' bʌ Wen T'añ cha'añ Estudio

Jiñi mu' bʌ i c'ʌjñel ya' ti Tabernáculo

¹ Bezaleel tsi' c'ʌñʌ acacia te' cha'añ mi' mel jiñi Arca; añ jump'ejl metro yic'ot lujump'ejl centímetro (1.10) i tamlel, yic'ot jo'p'ejl i chʌnc'al (65) centímetro i xujc, yic'ot jo'p'ejl i chʌnc'al (65) centímetro i chañlel.

² Tsi' tep'e ti puro oro ti' pat yic'ot ti' mal yic'ot tsi' mele ti oro i ti'il i xujc ti' joytʌlel.

³ Tsi' mele ja'el chʌnxojt melbil bʌ ti oro cha'añ ti chʌmp'ejlel i xujc; añ cha'xojt ti junwejl i xujc yic'ot yam bʌ cha'xojt ti yam bʌ junwejl i xujc.

⁴ Tsi' mele bara tac ja'el melbil bʌ ti acacia te' tsi' tep'e ti oro.

⁵ Tsi' jucu tac ochel jiñi barajte' ya' ba' xotol tac ti jujunwejl i xujc jiñi Arca cha'añ mi' mejlel i q'uechob majlel.

⁶ Che' ja'el tsi' mele ti oro i majc jiñi Arca, i tamlel jiñʌch jump'ejl metro yic'ot lujump'ejl centímetro (1.10), jiñi i xujc jiñʌch jo'p'ejl i chʌnc'al (65) centímetro.

⁷ Tsi' mele ja'el cha'tiquil i yejtal querubiñob ti oro, jats'bil bʌ ti martillo, ti' jujunwejl i majc jiñi Arca.

⁸ Añ juntiquil i yejtal querubín ti jujunwejl i majc; ya' jach tem tsuyul ya' ti' majc jiñi Arca.

⁹ Jiñi i yejtal querubiñob tich'il i wich' ya' ti' pam jiñi Arca, cha'añ mi' mos i majc jiñi Arca; mi' laja q'uelob i bʌ yic'ot mi' q'uelob i pam jiñi Arca.

¹⁰ Che' ja'el tsi' mele jump'ejl mesa ti acacia te', lujump'ejl i jo'c'al (90) centímetro i tamlel, jo'p'ejl i yuxc'al (45) centímetro i xujc yic'ot jo'p'ejl i chʌnc'al (65) centímetro i chañlel.

¹¹ Tsi' tep'e ti puro oro yic'ot tsi' melbe i ch'ʌjlil ti' joytʌlel i ti' tac i xujc ti puro oro.

¹² Tsi' mele ja'el i ch'ʌjlil ti oro ti' joytʌlel i xujc tac, che' bajche' i ñuclel jumpajch' c'ʌbʌl yic'ot tsi' yʌq'ue i ch'ʌjlil ti' pam jiñi tselel tac bʌ ti puro oro.

¹³ Tsi' mele ja'el chʌnxojt xotol tac bʌ oro, tsi' yʌc'ʌ ya' ti jujunwejl i xujc jiñi mesa, añ jujunxojt ti jujunts'ijt i yoc.

¹⁴ Jiñi xotol tac bʌ mi' yajñel ti' ti'il cha'añ mi' mejlel ti ochel jiñi bara tac, cha'añ mi' mejlel ti ch'ujyel majlel jiñi mesa.

¹⁵ Tsi' mele jiñi bara tac ti acacia te' tsi' tep'e ti oro cha'añ mi' c'ʌñ i q'uechob majlel jiñi mesa.

¹⁶ Che' ja'el tsi' mele ti oro jiñi mu' bʌ i c'ʌjñel tac, mu' bʌ i yajñel ti mesa: che' bajche' plato tac, cuchara tac, cuchillo tac yic'ot jiñi taza tac mu' bʌ i c'ʌjñel cha'añ jiñi lʌmʌl tac bʌ majtañʌl.

¹⁷ Tsi' mele ja'el i yajñib lámpara ti puro oro jats'bil bʌ ti martillo, tsi' melbe i yoc yic'ot i te'el ja'el yic'ot i tazajlel yic'ot ba' mi' lejmel c'ajc tac yic'ot i ch'ʌjlil tac.

¹⁸ Añ wʌcts'ijt i c'ʌb ba' mi' lejmel c'ajc, uxts'ijt i c'ʌb ti jujunwejl.

¹⁹ Ti jujunts'ijt i c'ʌb añ uxp'ejl i tazajlel lajal che' bajche' i ñich te' i c'aba' almendro, jump'ejl i yajñib ba' mi' ts'ʌjbel c'ajc yic'ot i ñich, che'ʌch ti wucts'ijtlel i c'ʌb i yajñib jiñi lámpara.

²⁰ Che' ja'el ya' ti' te'el jiñi yajñib lámpara añ chʌmp'ejl i tazajlel lajal che' bajche' i ñich te' i c'aba' almendro yic'ot ba' mi' lejmel c'ajc yic'ot i ñich ti jujump'ejl.

²¹ Añ jujump'ejl p'ocol tac bʌ ba' tsuybil tac jiñi cha'cha'ts'ijt i c'ʌb i yajñib lámpara c'ʌlʌl ti wucts'ijtlel.

²² Pejtelel jiñi p'ocol tac bʌ yic'ot i c'ʌb tac jiñi lámpara melbil ti puro oro jats'bil ti martillo.

²³ Che' ja'el tsi' mele ti puro oro jiñi wucts'ijt ba' mi' lejmel jiñi c'ajc, yic'ot mu' bʌ i c'ʌn i yʌp jiñi c'ajc yic'ot i yajñib i tʌñʌl.

²⁴ Ti' melol pejtelel iliyi tsi' c'ʌñʌ uxp'ejl i cha'c'al (33) kilo puro oro.

²⁵ Che' ja'el tsi' mele i pulʌntib pom ti acacia te', i tamlel jiñʌch jo'p'ejl i yuxc'al (45) centímetro ti jujunwejl i xujc yic'ot lujump'ejl i jo'c'al (90) centímetro i chañlel, ya' jach tem loq'uem i xulub ya' ti' xujc tac jiñi pulʌntib.

²⁶ Tsi' tep'e ti oro ti' joytʌlel, yic'ot i xulub tac, yic'ot tsi' ch'ʌlbe ti oro ti' joytʌlel.

²⁷ Ya' ti' ye'bal i ti' ti' cha'wejlel i xujc tsi' mele ja'el cha'xojt oro cha'añ mi' juc ochel jiñi barajte' cha'añ mi' mejlel i q'uechob.

²⁸ Tsi' mele jiñi bara tac ti acacia te' yic'ot tsi' tep'e tac ti oro.

²⁹ Che' ja'el tsi' chajpa ch'ujul bʌ olivo aceite cha'añ bojñibʌl, yic'ot pom xojocña bʌ i yujts'il, che' bajche' ñʌmʌlob i mel jiñi xojocña bʌ ts'ac.