Exodo 36 - Jiñi Tsiji' bʌ Wen T'añ cha'añ Estudio

¹ “Jiñi cha'añ Bezaleel yic'ot Aholiab, yic'ot pejtelel wiñicob tsa' bʌ aq'uentiyob i ña'tʌbal yic'ot i ch'ejlel ti lac Yum cha'añ mi' melob pejtelel e'tel tac ya' ti Tabernáculo che' bajche' tsi' yʌlʌ lac Yum.”

Moisés tsi' yʌlʌ cha'añ jasʌlix jiñi ofrenda

² Moisés tsi' pʌyʌ Bezaleel yic'ot Aholiab, yic'ot pejtelel wiñicob tsa' bʌ aq'uentiyob i ña'tʌbal ti lac Yum cha'añ jiñi e'tel, yic'ot wiñicob tsa' bʌ yu'biyob ti' pusic'al cha'añ mi' tilelob ti jiñi e'tel.

³ Bezaleel yic'ot Aholiab tsi' ch'ʌmʌyob ti' tojlel Moisés jiñi majtañʌl tac tsa' bʌ i ch'ʌmʌyob c'otel jiñi israelob cha'añ mi' melbeñob i yotot Dios. Jiñi wiñicob yic'ot x'ixicob tsi' chʌn ch'ʌmʌyob c'otel jiñi majtañʌl ti jujump'ejl sʌc'ajel che' bajche' tilemob ti' pusic'al.

⁴ Wen ca'bʌlix jiñi woli bʌ i tempʌyel, jiñi cha'añ jiñi x'e'telob woli bʌ i melbeñob i yotot Dios, tsi' cʌyʌyob i ye'tel,

⁵ tsa' majli i su'beñob Moisés: “Jiñi wiñicob x'ixicob woli' ch'ʌmob tilel jiñi ofrenda ñumeñix ti p'is che' bajche' yom c'ʌñol cha'añ jiñi e'tel yom bʌ melol che' bajche' tsi' yʌlʌ lac Yum.”

⁶ Jiñi cha'añ Moisés tsi' yʌc'ʌ ti tsictiyel jiñi t'añ ti pejtelel tejclum: “Mach yomix mi' chʌn tilel wiñic mi x'ixic cha'añ mi' ch'ʌm tilel ofrenda cha'añ i yotot Dios.” Che'ʌch tsa' tijq'uiyob jiñi wiñicob x'ixicob cha'añ ma'añix mi' chʌn ch'ʌmob c'otel jiñi ofrenda,

⁷ come wen oñix pejtelel jiñi yom bʌ mi' c'ʌjñel tac cha'añ i melol pejtelel jiñi e'tel yic'ot añix i ñumel ja'el.

I melol Tabernáculo

⁸ Pejtelel jiñi p'ip'o' bʌ i pusic'al woliyo' bʌ ti e'tel, tsi' meleyob jiñi Tabernáculo, tsi' c'ʌñʌyob lujumpajc cortina tac ti wen i t'ojol bʌ lino, yʌjyʌx bʌ pisil, chʌccojan bʌ pisil, yic'ot chʌchʌc bʌ pisil; tsi' melbeyob i yejtal querubiñob wen i t'ojol bʌ.

⁹ Añ i tamlel jiñi jujump'ejl cortina che' bajche' chʌnlujump'ejl (14) metro yic'ot cha'p'ejl metro i xujc. Junlajal i ñuclel ti' pejtelel.

¹⁰ Tsi' tsuyuyob jiñi jo'pajc cortina tac, che'ʌch tsi' tsuyuyob ja'el jiñi yam bʌ jo'pajc cortina tac.

¹¹ Ti wi'il tsi' yʌc'ʌyob xotol tac bʌ yʌjyʌx bʌ pisil ti ti' tac jiñi jujumpajc cortina, che'ʌch tsi' meleyob ja'el ti ti' tac jiñi i cha'pajclel bʌ cortina.

¹² Añ lujump'ejl i yuxc'al jiñi xotol tac bʌ pisil ti jiñi ñaxan bʌ cortina, yic'ot lujump'ejl i yuxc'al xotol tac bʌ pisil ya' ti cha'pajclel bʌ cortina; jiñi xotol tac bʌ pisil lajal tsi' tajayob i bʌ ti' cha'tʌjc'lel.

¹³ Tsi' meleyob ja'el lujunts'ijt i yuxc'al (50) i joc'lib melbil bʌ ti oro, ba' tsi' joc'chocoyob jiñi cortina tac, che'ʌch tsi' meleyob jiñi Tabernáculo.

¹⁴ Che' ja'el tsi' meleyob cortina tac ti' tsutsel chivo cha'añ mi' mosbeñob i jol jiñi Tabernáculo; añ junlujumpajc ti' pejtelel.

¹⁵ Añ i tamlel jujumpajc cortina che' bajche' jo'lujump'ejl (15) metro yic'ot cha'p'ejl metro i xujc; jiñi junlujumpajc cortina junlajal i p'isol.

¹⁶ Tsi' tʌc'ʌyob jiñi jo'pajc cortina tac, ixcu jiñi yam bʌ wʌcpajc cortina tsi' tʌc'ʌyob ja'el.

¹⁷ Tsi' melbeyob ja'el lujump'ejl i yuxc'al xotol tac bʌ pisil ya' ti ti' jiñi cortina yic'ot lujump'ejl i yuxc'al ya' ti ti' i cha'tʌjc'lel bʌ jiñi cortina.

¹⁸ Che' ja'el tsi' melbeyob lujunts'ijt i yuxc'al (50) i joc'lib melbil bʌ ti bronce cha'añ mi' yotsañob ya' ti xotol tac bʌ pisil, che' jiñi tsa' mejli ti jump'ejl jach jiñi cortina.

¹⁹ Che' ja'el tsi' melbeyob i jol jiñi Tabernáculo, tsi' meleyob ti' pʌchʌlel tat tʌñʌme' ts'ajbil bʌ ti chʌchʌc bʌ i bojñil. Tsi' yʌc'ʌyob i pʌchʌlel cojtom ya' ti' pam.

²⁰ Che' ja'el, tsi' yʌq'ueyob i tablajlel jiñi Tabernáculo ti acacia te', wa'al tac tsi' yʌc'ʌyob.

²¹ I tamlel tac jiñi tabla jiñʌch jo'p'ejl metro yic'ot i xujc jiñʌch jo'lujump'ejl i chʌnc'al (75) centímetro.

²² Ti jujunq'uejl tabla añ i quejp tac ti' cha'wejlel cha'añ ñut'ul mi' cʌytʌl; che'ʌch tsi' meleyob ti' pejtelel i tablajlel jiñi Tabernáculo.

²³ Tsi' meleyob junc'al tabla cha'añ i mʌjquil jiñi Tabernáculo am bʌ ti' tojel sur.

²⁴ Che' ja'el tsi' meleyob cha'c'al i c'ʌclib melbil bʌ ti plata tsa' bʌ i yʌq'ueyob ya' ti ye'bal jiñi junc'al tabla tac. Añ cha'p'ejl i c'ʌclib cha'añ jujunq'uejl tabla ya' ba'añ i quejp tac.

²⁵ Ya' ti yam bʌ i junwejlel jiñi Tabernáculo am bʌ ti' tojel norte tsi' melbeyob junc'al i tablajlel ja'el,

²⁶ yic'ot cha'c'al i c'ʌclib melbil bʌ ti plata: cha'p'ejl i c'ʌclib cha'añ jujunq'uejl tabla ya' ba'añ i quejp tac.

²⁷ Ya' ti' tojel i bʌjlibal q'uiñ tsi' melbeyob wʌcq'uejl tabla cha'añ i pat jiñi Tabernáculo.

²⁸ Cha'añ i xujc tac jiñi Tabernáculo tsi' yʌq'ueyob cha'q'uejl tabla,

²⁹ cha'añ junlajal mi' cʌjchel ti' ñujp ti' ñujp tac jiñi tabla yic'ot jiñi xotol tac bʌ tsucu taq'uiñ; che'ʌch tsa' mejli ti' cha'wejlel i xujc.

³⁰ Ti' pejtelel añ waxʌcq'uejl tabla yic'ot wʌclujump'ejl i c'ʌclib melbil bʌ ti plata: cha'p'ejl i c'ʌclib cha'añ jujunq'uejl tabla.

³¹ Che' ja'el tsi' melbe i c'ʌtlonte'el ti acacia te': jo'ts'ijt i c'ʌtlonte'el cha'añ jiñi tabla tac ti junwejl jiñi Tabernáculo,

³² yic'ot yam bʌ jo'ts'ijt i c'ʌtlonte'el ti yam bʌ i junwejlel jiñi Tabernáculo, yic'ot yam bʌ jo'ts'ijt i c'ʌtlonte'el ya' ba' mi' bʌjlel q'uiñ.

³³ Tsi' yʌq'ue i c'ʌtlonte'el ti yojlil jiñi tabla tac ti jujunwejl.

³⁴ Tsi' tep'eyob ti oro jiñi tabla tac yic'ot tsi' meleyob xotol tac bʌ ti oro ba' mi' ñumel i c'ʌtlonte'el tac; che' ja'el jiñi i c'ʌtlonte'el tac tsi' tep'eyob ti oro.

³⁵ Che' ja'el tsi' meleyob colem bʌ joc'ol bʌ pisil, yʌjyʌx bʌ, yic'ot chʌccojan bʌ, chʌchʌc bʌ, wen jalbil bʌ lino yic'ot i yejtal querubiñob ti wen uts'at.

³⁶ Cha'añ mi' joc'tʌl tsi' melbeyob chʌnts'ijt i yoyel ti acacia te', tsi' tep'eyob ti oro, che' ja'el tsi' melbeyob i joc'lib ti oro yic'ot tsi' melbeyob chʌmp'ejl i buchlib ti plata.

³⁷ Che' ja'el tsi' meleyob cortina cha'añ mi' yajñel ti ti' jiñi Tabernáculo, ti yʌjyʌx bʌ pisil yic'ot ti chʌccojan bʌ pisil, yic'ot ti chʌchʌc bʌ pisil, yic'ot wen jalbil bʌ lino, wen uts'at bʌ joch'bil,

³⁸ tsi' melbeyob jo'ts'ijt i yoyel yic'ot i joc'lib tac. Tsi' tep'eyob ti oro i joc'lib tac yic'ot tsi' boñoyob ti oro i jol i yoyel tac, yic'ot tsi' melbeyob jo'p'ejl i buchlib ti bronce.