Exodo 34 - Jiñi Tsiji' bʌ Wen T'añ cha'añ Estudio

Tsa' cha' tsijibtesʌnti jiñi xuc'ul bʌ t'añ

¹ Lac Yum tsi' su'be Moisés: —Chajpan cha'q'uejl xajlel lajal bʌ che' bajche' jiñi ñaxan bʌ, cha'añ mic ts'ijban ya' ti xajlel jiñi t'añ am bʌ ti ñaxan bʌ xajlel tsa' bʌ a top'o.

² Jiñi cha'añ chajpan a bʌ, cha'añ ijc'ʌl che' mi' sʌc'an ma' letsel ya' ti wits i c'aba' Sinaí. Yom ma' c'otel tic tojlel ya' ti' pam jiñi wits.

³ Mach yomic mi' letsel yam bʌ wiñic a wic'ot. Mi yomic mi' c'otelob ya' ti wits, mi tʌñʌme'ic, mi wacaxic yom mi' cha'leñob buc'bal ya' ti wits.

⁴ Moisés tsi' chajpa jiñi cha'q'uejl xajlel lajal bʌ che' bajche' jiñi ñaxan bʌ, tsa' ch'ojyi ti sʌc'ajel, tsa' letsi ya' ti wits i c'aba' Sinaí che' bajche' tsi' su'be lac Yum; tsi' ch'ʌmʌ majlel ti' c'ʌb jiñi cha'q'uejl xajlel.

⁵ Lac Yum tsa' ju'bi tilel ti tocal, ya'i tsa' ajñi yic'ot Moisés; ya'i tsi' yʌc'ʌ ti cʌjñel i c'aba'.

⁶ Lac Yum tsa' ñumi ti' tojel Moisés, tsi' yʌlʌ ti c'am bʌ t'añ: —¡Yumʌlon, Yumʌlon! p'ʌtʌl bʌ Dioson, cujil bʌ p'untaya, utson, jal mic mich'an, ca'bʌl c p'untaya yic'ot isujmlelon,

⁷ mic p'untan bajc'ʌl wiñicob x'ixicob, mic ñusan mulil, yic'ot jontolil, pero ma'añic mic ñusʌben i mul jiñi mu' bʌ i chʌn cha'leñob jontolil; mi cʌq'uen i tojob i mul tatʌlob, yic'ot i yalobilob, yic'ot i butsob, c'ʌlʌl ti' yuxlajmlel yic'ot ti' chʌnlajmlel i p'olbalob.

⁸ Che' jiñi Moisés ti ora jach tsi' ju'sa i jol ti lum, tsi' ch'ujutesa lac Yum,

⁹ tsi' yʌlʌ: —C Yum, mi isujm tsa'ix c taja i yutslel a pusic'al, yom ma' majlel ti ojlil quic'ot lojon. Come jiñi tejclum wen tsʌtsob i pusic'al, pero ñusʌbeñon lojon c jontolil yic'ot c mul lojon yic'ot ch'ʌmʌyon lojon che' bajche' a cha'añ bʌ.

I yʌxbentelob i yoj cha'añ dios tac am bʌ ti Canaán

¹⁰ Lac Yum tsi' yʌlʌ: Awilan, mi caj c mel jump'ejl xuc'ul bʌ t'añ ti' tojlel pejtelel a tejclum. Mi caj c mel bʌbʌq'uen tac bʌ, mach bʌ añic ba' ujtem ti yan tac bʌ pañimil, mi ti yan tac bʌ lum yic'ot mi caj i q'uelob pejtelel jiñi wiñicob x'ixicob c ñuclel ya' baqui añet, come wen bʌbʌq'uen jax mu' bʌ caj c mel ti a tojlel.

¹¹ Jac'ʌ jiñi mu' bʌ c su'beñet wʌle. Joñon mi caj c choc loq'uel ti la' tojlel jiñi amorreojob, jiñi cananeojob, jiñi heteojob, jiñi ferezeojob, jiñi heveojob, yic'ot jiñi jebuseojob.

¹² Cʌntan la' bʌ cha'añ ma'añic mi la' laj la' t'añ yic'ot jiñi wiñicob x'ixicob ya' ba' mi caj la' c'otel, cha'añ ma'añic mi la' tsajcʌbeñob i melbal.

¹³ Mi caj la' jembeñob i pulʌntib i majtañ i diosob, mi caj la' c'ʌsbeñob i yejtal i diosob yic'ot mi caj la' jisan i yejtal tac dios Asera.

¹⁴ Mach yomic mi caj la' ñucchocon la' bʌ cha'añ mi la' ch'ujutesan yam bʌ dios, come la' Yum mi caj i mich'leñetla. Joñon jach yom mi la' ch'ujutesañon.

¹⁵ Jiñi cha'añ mach yomic mi la' laj la' t'añ yic'ot jiñi xchumtʌlob año' bʌ ya' ti jiñi tejclum tac, ame che'ic mi cajelob ti leco bʌ q'uiñijel, che' mi' i ch'ujutesañob i diosob yic'ot che' mi yʌq'ueñob i majtañ, mi caj i pʌyetla majlel cha'añ mi la' c'uxben i we'el aq'uebilix bʌ i cha'añ i diosob;

¹⁶ yic'ot ame la' pʌyben xch'octaco' bʌ i yalobilob cha'añ i yijñam la' walobilob, che' mi' ch'ujutesañob i diosob jiñi xch'octacob, mi caj i xic'beñob la' walobilob cha'añ mi' ch'ujutesañob ja'el, che' jiñi la' walobilob mi caj i tsajcʌbeñob i diosob.

¹⁷ Mach yomic mi la' mel yan tac bʌ la' dios.

Q'uiñijel mu' bʌ i melob ti jujump'ejl ja'b

¹⁸ Yom mi la' ña'tan la' melben i q'uiñilel waj mach bʌ añic i levadurajlel; wucp'ejl q'uiñ yom mi la' c'ux waj mach bʌ añic i levadurajlel che' bajche' tsa' c su'beyetla, jiñʌch che' ti ojlil marzo, come jiñʌch ti jiñi uw che' bʌ tsa' loq'uiyetla ti Egipto.

¹⁹ Pejtelel jiñi ñaxan bʌ mi' yilan pañimil, c cha'añʌch; yic'ot ñaxan bʌ i yal la' wacax yic'ot la' tʌñʌme', pero yom i tat bʌ.

²⁰ Pero jiñi ñaxan bʌ i yal la' burro yom mi la' q'uex yic'ot tʌñʌme'; mi ma'añic mi la' q'uex, yom mi la' c'ʌsben i pat i bic'. Pejtelel ñaxan bʌ la' walobil yom mi la' q'uex yic'ot tʌñʌme', mi juntiquilic com mi' tilel ba'añon che' jochol i c'ʌb.

²¹ Wʌcp'ejl q'uiñ yom mi la' cha'len e'tel pero ti' wucp'ejlel q'uiñ yom mi la' c'aj la' wo yic'ot che' ti yorajlel mi la' cha'len pac' yic'ot che' ti' yorajlel mi la' cha'len c'ajbal, yom mi la' c'aj la' woj.

²² Che' ja'el yom mi la' melben i q'uiñilel semana tac, jiñʌch i q'uiñilel ñaxan tac bʌ i wut la' trigo mu' bʌ la' tuc', yic'ot i q'uiñilel la' c'ajbal ti' yujtibal ja'bil.

²³ Uxyajl ti jujump'ejl ja'b yom mi' tilel pejtelel wiñicob x'ixicob ti' tojlel la' Yum i Dios Israel.

²⁴ Come joñon mi caj c choc loq'uel jiñi tejclum tac am bʌ ti' tojel la' wut, yic'ot mi caj c ñuq'uesan la' lum. Ma'añic majqui mi caj i mulan la' lum che' uxyajl mi la' tilel ba'añon. Joñon la' Yumon la' Dios.

²⁵ Che' mi la' wʌq'ueñon tsʌnsʌbil bʌ c majtañ, mach yomic mi la' xʌ' otsan waj am bʌ i levadurajlel, mi yomic mi la' cʌyben i colojbal cha'añ ti yijc'ʌlal, che' ti yorajlel i q'uiñilel Pascua.

²⁶ Mi caj la' ch'ʌm majlel ya' ti yotot lac Yum jiñi ñaxan bʌ i wut la' pʌc'ʌb mu' bʌ la' tuc' ti la' lum. Mach yomic mi la' ch'ʌx jiñi alʌ chivo ti i ya'lel i chu' i ña'.

Moisés yic'ot jiñi mandar

²⁷ Lac Yum tsi' su'be Moisés: Ts'ijban jatet ili t'añ, come jiñʌch xuc'ul bʌ c t'añ mu' bʌ cʌq'ueñet yic'ot israelob.

²⁸ Ya'i tsa' ajñi Moisés yic'ot lac Yum cha'c'al q'uiñ yic'ot cha'c'al ac'ʌlel; ma'añic tsi' c'uxu waj, mi tsa'ic i japʌ ja'. Tsi' ts'ijba ti jiñi xajlel tac jiñi xuc'ul bʌ t'añ, jiñʌch lujump'ejl mandar.

²⁹ Ti wi'il tsa' ju'bi tilel Moisés ti jiñi wits i c'aba' Sinaí chucul i cha'añ jiñi cha'q'uejl xajlel ti' c'ʌb. Che' woli to i ju'bel tilel ya' ti wits, sʌcleman pejtelel i wut, come ti' caj tsi' cha'le t'añ yic'ot Dios, pero Moisés mach yujilic mi sʌcleman i wut.

³⁰ Aarón yic'ot pejtelel israelob tsi' q'ueleyob Moisés wen sʌcleman i wut, tsi' bʌc'ña i ñochtañob.

³¹ Jiñi cha'añ Moisés tsi' pʌyʌyob tilel Aarón yic'ot pejtelel jiñi ñuc taco' bʌ i ye'tel ya' ti' lumal, tsa' tiliyob, Moisés tsa' caji i pejcañob.

³² Ti wi'il tsa' tiliyob ba'añ Moisés pejtelel wiñicob x'ixicob, Moisés tsi' yʌq'ueyob jiñi mandar tac tsa' bʌ su'benti ti lac Yum ya' ti wits.

³³ Che' bʌ Moisés tsa' ujti i pejcañob jiñi wiñicob x'ixicob, tsi' moso i wut ti pisil.

³⁴ Che' ba ora mi' majlel Moisés ti' tojlel lac Yum cha'añ mi' pejcan, mi' loc'san jiñi pisil am bʌ ti' wut. Che' mi' loq'uel ya' ba'añ lac Yum, mi' su'beñob jiñi wiñicob x'ixicob jiñi cʌntesa tsa' bʌ aq'uenti ti Dios.

³⁵ Che' mi q'uelob jiñi wiñicob x'ixicob sʌcleman i wut Moisés, che' jiñi Moisés mi' cha' mos i wut ti jiñi pisil, jinto mi' cha' loc' che' mi' pejcan Dios.