Exodo 33 - Jiñi Tsiji' bʌ Wen T'añ cha'añ Estudio

Jiñi Tabernáculo ba' mi yujtel tempa bʌ

¹ Lac Yum tsi' su'be Moisés: —Cucu, letsen ilayi, jatet yic'ot ili tejclum tsa' bʌ a loc'sa ti' lumal Egipto. Cucula ya' ti jiñi lum tsa' bʌ c wʌn su'be Abraham yic'ot Isaac yic'ot Jacob che' tsa' c su'beyob: “Mi caj cʌq'uen la' p'olbal jiñi lum”.

² Joñon mi caj c chocbeñetla majlel jiñi ángel ti ñaxan ti la' tojlel. Mi caj c loc'sʌbeñetla jiñi cananeojob, yic'ot amorreojob, yic'ot heteojob, yic'ot ferezeojob, yic'ot heveojob, yic'ot jebuseojob.

³ Mi caj c pʌyetla ochel ti jiñi lum ba' ca'bʌl leche yic'ot cha'b, pero joñon ma'añic mi caj c tem letsel la' wic'ot, come wen tsʌtsob jax i pusic'al jiñi israelob, ame mic junyajlel jisañetla ya' ti bij.

⁴ Che' bʌ tsi' yu'biyob ili t'añ, jiñi wiñicob x'ixicob, wen ch'ijiyem tsa' cʌleyob. Ma'añic majqui lʌpbil i ch'ʌjlil,

⁵ come lac Yum tsa'ix i su'be Moisés: Yom ma' su'beñob jiñi israelob: “Wen tsʌts la' pusic'al. Muq'uic c majlel quic'otetla ti bij mic jisañetla ti ora jach. Wʌle loc'san la' ch'ʌjlil cha'añ mic ña'tan chuqui mi caj c melbeñetla”.

⁶ Jiñi israelob tsi' laj loc'sayob i ch'ʌjlil ya' ti wits i c'aba' Horeb.

⁷ Moisés tsi' wa'choco jiñi Tabernáculo ti' junwejlel tejclum, ñajt tsi' ch'ʌmʌ majlel. Tsi' yotsʌbe i c'aba', jiñi Tabernáculo ba' mi lac tempan lac bʌ yic'ot Dios. Majqui jach mi' sʌclan lac Yum mi' majlel ti' junwejlel tejclum ba' mi' tempañob i bʌ.

⁸ Che' baqui ora tsa' majli Moisés ya' ti Tabernáculo, ti' pejtelelob jiñi wiñicob tsa' wa'leyob ti jujuntiquil ya' ti' ti'ob i yotot cha'añ mi' q'uelob Moisés jinto tsa' c'ʌlʌl ochi ya' ti Tabernáculo.

⁹ Che' wolix ti ochel Moisés ya' ti otot, tsa' ju'bi ti wa'tʌl ya' ti' tojel i ti' jiñi Tabernáculo, jump'ejl wa'al bʌ tocal, cha'añ mi' pejcañob i bʌ lac Yum yic'ot Moisés.

¹⁰ Che' bʌ jiñi wiñicob, x'ixicob tsi' q'ueleyob cha'añ jiñi tocal mi' c'otel ti wa'tʌl ya' ti ti' jiñi Tabernáculo, ti pejtelel ora che' mi' q'uelob jiñi, ti jujuntiquil mi' ñocchocoñob i bʌ ti ti' i yotot cha'añ mi' ch'ujutesañob lac Yum.

¹¹ Lac Yum tsi' pejca Moisés ti' tojel i wut che' bajche' juntiquil wiñic mi' pejcan jiñi cʌñʌl bʌ i cha'añ. Che' jiñi tsa' cha' sujti Moisés ya' ti tejclum. Pero jiñi ch'itoñ Josué i yalobil Nun, jiñi x'e'tel i cha'añ, ma'añic tsa' sujti. Ya' tsa' cʌle ti Tabernáculo.

¹² Moisés tsi' su'be lac Yum: —Awilan jatet ma' su'beñon: “Pʌyʌ majlel ili wiñicob x'ixicob”. Pero maxto añic tsa' su'beyon majqui mi' majlel quic'ot. Jatet ma' wʌl: “Jatet cʌmbilet c cha'añ. Wolix j q'uelet ti' yutslel c pusic'al”.

¹³ Awilan, mi tsa' c taja i yutslel a pusic'al, mij c'ajtibeñet cha'añ ma' pʌsbeñon a bijlel, cha'añ mij cʌñet, cha'añ mic taj i yutslel a pusic'al ti pejtelel ora. Ña'tan ja'el jiñi tejclum a cha'añʌch.

¹⁴ Lac Yum tsi' jac'ʌ: —Joñon mi caj c majlel a wic'ot cha'añ ma' c'aj a wo.

¹⁵ Moisés tsi' jac'ʌ: —Mi ma'añic mi caj a majlel quic'ot, mach a loc'sañon lojon ilayi.

¹⁶ Mi ma'añic tsa' majliyet quic'ot lojon, ¿bajche' mi caj i ña'tañob yaño' bʌ mi tsa' pʌsbeyon lojon i yutslel a pusic'al? Mi tsa' majliyon lojon a wic'ot, che' jiñi tsiquil mach lajaloñic lojon che' bajche' yam bʌ wiñicob x'ixicob ti pañimil.

¹⁷ —Che' ja'el mi caj c mel ili tsa' bʌ a su'beyon, come tsa'ix c pʌsbeyet i yutslel c pusic'al. Mij cʌñet ti a c'aba' —Che' tsi' jac'be lac Yum jiñi Moisés.

¹⁸ Che' jiñi Moisés tsi' yʌlʌ: —A wocolic pʌsbeñon a ñuclel.

¹⁹ Lac Yum tsi' jac'ʌ: —Pejtelel cutslel mi caj i tsictiyel ti a wut. Mi caj c tsictesan j C'aba' ti a tojlel, Joñoñʌch a Yumon. Mi caj c p'untan majqui com c p'untan. Uts mi caj j q'uel jiñi com bʌ j q'uel ti uts'at.

²⁰ Mach mejlic a q'uel c wut, come ma'añic mi mejlel i q'uelon wiñic. Mi tsi' q'ueleyon juntiquil mux i chʌmel.

²¹ Ti wi'il lac yum tsi' yʌlʌ: —Q'uele jump'ejl ajñibʌl tic t'ejl. Jatet mi caj a wajñel ya' ti' pam jiñi xajlel,

²² che' mi' c'axel c ñuclel, joñon mi caj cotsañet ya' ti' jap xajlel, yic'ot mi caj c moset tij c'ʌb c'ʌlʌl jinto mic ñumel.

²³ Ti wi'il mi caj c loc'san j c'ʌb. Mi caj a q'uel c pat, pero ma'añic mi caj a q'uel c wut.