Exodo 31 - Jiñi Tsiji' bʌ Wen T'añ cha'añ Estudio

I pʌyol Bezaleel yic'ot Aholiab

¹ Lac Yum tsi' pejca Moisés, tsi' su'be:

² Awilan tsa'ix c yajca ti' c'aba' Bezaleel i yalobil Uri, i yalobil bʌ Hur, i p'olbal bʌ Judá.

³ Joñon tsa' c bujt'esa ti Ch'ujul bʌ c Ch'ujlel, tsa' cʌq'ue i ña'tʌbal yic'ot i ch'ejlel, yic'ot pejtelel chuqui tac mi' ña'tan yic'ot chuqui tac mi' mel,

⁴ cha'añ mi' ña'tan bajche' yom mi' c'ʌjñel tac jiñi oro yic'ot plata yic'ot bronce,

⁵ cha'añ mi' yʌq'ueñ i t'ojlʌwib yic'ot i ts'ijbal xajlel tac, yic'ot ti' juc'ol tac te' cha'añ mi' mel pejtelel jujunchajp e'tel tac.

⁶ Tsa' c pʌyʌ ja'el Aholiab i yalobil Ahisamac, loq'uem bʌ ti' p'olbal Dan. Che' ja'el tsa' cʌq'ueyob i ña'tʌbal yic'ot i ch'ejlel i pusic'al wiñicob, cha'añ mi' melob pejtelel chuqui tsa' bʌ c su'beyet.

⁷ Jiñi yom bʌ melol jiñʌch Tabernáculo, yic'ot jiñi Arca yic'ot i majc jiñi Arca, yic'ot pejtelel mu' bʌ i c'ʌjñel ya' ti Tabernáculo;

⁸ jiñi mesa, yic'ot pejtelel chuqui tac mi' c'ʌjñel, yic'ot i ts'ʌjbib c'ajc melbil bʌ ti oro yic'ot pejtelel jiñi mu' bʌ i c'ʌjñel, yic'ot i pulʌntib pom,

⁹ yic'ot jiñi pulʌntib cha'añ pulbil bʌ c majtañ yic'ot pejtelel mu' bʌ i c'ʌjñel, yic'ot i yajñib ja' yic'ot i buchlib,

¹⁰ yic'ot i pislelob cha'añ e'tel, che' bajche' ch'ujul bʌ i pislel Aarón, jiñi motomaj yic'ot i pislel ja'el i yalobilob mu' bʌ i c'ʌñob i melob i ye'tel ti motomaj,

¹¹ yic'ot mi caj i chajpañob jiñi olivo aceite cha'añ bojñibʌl yic'ot jiñi xojocña bʌ pom, cha'añ mi' c'ʌjñel ya' ti Ch'ujul bʌ Ajñibʌl. Jiñobʌch jiñi mu' bʌ caj i laj melob che' bajche' tsa' c su'beyet.

I q'uiñilel c'aj-o

¹² Lac Yum tsi' cha' pejca Moisés, tsi' su'be:

¹³ Jatet mi caj a su'ben jiñi israelob che' bajche' iliyi: “Isujm yom mi la' q'uel ti ñuc i q'uiñilel tac c'aj-o, come jiñʌch yom bʌ mi la' ña'tan jatetla yic'ot pejtelel la' p'olbal, cha'añ mi la' ña'tan cha'añ joñoñʌch la' Yumon tsa' bʌ cotsayetla tic cha'añ.

¹⁴ Jiñi cha'añ yom mi la' p'is ti la' wenta i yorajlel c'aj-o, come ch'ujulʌch ti la' tojlel; jiñi mu' bʌ i q'uel ti lolom i q'uiñilel c'aj-o, mi caj i tsʌnsʌntel. Majqui jach mi' cha'len e'tel ti ili q'uiñ, mi caj i tsʌnsʌntel.

¹⁵ Wʌcp'ejl jach q'uiñ yom mi la' cha'len e'tel, pero che' ti wucp'ejlel q'uiñ jiñʌch i yorajlel c'aj-o yajcʌbil bʌ c cha'añ. Majqui jach mi' cha'len e'tel ti' q'uiñilel c'aj-o, mi caj i chʌmel.

¹⁶ Yom mi' q'uelob ti ñuc jiñi israelob i q'uiñilel c'aj-o, che'ʌch yom mi' chʌn melob ti pejtelel ora i p'olbalob Israel che' bajche' jump'ejl xuc'ul bʌ t'añ.

¹⁷ Jiñʌch junchajp t'añ mu' bʌ caj i yajñel tic tojlel yic'ot ti' tojlel israelob ti pejtelel ora, come wʌcp'ejl jach q'uiñ tsa' c mele jiñi panchan yic'ot pañimil, ixcu che' ti' wucp'ejlel q'uiñ ma'añix tsa' c cha'le e'tel, tsa' j c'aja co.”

5. JIÑI ALɅ TAT WACAX MELBIL BɅ TI ORO. I TSIJIBTESɅNTEL XUC'UL BɅ T'AÑ ( 31.18—34.35 ) Jiñi alʌ tat wacax melbil bʌ ti oro

¹⁸ Che' bʌ lac Yum tsa' ujti i pejcan Moisés ya' ti wits i c'aba' Sinaí, tsi' yʌq'ue Moisés cha'q'uejl xajlel ba' ts'ijbubil i T'añ ti' c'ʌb Dios.