Exodo 30 - Jiñi Tsiji' bʌ Wen T'añ cha'añ Estudio

Jiñi pulʌntib pom

¹ Che' ja'el yom ma' mel jump'ejl pulʌntib ba' ma' pule' pom; yom melbil ti acacia te'.

² Yom ojlil metro i tamlel ti jujunwejl yic'ot ojlil metro i xujc tac; yom junlajal i tamlel ti' chʌnwejlel yic'ot jump'ejl metro i chañlel; jiñi i xulub tac ya' jach yom mi' tem loq'uel ti jiñi pulʌntib.

³ Yom mi la' tep' ti oro ti pejtelel, i pam yic'ot i xujc, yic'ot ti' joytʌlel yic'ot i xulub tac. Mi caj a wʌq'uen i ch'ʌjlil melbil bʌ ti oro ti' joytʌlel i ti' jiñi pulʌntib.

⁴ Ya' ti' ye'bal i ti'il ti' cha'wejlel i xujc yom mi la' wʌc' cha'p'ejl xotol tac bʌ melbil bʌ ti oro. Jiñʌch cha'añ mi la' juc ochel jiñi bara che' mi la' ch'ʌm majlel.

⁵ Yom mi la' mel jiñi bara ti acacia te'. Yom tep'bil ti oro ja'el.

⁶ Yom mi la' wʌc' jiñi pulʌntib ti' tojel jiñi joc'ol bʌ pisil mu' bʌ i mʌctañ jiñi Arca ba' mi' lojtel jiñi lujump'ejl mandar, ya'ʌch ti' tojel i majc jiñi Arca, ba' mi caj lac taj lac bʌ.

⁷ Che' ti jujump'ejl sʌc'ajel che' ba' ora Aarón mi' sujcun jiñi lámpara, mi caj i pul pom mu' bʌ i yʌc' i yujts'il ya' ti pulʌntib.

⁸ Che' bʌ Aarón mi tsuc' jiñi lámpara ti ic'ajel, yom ja'el mi' pul jiñi pom; jiñʌch yom bʌ mi la' mel ti pejtelel ora tic tojlel, jatet yic'ot la' walobilob.

⁹ Mach yomic mi la' wʌc' pom ti jiñi pulʌntib, mi majtañʌlic mu' bʌ i laj pulel, mi yam bʌ majtañʌl mach bʌ añic tsa' c su'beyet, mi yomic ma' mul jiñi pulʌntib ti lʌmʌl bʌ majtañʌl.

¹⁰ Jiñi Aarón, cojach junyajl ti jump'ejl ja'b mi' caj i yʌc' majtañʌl cha'añ mulil; mi caj i c'ʌmben i ch'ich'el jiñi majtañʌl cha'añ mi' bomben ya' ti xulub jiñi pulʌntib, cha'añ i tojol mulil; cojach junyajl ti jujump'ejl ja'b mi caj i yujtel ti ili pulʌntib cha'añ i ñusʌntel mulil, che'ʌch mi caj i melob la' p'olbalob ti pejtelel ora. C'ax ch'ujul ili pulʌntib ti' tojlel lac Yum.

I tojol cha'añ mi' loq'uel ti libre

¹¹ Lac Yum tsi' pejca ja'el Moisés, tsi' su'be:

¹² “Che' ma' tsic jiñi israelob cha'añ ma' ña'tan bajche' c'amelob, ti jujuntiquil mi caj i yʌq'ueñob lac Yum i tojol che' mi' yochelob ti juñ cha'añ ma'añic mi' tajob chʌmel cha'añ ti' caj woli i tsijquelob.

¹³ Jiñi mu' bʌ caj i yʌc'ob jiñi tsa'ix bʌ tsijquiyob, jiñʌch: jo'p'ejl gramo sʌsʌc taq'uiñ che' bajche' mi' c'ʌjñel ya' ti ch'ujul bʌ ajñibʌl. Jiñi jump'ejl siclo jiñʌch junc'al sʌsʌc taq'uiñ. Jiñi lujump'ejl sʌsʌc taq'uiñ jiñʌch i majtañ lac Yum.

¹⁴ Pejtelel wiñicob mu' bʌ i tsijquelob, añobix bʌ junc'al i ja'bilel c'ʌlʌl ti jiñi ñoxobix bʌ, mi caj i yʌq'ueñob i majtañ lac Yum.

¹⁵ Jiñi wen chumul bʌ yic'ot jiñi p'ump'un bʌ, junlajal jach mi caj i yʌc'ob ojlil sʌsʌc taq'uiñ cha'añ i majtañ lac Yum cha'añ mi' ñusʌbentelob i mul.

¹⁶ Mi caj a ch'ʌmbeñob jiñi taq'uiñ pejtelel israelob mu' bʌ i yʌc'ob cha'añ i tojol i mul, mi caj a wʌc' cha'añ mi' c'ʌjñel ti Tabernáculo ba' mi la' tempan la bʌ; jiñi ofrenda jiñʌch cha'añ mi chʌn ña'tañob jiñi israelob ti' tojlel lac Yum, cha'añ tsa' ñusʌbentiyob i mul.”

Jiñi ts'ajquibil bʌ i yajñib ja' melbil bʌ ti bronce

¹⁷ Lac Yum tsi' cha' su'be Moisés, tsi' yʌlʌ:

¹⁸ Che' ja'el mi caj a mel i yajñib ja' yic'ot i c'ʌclib melbil bʌ ti bronce cha'añ pocoñibʌl. Mi caj a wʌc' ti' xinlʌpʌl ti jiñi Tabernáculo yic'ot ti jiñi pulʌntib, yic'ot mi caj a but' ti ja'.

¹⁹ Aarón yic'ot i yalobilob mi caj i c'ʌñob cha'añ mi' pocob i c'ʌb yic'ot i yoc.

²⁰ Wersa yom mi' pocob i c'ʌb yic'ot i yoc che' jajayajl mi' yochelob ya' ti Tabernáculo ba' mi la' tempan la' bʌ yic'ot che' mi' lʌc'tesañob i bʌ ya' ti' t'ejl pulʌntib cha'añ mi' pulbeñoñob c majtañ; che' jiñi ma'añic mi caj i chʌmelob.

²¹ Yomʌch mi' pocob i yoc i c'ʌb cha'añ ma'añic mi' chʌmelob. Che'ʌch yom mi caj i chʌn melob ti pejtelel ora yic'ot i p'olbalob ti' lajm ti' lajm.

Jiñi olivo aceite yic'ot jiñi ch'ujul bʌ pom

²² Lac Yum tsi' chʌn pejca Moisés, tsi' su'be:

²³ Mi caj a yajcan xojocña tac bʌ i yujts'il: che' bajche' wen bʌ mirra, yom wʌcp'ejl kilo i yalel yic'ot uxp'ejl kilo xojocña bʌ canela; yic'ot uxp'ejl kilo xojocña bʌ xte' jam;

²⁴ yic'ot wʌcp'ejl kilo xojocña bʌ i pat casia che' bajche' añ jiñi p'isoñib ya' ti ch'ujul bʌ ajñibʌl yic'ot ojlil i chʌmp'ejl litro olivo aceite.

²⁵ Yom ma' xʌbulan iliyi cha'añ ma' mel jiñi olivo aceite mu' bʌ i c'ʌjñel cha'añ bojñibʌl, jiñʌch ñumen wen xojocña bʌ i yujts'il, che' bajche' mi chajpañob jiñi mu' bʌ i melob perfume. Jiñʌch olivo aceite ch'ujul bʌ cha'añ bojñibʌl.

²⁶ Mi caj a c'ʌn jiñi olivo aceite cha'añ ma' mul jiñi Tabernáculo ba' mi la' tempan la bʌ yic'ot jiñi Arca ba' lotbil jiñi mandar,

²⁷ yic'ot jiñi mesa yic'ot pejtelel mu' bʌ i c'ʌjñel tac yic'ot ba' mi' ts'ʌjbel c'ajc yic'ot i yajñib olivo aceite yic'ot i pulʌntib pom,

²⁸ yic'ot jiñi pulʌntib cha'añ majtañʌl yic'ot pejtelel chuqui tac mi' c'ʌjñel, yic'ot i yajñib ja' temel yic'ot i buchlib.

²⁹ Che'ʌch mi caj a sʌc-esan cha'añ wen ch'ujul mi' yajñel; majqui jach mi' tʌl pejtelel jiñi ch'ujul tac bʌ mi caj i sʌc-esʌntel.

³⁰ Mulu ja'el ti olivo aceite jiñi Aarón yic'ot i yalobilob cha'añ ma' sʌc-esañob cha'añ mi' melbeñoñob que'tel ti motomaj.

³¹ Mi caj a su'beñob jiñi israelob ili t'añ: “Iliyi jiñʌch jiñi ch'ujul bʌ olivo aceite cha'añ mi' c'ʌjñel cha'añ bojñibʌl ti' tojlel la' p'olbalob ti' lajm ti' lajm ti pejtelel ora.

³² Mach yomic mi' c'ʌjñel jiñi olivo aceite cha'añ mi' mujlel yam bʌ wiñic, mi yomic mi' chajpʌntel yam bʌ olivo aceite lajal bʌ i xajb yilal; come ch'ujulʌch, jiñi cha'añ yom ma' q'uel ti ch'ujul.

³³ Majqui jach mi' mel xojocña bʌ perfume lajal bʌ bajche' iliyi, o mi tsa' c'ʌjñi ti' tojlel joch wiñic mi caj i chojquel loq'uel ti' tejclum.”

³⁴ Lac Yum tsa' to i cha' su'be Moisés: Yom ma' ch'ʌm xojocña tac bʌ i yujts'il, jiñʌch estacte yic'ot i pat te' yic'ot xojocña bʌ gálbano yic'ot xojocña bʌ pom; yom junlajal i p'isol.

³⁵ Mi caj a c'ʌn pejtelel iliyi ti' melol jiñi perfume che' bajche' jiñi yujil bʌ melol, wen xojocña bʌ pom wen xajc'ubil bʌ, sʌc bʌ yic'ot ch'ujul bʌ.

³⁶ Yom ma' juch' ts'ita', yom wen chʌmeñ mi' cʌlel cha'añ ma' wʌc' ti' tojel jiñi Arca am bʌ ti Tabernáculo ba' mi la' tempan la' bʌ, ya' ba' mi caj c pʌsbeñet c bʌ. Pejtelel iliyi c'ax ch'ujulʌch.

³⁷ Mach yomic ma' mel yam bʌ perfume lajal bʌ bajche' ili mu' bʌ caj a mel; yom ma' q'uel ti ch'ujul come c cha'añʌch.

³⁸ Majqui jach mi' bajñel mel yam bʌ perfume lajal bʌ che' bajche' iliyi cha'añ mi' sic', mi caj i chojquel loq'uel ti' lumal.