Exodo 3 - Jiñi Tsiji' bʌ Wen T'añ cha'añ Estudio

Dios tsi' pʌyʌ Moisés

¹ Moisés tsa' caji cʌntʌben i tʌñʌme' i ñij-al i c'aba' Jetro. Jiñʌch motomaj am bʌ ti Madián, tsi' pʌyʌ majlel jiñi tʌñʌme' ba'añ colem bʌ i tiquiñal pañimil ya' ba' mi' bʌjlel q'uiñ, tsa' c'oti ya' ti Horeb jiñi wits yajcʌbil bʌ i cha'añ Dios.

² I yángel lac Yum tsi' pʌsʌ i bʌ ba'añ Moisés ya' ba' woli ti lejmel c'ajc ba' wa'al alʌ te'. Tsi' q'uele woli ti lejmel jiñi alʌ te', pero ma'añic woli' pulel.

³ Jiñi cha'añ Moisés tsi' yʌlʌ: “Mi caj c majlel j q'uel ili woli bʌ c pʌsbentel chucoch ma'añic tsa' puli jiñi alʌ te'.”

⁴ Che' bʌ tsi' q'uele lac Yum cha'añ woli' lʌc'tesan majlel i bʌ Moisés cha'añ mi' q'uel jiñi alʌ te', che' jiñi Dios tsi' cha'le t'añ ya' ti jiñi alʌ te', tsi' yʌlʌ: —¡Moisés, Moisés! Tsi' jac'ʌ: —Wʌ'añon.

⁵ Dios tsi' yʌlʌ: —Mach a lʌc'tesan a bʌ; loc'san a warach ti a woc, come ch'ujul jiñi lum ba' wa'alet.

⁶ Tsi' cha' alʌ: —Joñon i Dioson a tat, i Dioson Abraham, i Dioson Isaac, i Dioson Jacob. Jiñi cha'añ Moisés tsi' mʌcʌ i wut come tsi' bʌc'ña i q'uel Dios.

⁷ Lac Yum tsi' cha' alʌ: —Tsa'ix j q'uelbeyob i wocol c cha'año' bʌ ti Egipto. Tsa'ix cu'bibeyob i yoñel cha'añ jiñi xq'uel e'telob, tsa'ix j cʌmbeyob i wocol.

⁸ Tsa'ix ju'biyon tilel cha'añ mic loc'sañob ti jiñi lum cha'añ mic pʌyob ochel ti ñuc bʌ yic'ot ti wen bʌ lum ba'añ ca'bʌl leche yic'ot cha'b. Jiñʌch i lumal cananeojob, yic'ot heteojob, yic'ot amorreojob, yic'ot ferezeojob, yic'ot heveojob yic'ot jebuseojob.

⁹ Wʌle tsa'ix cu'bibe i yoñel israelob. Tsa'ix j q'uele bajche' woli' tic'lañob israelob jiñi egiptojob.

¹⁰ La', mi caj c choquet majlel ba'añ faraón cha'añ ma' pʌy loq'uel ti Egipto jiñi israelob, come c cha'añob.

¹¹ Pero Moisés tsi' jac'be Dios: —¿Majquiyon cha'añ mic majlel ba'añ faraón cha'añ mic pʌy loq'uel ti Egipto jiñi israelob?

¹² Dios tsi' jac'be: —Mi caj cajñel a wic'ot; mi caj c pʌs c p'ʌtʌlel ti a tojlel cha'añ mi' tsictiyel cha'añ chocbilet majlel c cha'añ: che' bʌ tsa'ix a pʌyʌ loq'uel ti Egipto jiñi wiñicob x'ixicob, mi caj la' ch'ujutesañon ti ili wits.

¹³ Moisés tsi' su'be Dios: —Che' mij c'otel ba'añ israelob, che' mic su'beñob: “Tsa'ix i chocoyon tilel i Dios la' tat”, mi caj i c'ajtibeñoñob: “¿Chuqui i c'aba'?” Che' jiñi ¿bajche' cʌlʌ mic jac'beñob?

¹⁴ Dios tsi' su'be Moisés: —“Joñoñʌch Jiñi Am Bʌ.” Tsi' cha' alʌ: —Che' yom ma' su'ben israelob: “Jiñi mu' bʌ i su'b i bʌ ti Joñoñʌch tsa'ix i chocoyon tilel ba'añetla.”

¹⁵ Che' ja'el Dios tsi' su'be Moisés: —Che'ʌch mi caj a su'ben israelob: “Lac Yum, i Dios la' tat, i Dios Abraham, i Dios Isaac, yic'ot i Dios Jacob, tsa'ix i chocoyon tilel ba'añetla.” Jiñʌch j c'aba' ti pejtelel ora; che'ʌch yom mic pejcʌntel ti pejtelel ora.

¹⁶ Cucu, tempan jiñi xñoxob ti Israel, su'beñob: “Jiñi lac Yum, i Dios la' tat, i Dios Abraham, Isaac yic'ot Jacob, tsa'ix i pʌsʌ i bʌ ba'añon, tsi' su'beyon: Isujm tsa'ix c jula'tayetla, tsa'ix j q'uele che' bajche' woli la' tic'lʌntel ti Egipto.

¹⁷ Tsa'ix cʌq'ueyetla c t'añ: mi caj c loc'sañetla ti Egipto ba' woliyetla ti wocol, mi caj c pʌyetla ochel ti' lum cananeojob, heteojob, amorreojob, ferezeojob, heveojob yic'ot jebuseojob, ti jump'ejl lum ba'añ ca'bʌl leche yic'ot cha'b.”

¹⁸ Mi caj i jac'ob a t'añ; jatet yic'ot xñoxob ti Israel mi caj la' majlel ba'añ jiñi rey ti Egipto, mi caj la' su'ben: “C Yum lojon, i Dios hebreojob, tsa'ix tili i pejcañon lojon; jiñi cha'añ mij c'ajtibeñet lojon: La' majlicon lojon uxp'ejl q'uiñ ya' ti colem bʌ i tiquiñal pañimil cha'añ mic ch'ujutesan lojon c Yum Dios.”

¹⁹ Cujil ma'añic mi caj i yʌc' i t'añ jiñi rey ti Egipto, jinto che' tsa'ix c pʌsbe c p'ʌtʌlel.

²⁰ Pero joñon mi caj c pʌsben i p'ʌtʌlel j c'ʌb, mi caj cʌq'ueñob wocol jiñi egiptojob, mi caj c pʌsbeñob c p'ʌtʌlel ti ñuc tac bʌ c melbal, che' jiñi ti wi'il mi caj i choquetla majlel.

²¹ Mi caj c ñijcʌbeñob i pusic'al jiñi egiptojob cha'añ mi' q'ueletla ti uts'at, cha'añ mi' yʌq'ueñet la' majtañ. Che' mi la' majlel, mach to'ol che'ic jach mi caj la' majlel.

²² Jiñi x'ixicob ti Israel, ti jujuntiquilob mi caj i c'ajtiñob i majtañ ti' tojlel i pi'ʌlob ti chumtʌl, yic'ot i jula' am bʌ ti yotot, mi caj i yʌq'ueñtelob pisil yic'ot i ch'ʌjlil melbil bʌ ti plata yic'ot oro, mi caj la' xojbeñob la' walobilob, che' jiñi pobre mi caj i cʌytʌlob jiñi egiptojob.