Exodo 29 - Jiñi Tsiji' bʌ Wen T'añ cha'añ Estudio

I sʌc-esʌntel Aarón yic'ot i yalobilob

¹ Jiñʌch mu' bʌ caj a mel cha'añ ma' sʌc-esan Aarón yic'ot i yalobilob cha'añ mi' yochelob tic motomaj; yajcan juncojt alʌ i tat wacax yic'ot cha'cojt tat tʌñʌme', mach bʌ i p'ajomalic;

² chajpan waj mach bʌ añic i levadurajlel yic'ot pan mach bʌ añic i levadurajlel xajc'ubil bʌ yic'ot olivo aceite yic'ot galleta mach bʌ añic i levadurajlel, bombil bʌ ti olivo aceite; mi caj a mel ti wen juch'bil bʌ trigo.

³ Mi caj a wʌc' jiñi waj ti jump'ejl chiquib cha'añ ma' wʌq'ueñon yic'ot jiñi alʌ tat wacax yic'ot jiñi cha'cojt tat tʌñʌme'.

⁴ Mi caj a pʌy majlel Aarón yic'ot i yalobilob ti ti' jiñi Tabernáculo ba' mi' tempañob i bʌ cha'añ mi' pocob i bʌ.

⁵ Che' jiñi mi caj a ch'ʌm jiñi bujcʌl tac cha'añ ma' lʌpben Aarón yic'ot ma' lʌpben jiñi efod yic'ot i pislel i tajñ, mi caj a cʌchben yic'ot i cʌjchil jiñi efod.

⁶ Mi caj a wʌq'uen i pixintib i jol, ya' ti' pam mi caj a ñʌp'ben jiñi ch'ujul bʌ alʌ wechel bʌ i yejtal melbil bʌ ti oro.

⁷ Ti wi'il mi caj a ch'ʌm jiñi olivo aceite mu' bʌ i c'ʌjñel tac ya' ti Tabernáculo cha'añ ma' mulben ti' jol.

⁸ Che' ja'el mi caj a pʌybeñob tilel i yalobilob cha'añ ma' lʌpbeñob jiñi pʌl bʌ i bujc.

⁹ Mi caj a cʌchbeñob i cajchiñʌc' Aarón yic'ot i yalobilob yic'ot mi caj a cʌchbeñob i pixintib i jol ti jujuntiquil, che'ʌch mi caj a sʌc-esañob Aarón yic'ot i yalobilob cha'añ mi yochelob ti motomaj ti pejtelel ora.

¹⁰ Ti wi'il mi caj a pʌy majlel jiñi alʌ tat wacax ba'añ jiñi Tabernáculo ba' mi' tempañob i bʌ, jiñi Aarón yic'ot i yalobilob mi caj i yʌc'ob i c'ʌb ya' ti' jol jiñi alʌ tat wacax.

¹¹ Ti wi'il mi caj a tsʌnsan jiñi alʌ tat wacax ti' tojlel lac Yum ya' ti ti' jiñi Tabernáculo ba' mi' tempañob i bʌ.

¹² Mi caj a ts'aj i yal a c'ʌb ti' ch'ich'el jiñi alʌ tat wacax cha'añ ma' bomben i xulub tac jiñi pulʌntib, ixcu i colojbal jiñi ch'ich' yom ma' bec' ya' ti ye'bal jiñi pulʌntib.

¹³ Che' ja'el mi caj a ch'ʌmben i lewil ñotol tac bʌ ti' soyta' yic'ot am bʌ ti' pam i yolmal yic'ot am bʌ ti' cha'p'ejlel i cuchi'tun, mi caj a pul ya' ti pulʌntib.

¹⁴ Pero i bʌc'tal jiñi alʌ tat wacax yic'ot i pʌchʌlel yic'ot i ta', yom ma' pul ti c'ajc ti' junwejlel jiñi tejclum, come jiñʌch majtañʌl cha'añ mulil.

¹⁵ Che' ja'el mi caj a pʌy tilel juncojt tat tʌñʌme', jiñi Aarón yic'ot i yalobilob la' i yʌc'ob i c'ʌb ya' ti' jol jiñi tat tʌñʌme'.

¹⁶ Tsʌnsan jiñi tat tʌñʌme', mi caj a tsijcʌben i ch'ich'el ti' joytʌlel jiñi pulʌntib.

¹⁷ Bic'ti t'ojo jiñi tat tʌñʌme', pocben i soyta' yic'ot i yoc; che' jiñi ac'ʌ ya' ba'añ jiñi bic'ti t'ojbilix bʌ i bʌc'tal ya' ba'añ i jol ja'el.

¹⁸ Ti wi'il mi caj a pul pejtelel jiñi tat tʌñʌme' ya' ti' pam jiñi pulʌntib. Jiñʌch yom bʌ mi' pulel xojocña bʌ i majtañ lac Yum. Jiñʌch majtañʌl pulbil bʌ i cha'añ lac Yum.

¹⁹ Ti wi'il mi caj a ch'ʌm jiñi yam bʌ tat tʌñʌme', jiñi Aarón yic'ot i yalobilob mi caj i c'ʌcchocoñob i c'ʌb ti' jol jiñi tat tʌñʌme'.

²⁰ Mi caj a tsʌnsan jiñi tat tʌñʌme', mi caj a ch'ʌmben i ch'ich'el ti a c'ʌb cha'añ ma' bomben ti' ñoj bʌ i c'unlel i chiquin Aarón, yic'ot ja'el ti' ñoj bʌ i c'unlel i chiquin i yalobilob. Yom ma' bombeñob ja'el ñoj bʌ i ña'al i c'ʌb yic'ot ñoj bʌ i ña'al i yoc yic'ot mi caj a tsijcan i colojbal jiñi ch'ich' ti' joytʌlel jiñi pulʌntib.

²¹ Yom ma' c'ʌn jiñi ch'ich' am bʌ ti pulʌntib yic'ot jiñi olivo aceite mu' bʌ i c'ʌjñel cha'añ sʌc-esaya, mi caj a tsijcan Aarón yic'ot i yalobilob temel yic'ot i pislelob. Che' jiñi sʌc-esʌbilix mi' cʌytʌl jiñi Aarón yic'ot i yalobilob che'ʌch ja'el i pislelob.

²² Ti wi'il mi caj a ch'ʌmben i lewil jiñi i tat tʌñʌme' yic'ot i lewil i ñej, yic'ot i lewil ñotol tac bʌ ti' soyta', yic'ot i lewil ñotol tac bʌ ti' yolmal, yic'ot ti' cha'p'ejlel i cuchi'tun temel yic'ot i lewil, yic'ot ñoj bʌ i ya', come jiñʌch i tat tʌñʌme' cha'añ sʌc-esaya.

²³ Ch'ʌmʌ ja'el jump'ejl colem bʌ caxlan waj yic'ot jump'ejl caxlan waj xajc'ubil bʌ ti olivo aceite, yic'ot jump'ejl galleta am bʌ ti chiquib mach bʌ añic i levadurajlel, jiñi ac'bil bʌ ti' tojlel Dios.

²⁴ Mi caj a wʌc' ti' pejtelel ti' c'ʌb Aarón yic'ot ti' c'ʌb i yalobilob. Che' jiñi mi caj a jʌmts'un che' bajche' majtañʌl jʌmts'ubil bʌ ti' tojlel lac Yum.

²⁵ Ti wi'il mi caj a ch'ʌmbeñob ti' c'ʌb cha'añ ma' pul ya' ti pulʌntib, temel yic'ot jiñi pulbil bʌ majtañʌl che' bajche' xojocña bʌ i yujts'il ti' tojlel lac Yum. Jiñʌch majtañʌl pulbil bʌ ti' tojlel lac Yum.

²⁶ Mi caj a ch'ʌmben i tajñ tat tʌñʌme' mu' bʌ i c'ʌjñel cha'añ sʌc-esaya, i cha'añ bʌ Aarón, mi caj a jʌmts'un, che' bajche' jʌmts'ubil bʌ i majtañ lac Yum. Jiñʌch mu' bʌ i ch'ʌm Aarón.

²⁷ Mi caj a loc'san i tajñ majtañʌl bʌ mu' bʌ i jʌmts'untel yic'ot i ya' tsa' bʌ ajq'ui cha'añ majtañʌl tsa' bʌ jʌmts'unti yic'ot tsa' bʌ loc'sʌnti ti tat tʌñʌme' tsa' bʌ c'ʌjñi ti sʌc-esʌntel Aarón yic'ot i yalobilob,

²⁸ come i cha'añʌch Aarón yic'ot i yalobilob, che' bajche' tsa' su'bentiyob israelob ti pejtelel ora, come jiñʌch yajcʌbil bʌ majtañʌl. Jiñʌch majtañʌl mu' bʌ i yʌc'ob jiñi israelob cha'añ mi' yʌq'ueñob wocolix i yʌlʌ lac Yum.

²⁹ Jiñi ch'ujul bʌ i bujc tac Aarón mi caj i yʌq'ueñtelob i yalobilob ti wi'il che' mi' ch'ʌmbeñob i ye'tel, mi caj i lʌpob cha'añ mi' sʌc-esʌntelob, cha'añ mi' wa'chocontelob ti motomaj.

³⁰ Jiñi i yalobil Aarón mu' bʌ caj i ch'ʌmben i ye'tel, wucp'ejl q'uiñ mi caj i lʌpben i pislel che' mu' to caj i yochel ya' ti Tabernáculo ba' mi' tempañob i bʌ cha'añ mi' majlel ti e'tel ya' ti Ch'ujul bʌ Ajñibʌl.

³¹ Mi caj la' ch'ʌmben i bʌc'tal jiñi tat tʌñʌme' tsa'ix bʌ yajcʌnti loq'uel, mi caj la' ch'ʌxben i bʌc'tal ti jump'ejl sʌc-esʌbil bʌ ajñibʌl.

³² Aarón yic'ot i yalobilob mi caj i c'uxbeñob i bʌc'tal jiñi tat tʌñʌme' yic'ot jiñi waj am bʌ ti' chiquib ya' ti ti' jiñi Tabernáculo ba' mi' tempañob i bʌ.

³³ Mi caj i c'uxob pejtelel tsa' bʌ ajq'ui cha'añ i tojol mulil tsa' bʌ c'ʌjñi cha'añ mi' wa'chocontelob ti ye'tel yic'ot cha'añ i sʌc-esʌntelob. Pero jiñi joch wiñic bʌ mach mejlic i c'ux come ch'ujulʌch.

³⁴ Jiñi mu' bʌ i colojbʌyel ti yijc'ʌlal jiñi we'elʌl yic'ot jiñi waj, yom mi la' pul, mach mejlix ti chʌn c'uxtʌl come ch'ujulʌch.

³⁵ Che'ʌch yom ma' mel ti' tojlel Aarón yic'ot i yalobilob che' bajche' tsa' c su'beyet; wucp'ejl q'uiñ yom cha'añ ma' sʌc-esañob.

³⁶ Ti jujump'ejl q'uiñ yom ma' tsʌnsan juncojt alʌ tat wacax cha'añ i tojol mulil; mi caj a sʌc-esan jiñi pulʌntib che' ma' wʌc' jiñi majtañʌl cha'añ mulil yic'ot mi caj a mul ti olivo aceite cha'añ sʌc mi yajñel.

³⁷ Wucp'ejl q'uiñ yom ma' chʌn ac' pulbil bʌ majtañʌl ya' ti pulʌntib cha'añ i sʌc-esʌntel, cha'añ sʌc mi yajñel; jiñʌch c'ax ch'ujul bʌ pulʌntib; majqui jach mi' tʌl jiñi pulʌntib ch'ujulʌch mi caj i majlel.

Jiñi majtañʌl tac ti jujump'ejl q'uiñ

³⁸ Jiñʌch chuqui yom bʌ ma' wʌc' ti pulʌntib: ti jujump'ejl q'uiñ yom cha'cojt tat tʌñʌme' am bʌ jump'ejl i ja'bilel, che'ʌch mi caj la' mel ti pejtelel ora.

³⁹ Jiñi juncojt tʌñʌme' mi caj a wʌc' che' ti sʌc'ajel, jiñi yam bʌ mi caj a wʌc' che' ti ic'ajel.

⁴⁰ Yic'ot ja'el jiñi ñaxan bʌ tʌñʌme' yom ma' wʌc' cha'p'ejl kilo wen juch'bil bʌ trigo xajc'ubil bʌ yic'ot jump'ejl litro aceite loq'uem bʌ ti wen pets'bil bʌ i wut olivo yic'ot yom jump'ejl litro i ya'lel ts'usub, cha'añ mi' mujlel jiñi majtañʌl.

⁴¹ I cha'cojtlel bʌ tʌñʌme' yom ma' wʌc' che' ti ic'ajel, lajal ma' mel che' bajche' ti sʌc'ajel, yic'ot lajal i xojocñʌyel cha'añ pulbil bʌ i majtañ a Yum.

⁴² Jiñʌch pulbil bʌ c majtañ mu' bʌ la' wʌq'ueñon ti jujump'ejl q'uiñ c'ʌlʌl ti' lajm ti' lajm la' p'olbal, mi caj la' wʌq'ueñon ti ti' jiñi Tabernáculo ba' mi la' tempan la' bʌ ya' baqui mic cajñel yic'otetla che' mic pejcañetla.

⁴³ Ya'i mi caj cajñel yic'otob jiñi israelob, jiñi Ajñibʌl mi caj i sʌc-esʌntel cha'añ c Ñuclel.

⁴⁴ Mi caj c sʌc-esan jiñi Tabernáculo ba' mi la' tempan la' bʌ yic'ot jiñi pulʌntib, che' ja'el mi caj a sʌc-esañob Aarón yic'ot i yalobilob cha'añ mi' melbeñoñob que'tel ti motomaj.

⁴⁵ Joñon mi caj c chumtʌl ti' tojlel jiñi israelob; mi caj cochel ti' Dios.

⁴⁶ Che' jiñi mi caj i ña'tañob cha'añ joñoñʌch i Yumoñob i Diosoñob tsa' bʌ c loc'sayob ti' lumal Egipto cha'añ mi cajñel quic'otob. Joñon i Yumoñob yic'ot i Diosoñob.