Exodo 28 - Jiñi Tsiji' bʌ Wen T'añ cha'añ Estudio

Che' bajche' yilal i pislel jiñi motomajob

¹ Yom ma' wa'chocon Aarón, jiñi a weran temel yic'ot i yalobilob, Nadab, Abiú, Eleazar, yic'ot Itamar cha'añ mi' coltañetob cha'añ mi' melbeñoñob que'tel ti motomaj ti' tojlel i yalobilob Israel.

² Mi caj a melben Aarón jiñi a wʌscun, ch'ujul bʌ i pislel, mu' bʌ i yʌc' ti q'uejlel ti ñuc yic'ot ti wen i t'ojol bʌ.

³ Yom ma' pejcañob pejtelel jiñi p'ip'o' bʌ i pusic'al wiñicob tsa' bʌ cʌq'ueyob i ña'tʌbal ti' melol wen tac bʌ e'tel cha'añ mi' melbeñob i pislel Aarón, cha'añ che' jiñi mi' mejlel i yʌc' i bʌ cha'añ mi' melbeñon que'tel che' bajche' motomaj.

⁴ Jiñi bujcʌl tac yom bʌ mi' melob jiñʌch iliyi: i pislel i tajñ, yic'ot i bujc i c'aba' efod yic'ot i bujc ñumen pʌl bʌ, yic'ot ñaxan bʌ i pislel joch'bil bʌ, yic'ot i cʌjchil i jol yic'ot i cajchiñʌc'. Mi caj i melbeñob a wʌscun Aarón yic'ot i yalobilob ch'ujul bʌ i pislelob yom bʌ mi' xojob cha'añ mi' melbeñoñob que'tel ti motomaj.

⁵ Yom mi caj i c'ʌñob oro, yʌjyʌx bʌ yic'ot chʌccojan bʌ yic'ot chʌchʌc bʌ pisil yic'ot wen jalbil bʌ lino.

⁶ Yom mi' mejlel i mʌjquil i tajñ jiñi motomaj ti oro, yʌjyʌx bʌ yic'ot chʌccojan bʌ yic'ot chʌchʌc bʌ pisil, yic'ot wen jalbil bʌ lino, yom wen i t'ojol mi' mejlel.

⁷ Yom cha't'ujm i cʌjchil cha'añ mi' laj bʌ cʌch ti' pat.

⁸ I cajchiñʌc' jiñi motomaj wen i t'ojol bʌ, yom melbil ti oro yic'ot ti yʌjyʌx bʌ yic'ot ti chʌccojan bʌ yic'ot ti chʌchʌc bʌ pisil yic'ot ti wen jalbil bʌ lino.

⁹ Mi caj a ch'ʌm cha'p'ejl xajlel i c'aba' ónice; ya'i mi caj a ts'ijban i c'aba'ob jiñi lajchʌnmojt i p'olbal jiñi Israel.

¹⁰ Yom ma' ts'ijban wʌcp'ejl c'aba'ʌl ti jiñi junq'uejl xajlel, yic'ot yam bʌ wʌcp'ejl c'aba'ʌl ya' ti yam bʌ junq'uejl xajlel. Ñaxan mi caj a ts'ijban i c'aba' jiñi ñaxan bʌ tsi' yila pañimil c'ʌlʌl ti jiñi wi'ilix bʌ.

¹¹ Yom ts'ijbubil jiñi c'aba'ʌl tac ti jiñi xajlel che' bajche' añ ti sello, mi caj a ts'ijban ti jiñi cha'q'uejl xajlel i c'aba'ob tac i yalobilob Israel; yom xotol tac bʌ ti oro cha'añ ma' lʌp ochel jiñi xajlel tac.

¹² Yom ma' wʌc' jiñi xajlel ti jujunwejl i quejlab, yom cʌchbil ya' ti' cujchil tac jiñi efod, cha'añ mi' chʌn ña'tʌntel i yalobilob Israel. Che'ʌch mi' caj i ch'ʌm majlel Aarón jiñi c'aba'ʌl tac ti' quejlab ya' ti' tojlel lac Yum cha'añ mi' chʌn ña'tʌntelob.

¹³ Mi caj a mel cha'p'ejl i joc'lib melbil bʌ ti oro

¹⁴ yic'ot cha't'ujm cadena ti puro oro yic'ot mi caj a jal cha'añ ma' cʌch ya' ti' joc'lib ya' ba' xotol tac.

¹⁵ Che' ja'el mi caj a mel jump'ejl i pislel i tajñ wen i t'ojol bʌ cha'añ meloñel; mi caj a mel che' bajche' jiñi efod melbil bʌ ti oro yic'ot ti yʌjyʌx bʌ yic'ot ti chʌccojan bʌ yic'ot ti chʌchʌc bʌ pisil yic'ot ti wen jalbil bʌ lino pisil.

¹⁶ Junlajal yom i colemlel yic'ot cha'lajm yom jiñi i pislel i tajñ, jujunñajb ti' joytʌlel.

¹⁷ Yom mi la' wʌq'uen chʌntsolom xajlel tac. Ti jiñi ñaxan bʌ tsolom, yom jump'ejl xajlel i c'aba' sárdica yic'ot topacio yic'ot carbunclo.

¹⁸ Ya' ti' cha'tsolomlel yom xajlel am bʌ i c'aba' esmeralda yic'ot zafiro yic'ot diamante.

¹⁹ Ya' ti' yuxtsolomlel yom xajlel am bʌ i c'aba' jacinto yic'ot ágata yic'ot amatista;

²⁰ ya' ti' chʌntsolomlel, yom xajlel am bʌ i c'aba' berilo yic'ot ónice yic'ot jaspe. Ti' pejtelel ili xajlel tac yom ñotbil tac ti oro.

²¹ Yom lajchʌmp'ejl jiñi xajlel ti' pejtelel, che' bajche' i c'aba' jiñi lajchʌntiquil i yalobilob Israel; yom ts'ijbubil i c'aba' jujuntiquil mi' cʌytʌl ti jujump'ejl xajlel che' lajal bajche' sello tac.

²² Mi caj a mel cha't'ujm jaxbil bʌ oro cha'añ i ch'ajñal i mʌjquil i tajñ i bujc.

²³ Mi caj a mel ja'el cha'xojt xotol tac bʌ ti oro cha'añ ma' wʌc' ti jujunwejl i tajñ jiñi bujcʌl.

²⁴ Yom ma' wʌc' cha't'ujm jiñi jaxbil bʌ oro ti jiñi cha'xojt xotol bʌ am bʌ ti jujunwejl i tajñ jiñi bujcʌl,

²⁵ i ñi' tac jiñi cha't'ujm jaxbil bʌ oro mu' bʌ i yʌjq'uel ya' ti xotol tac bʌ am bʌ ti jujunwejl i tajñ, yom ma' licchocoben ya' ti' cha'wejlel i quejlab jiñi bujcʌl ya' ti' tojel i wut.

²⁶ Mi caj a mel yam bʌ cha'xojt melbil bʌ ti oro cha'añ ma' wʌc' ti jujunwejl i bolsajlel jiñi bujcʌl ya' ti' mal jiñi bujcʌl am bʌ ti' ts'ejtʌlel jiñi efod.

²⁷ Mi caj a mel ja'el cha'xojt melbil bʌ ti oro cha'añ ma' wʌc' ya' ti' wex cha'añ i joc'lib i cujchil tac mu' bʌ i ñumel ti' quejlab jiñi bujcʌl c'ʌlʌl ba' chucbil jiñi wen jalbil bʌ i cajchiñʌc'.

²⁸ Cha'añ mi' laj bʌ cʌchob i bʌ i ye'bal i pislel tajñʌl yic'ot jiñi xotol tac bʌ am bʌ ti ye'bal jiñi bujcʌl, i c'aba' efod yom ma' c'ʌn jaxbil bʌ puy yʌjyʌx bʌ cha'añ ma' cʌch, cha'añ ma'añic mi' jit i bʌ jiñi bujcʌl.

²⁹ Che'ʌch mi caj i ch'ʌm majlel Aarón i c'aba'ob i yalobilob Israel ya' ti bujcʌl ti' tojel i pusic'al, che' mi' yochel ya' ti ch'ujul bʌ ajñibʌl, cha'añ mi' chʌn ña'tʌntel i p'olbal Israel ti' tojlel lac Yum.

³⁰ Mi caj a wotsan ya' ti' tajñ jiñi bujcʌl cha'añ bʌ meloñel cha'p'ejl xajlel i c'aba' Urim yic'ot Tumim, cha'añ mi yajñel ti' tojel i pusic'al Aarón che' mi' yochel ya' ba'añ lac Yum. Ya'i mi' caj i chʌn ch'ʌm majlel Aarón i c'aba'ob i yalobilob Israel ti' tojel i pusic'al jajayajl mi' yochel ba'añ lac Yum.

³¹ Mi caj a mel ti yʌjyʌx pisil pejtelel jiñi pʌl bʌ i bujc.

³² Ya' ti' yojlil am bʌ ti chañ, yom ñuc i ti', yic'ot yom joch'bil che' bajche' mi' joch'ob i bic' bujcʌl tac, cha'añ ma'añic mi' tsijlel.

³³ Ya' ti yoc jiñi pʌl bʌ yʌjyʌx bʌ i bujc, mi caj a wʌq'uen i ch'ʌjlil tac ti' joytʌlel i ti', che' bajche' ch'um ac' yʌjyʌx tac bʌ, chʌchʌc tac bʌ yic'ot chʌccojan tac bʌ yic'ot alʌ campana tac melbil bʌ ti oro.

³⁴ Yom jump'ejl alʌ campana melbil bʌ ti oro yic'ot jump'ejl ch'um ac'; xajbuctic yom ma' wʌc' majlel ti' joytʌlel i ti'.

³⁵ Aarón mi caj i xoj che' mi' mel i ye'tel; mi caj la' wu'bin che' mi' ñijcan i bʌ jiñi alʌ campana che' mi' yochel ya' ti Ch'ujul bʌ Ajñibʌl ba'añ lac Yum yic'ot che' mi' loq'uel, cha'añ ma'añic mi' chʌmel.

³⁶ Mi caj la' mel junq'uejl welel bʌ melbil bʌ ti oro cha'añ ma' ts'ijban ya'i: “Ch'ujul cha'añ lac Yum”.

³⁷ Mi caj a cʌch ti yʌjyʌx bʌ i ch'ajñal ya' ti' tojel i pam jiñi Aarón ya' ti' pixintib i jol.

³⁸ Che'ʌch mi caj i yajñel ti' pam Aarón, cha'añ mi' ch'ʌm majlel Aarón i mul israelob tsa' bʌ i tajayob che' bʌ tsi' yʌc'ʌyob ch'ujul bʌ majtañʌl tac. Yom mi' yajñel ti' pam Aarón ti pejtelel ora cha'añ mi tajob i yutslel i pusic'al lac Yum.

³⁹ Mi caj a jal jump'ejl pʌl bʌ bujcʌl ti wen bʌ lino yic'ot mi caj a mel jump'ejl i cʌjchil i jol ti wen bʌ lino; che' ja'el mi caj a mel jump'ejl i cajchiñʌc' wen joch'bil bʌ.

⁴⁰ I yalobilob Aarón, mi caj la' melbeñob pʌl bʌ i bujc yic'ot i cajchiñʌc' yic'ot i pixintib i jol mu' bʌ i yʌc' ti q'uejlel ti ñuc cha'añ i t'ojlʌwib.

⁴¹ Che'ʌch yom jiñi mu' bʌ a wʌq'ueñob i lʌp a wʌscun Aarón yic'ot i yalobilob; mi caj a mulob ti olivo aceite yic'ot mi caj a sʌc-esañob, cha'añ mi' melbeñoñob que'tel ti motomaj.

⁴² Mi caj a melbeñob i borwex ti lino bʌ pisil cha'añ mi lʌpob.

⁴³ Aarón yic'ot i yalobilob mi caj i lʌpob che' mi' yochelob ya' ti Tabernáculo ba' mi' tempañob i bʌ o che' mi' lʌc'tesañob i bʌ ya' ti pulʌntib, che' mi' cha'leñob i ye'tel ya' ti Ch'ujul bʌ Ajñibʌl, cha'añ ma'añic mi' tajob i mul cha'añ ma'añic mi' chʌmelob. Jiñʌch jiñi tic'ojel yom bʌ mi' jac'ob ti pejtelel ora yic'ot ti' tojlel i p'olbalob.