Exodo 27 - Jiñi Tsiji' bʌ Wen T'añ cha'añ Estudio

Jiñi pulʌntib melbil bʌ ti bronce

¹ Mi caj la' mel ja'el jump'ejl pulʌntib melbil bʌ ti acacia te', am bʌ cha'p'ejl metro yic'ot ojlil i tamlel yic'ot am bʌ cha'p'ejl metro yic'ot ojlil i xujc; joy lajal jach i ñuclel yic'ot jump'ejl metro yic'ot ojlil i chañlel.

² Mi caj la' melben i xulub ti' chʌmp'ejlel i xujc jiñi pulʌntib yic'ot mi caj la' tep' ti bronce yic'ot tsuyul yom ya' ti' xujc tac.

³ Mi caj la' mel ja'el poc' tac cha'añ mi la' c'ʌn la' jop loq'uel jiñi tañ yic'ot wechel tac bʌ e'tijibʌl yic'ot colem taza tac yic'ot ba' mi yajñel i ñich c'ajc tac yic'ot pejtelel yan tac bʌ mu' bʌ i c'ʌjñel, yom laj melbil ti bronce.

⁴ Che' ja'el yom mi la' mel chincholtic bʌ ti bronce. Ya' ti ti' jiñi chincholtic bʌ yom mi la' wʌc' chʌmp'ejl xotol tac bʌ melbil bʌ ti bronce.

⁵ Yom mi la' wʌc' ya' ti ye'bal ba' mʌcbil jiñi pulʌntib yic'ot yom mi yajñel ti yojlil jiñi pulʌntib jiñi chincholtic bʌ.

⁶ Mi caj a mel ja'el barajte' tac melbil bʌ ti acacia te' cha'añ mi' c'ʌjñel ti jiñi pulʌntib, yom tep'bil ti bronce.

⁷ Yom mi' yochel jiñi barajte' tac ya' ba'añ jiñi xotol tac bʌ, jiñi barajte' tac yom mi ñumel i ñi' ti jujunwejl tac jiñi pulʌntib, cha'añ mi' c'ʌjñel ti ch'ujyel majlel.

⁸ Mi caj a tocben i mal jiñi tabla tac cha'añ pulʌntib; che' bajche' tsa' c pʌsbeyet ya' ti wits, che'ʌch mi caj c mel.

Jiñi patiojlel jiñi Tabernáculo

⁹ Che' ja'el mi caj a melben i patiojlel jiñi Tabernáculo. Ya' ti yojlil jiñi Tabernáculo am bʌ ti' tojel sur yom mi la' joc'chocon jiñi pisil jalbil bʌ ti lino, am bʌ i tamlel ti lujump'ejl i yuxc'al (50) metro.

¹⁰ Jiñi junc'al i yoyel yic'ot jiñi junc'al i c'ʌclib yom melbil ti bronce; jiñi i c'ʌclib tac i yoyel yic'ot jiñi xotol tac bʌ yom melbil ti plata.

¹¹ Che' ja'el ti norte yom mi la' joc'chocon jiñi pisil am bʌ i tamlel ti lujump'ejl i yuxc'al (50) metro yic'ot jiñi junc'al i yoyel yic'ot jiñi junc'al i c'ʌclib; jiñi i c'ʌclib tac i yoyel yic'ot jiñi xotol tac bʌ yom melbil ti plata.

¹² Ya' ti' xujc jiñi patio ya' ti' tojel i bʌjlibal q'uiñ, yom colem bʌ pisil am bʌ i tamlel cha'p'ejl i cha'c'al yic'ot ojlil (22.5) metro, añ lujunts'ijt i yoyel yic'ot lujump'ejl i c'ʌclib tac.

¹³ I tamlel i xujc jiñi patio ba' mi' pasel q'uiñ jiñʌch cha'p'ejl i cha'c'al yic'ot ojlil (22.5) metro.

¹⁴ Jiñi colem pisil am bʌ ti' tojel ba' mi la cochel yom wucp'ejl metro yic'ot uxts'ijt i yoyel yic'ot uxp'ejl i c'ʌclib tac.

¹⁵ Che' ja'el ti yam bʌ junwejl ba' mi la cochel yom wucp'ejl metro yic'ot uxts'ijt i yoyel yic'ot uxp'ejl i c'ʌclib tac.

¹⁶ I mʌjquil i ti' jiñi patio jiñʌch colem bʌ pisil am bʌ bolomp'ejl metro i tamlel, joch'bil bʌ ti yʌjyʌx bʌ puy, ti chʌccojan bʌ, yic'ot ti chʌchʌc bʌ, wen jalbil ti lino. Yom chʌnts'ijt i yoyel yic'ot i buchlib tac.

¹⁷ Ti pejtelel i yoyel ti' joytʌlel jiñi patio yom cʌchbil tac ti plata; jiñi i joc'lib tac yom melbil ti plata yic'ot jiñi i c'ʌclib tac yom melbil ti bronce.

¹⁸ I tamlel jiñi patio jiñʌch jo'p'ejl i yuxc'al (45) metro, i xujc yom cha'p'ejl i cha'c'al yic'ot ojlil (22.5) metro. I chañlel jiñi colem tac bʌ pisil jiñʌch ojlil i yuxp'ejl metro. Jiñi colem tac bʌ pisil yom wen jalbil ti letsem bʌ i tojol pisil i c'aba' lino yic'ot yom jiñi i c'ʌclib tac melbil bʌ ti bronce.

¹⁹ Pejtelel mu' bʌ i c'ʌjñel ti Tabernáculo yic'ot pejtelel i te'el tac mu' bʌ i c'ʌjñel ti patio yom melbil ti bronce.

Aceite cha'añ lámpara

²⁰ Yom ma' su'beñob jiñi israelob cha'añ mi' ch'ʌmbeñetob tilel olivo aceite loq'uem bʌ ti wut olivo te' che' cujbilix cha'añ i c'ʌc'al lámpara, cha'añ mi' lejmel ti pejtelel ora jiñi c'ajc.

²¹ Yom ma' wa'chocon Aarón yic'ot i p'olbalob cha'añ mi' chʌcʌ q'uelob jiñi c'ajc ti ic'ajel c'ʌlʌl ti sʌc'ajel ya' ti Tabernáculo ba' mi la' tempan la' bʌ; jiñi c'ajc yom bʌ mi la' wʌc' ya'ʌch ya' ti Ch'ujul bʌ Ajñibʌl, iliyi jiñʌch mandar yom bʌ ti' tojlel israelob ti' lajm ti' lajm ti pejtelel ora.