Exodo 26 - Jiñi Tsiji' bʌ Wen T'añ cha'añ Estudio

Jiñi Tabernáculo

¹ Che' mi la' mel jiñi Tabernáculo, yom mi la' c'ʌn lujumpajc lino bʌ pisil wen uts'at bʌ, yʌjyʌx bʌ lino yic'ot chʌccojan bʌ yic'ot chʌchʌc bʌ; yom mi la' wen mel yic'ot i yejtal ángelob.

² Lajchʌmp'ejl yic'ot ojlil (12.50) metro yom i tamlel jiñi cortina yic'ot yom cha'p'ejl metro i xujc. Pejtelel jiñi cortina tac yom junlajal i ñuclel ti jujump'ejl.

³ Jiñi jujumpajc cortina yom tʌc'bil ti jo'pajc, yic'ot jiñi yam bʌ jo'pajc yom tʌc'bil ja'el.

⁴ Yom mi la' wʌc' xotol tac bʌ yʌjyʌx bʌ pisil ti ti' jiñi ñaxan bʌ tʌc'bil bʌ pisil, yic'ot jiñi yam bʌ jumpajc tʌc'bil yom ja'el.

⁵ Yom lujump'ejl i yuxc'al jiñi xotol tac bʌ pisil cha'añ jiñi ñaxan bʌ tʌc'bil bʌ pisil. Jiñi yam bʌ cortina tʌc'bil bʌ, yom lujump'ejl i yuxc'al jiñi xotol tac bʌ cha'añ mi' mejlel ti tʌjq'uel.

⁶ Che' ja'el yom mi la' mel lujump'ejl i yuxc'al i joc'lib ti puro oro cha'añ mi la' c'ʌn la' tʌc' ti' pejtelel jiñi cortina tac, cha'añ che' jiñi jump'ejl otot jax mi' majlel jiñi Tabernáculo.

⁷ Che' ja'el mi caj la' mel cortina tac melbil bʌ ti' pʌchʌlel chivo cha'añ i mʌjquil i jol jiñi Tabernáculo; mi caj a mel junlujumpajc che' ti' pejtelel.

⁸ I tamlel jujump'ejl cortina yom jo'lujump'ejl metro, jiñi i xujc yom cha'p'ejl metro; junlajal jach i p'isol ti pejtelel jiñi junlujumpajc cortina.

⁹ Mi caj la' ts'is jiñi jo'pajc cortina, jiñi yam bʌ cortina yom wʌcpajc, jiñi i wʌcp'ejlel cortina mi caj a pʌc ti' tojel jiñi Tabernáculo.

¹⁰ Ti wi'il mi caj a mel lujump'ejl i yuxc'al xotol tac bʌ ya' ti ti' tac jiñi jumpajc cortina yic'ot lujump'ejl i yuxc'al xotol tac bʌ ya' ti ti' tac i cha'p'ejlel bʌ cortina.

¹¹ Mi caj la' mel ja'el lujump'ejl i yuxc'al i joc'lib melbil bʌ ti bronce cha'añ mi la' wotsan ya' baqui xotol tac ti ti' jiñi cortina, mi caj a tsuy cha'añ jump'ejl jax i mʌjquil i jol mi' majlel.

¹² Che' tich'bilix jiñi cortina, i colojbal tac mu' to bʌ i cʌlel, mi caj i c'ʌjñibʌyel che' bajche' i lejch' jiñi Tabernáculo.

¹³ Jiñi ojlil metro i colojbal i tamlel jiñi cortina yom mi la' pʌc ju'bel ti jujunwejl jiñi Tabernáculo cha'añ mi' mʌctañ.

¹⁴ Mi caj a mel ja'el i jol jiñi Tabernáculo ti' pʌchʌlel i tat chivo ts'ajbil bʌ ti chʌchʌc bʌ i bojñil yic'ot yom i pʌchʌlel tac cojtom ya' ti' pam.

¹⁵ Mi caj la' wʌq'uen i bojte'lel jiñi Tabernáculo ti wen toj tac bʌ acacia te'.

¹⁶ Yom jo'p'ejl metro i tamlel jujunq'uejl tabla yic'ot yom ñumen ti ojlil metro i weltʌclel i xujc tac.

¹⁷ Ti jujunq'uejl jiñi tabla yom mi' melbentel i ti' ti cha'wejlel cha'añ ñut'ul mi' cʌytʌl; che'ʌch mi caj a mel ti' pejtelel jiñi tabla tac cha'añ i mʌjquil jiñi Tabernáculo.

¹⁸ Mi caj la' melben i mʌjquil jiñi Tabernáculo; junc'al tabla tac ya' ti' xujc am bʌ ti sur.

¹⁹ Yic'ot mi caj la' melben cha'c'al i c'ʌclib melbil bʌ ti plata ti ye'bal jiñi junc'al tabla tac: yom cha'p'ejl i c'ʌclib cha'añ jujunq'uejl tabla, che'ʌch ja'el ti jiñi yam bʌ.

²⁰ Ya' ti' junwejlel jiñi Tabernáculo am bʌ ti norte, mi caj a melben junc'al tabla

²¹ yic'ot yom cha'c'al i c'ʌclib melbil bʌ ti plata, cha'p'ejl cha'añ jujunq'uejl tabla.

²² Ya' ti junwejlel jiñi Tabernáculo am bʌ ti' tojel i bʌjlibal q'uiñ mi caj a melben wʌcq'uejl tabla.

²³ Yic'ot mi caj a melben cha'q'uejl tabla cha'añ i xujc tac jiñi Tabernáculo.

²⁴ Yom junlajal mi' c'otel yic'ot jiñi yam bʌ i tablajlel tac cha'añ ñut'ul mi' c'otel ti' chañelal yic'ot ti ye'bal, che'ʌch yom ja'el cha'añ yam bʌ i cha'p'ejlel i xujc.

²⁵ Che' jiñi yom waxʌcq'uejl tabla yic'ot i c'ʌclib melbil bʌ ti plata. Ti' pejtelel yom wʌclujump'ejl i c'ʌclib, cha'p'ejl i c'ʌclib ti jujunq'uejl tabla.

²⁶ Che' ja'el mi caj la' mel jo'ts'ijt i ts'omte'lel melbil bʌ ti acacia te' cha'añ mi' yajñel ti junwejl jiñi Tabernáculo,

²⁷ yic'ot yam bʌ jo'ts'ijt cha'añ mi' yajñel ya' ti yam bʌ junwejl jiñi Tabernáculo, yic'ot yam bʌ jo'ts'ijt cha'añ mi' yajñel ya' ti' pat am bʌ ti' tojel i bʌjlibal q'uiñ.

²⁸ Jiñi yam bʌ ts'omte' mu' bʌ i ñumel ti ojlil ti jiñi tabla tac, yom mi c'otel ya' ti yam bʌ junwejl.

²⁹ Mi caj la' tep' ti oro jiñi tabla tac yic'ot mi caj a mel ti oro jiñi xotol tac bʌ cha'añ ya'i mi' ñumel jiñi ts'omte' tac yic'ot ja'el mi caj la' tep' ti oro jiñi ts'omte' tac.

³⁰ Mi caj la' wa'chocon jiñi Tabernáculo che' bajche' tsa' pʌsbentiyet ya' ti wits.

³¹ Che' ja'el mi caj la' mel jump'ejl colem bʌ pisil yʌjyʌx bʌ yic'ot chʌccojan bʌ yic'ot chʌchʌc bʌ, wen jalbil bʌ ti lino bʌ pisil yic'ot i yejtal tac querubiñob.

³² Mi caj a joc'chocon jiñi colem bʌ pisil ya' ti chʌnts'ijt i yoyel acacia te' bʌ tep'bil bʌ ti oro yic'ot i jol jiñi oy tep'bil tac bʌ ti oro yic'ot i c'ʌclib melbil bʌ ti plata.

³³ Mi caj a joc'chocon jiñi colem bʌ pisil ti joc'lib tac, ya' ti junwejlel jiñi colem bʌ pisil mi caj wʌc' jiñi Arca ba' lotbil jiñi mandar. Jiñi colem bʌ pisil jiñʌch mu' bʌ i t'ox jiñi Ch'ujul bʌ Ajñibʌl yic'ot jiñi C'ax Ch'ujul bʌ Ajñibʌl.

³⁴ Mi caj la' wʌc' i majc jiñi Arca ba' lotbil jiñi mandar ya' ti C'ax Ch'ujul bʌ Ajñibʌl.

³⁵ Ya' ti yam bʌ junwejl ba' joc'ol jiñi pisil, mi caj la' wʌc' jiñi mesa, ya' ti' tojel jiñi mesa ya' ti sur, mi caj la' wʌc' i yajñib jiñi lámpara tac. Che' jiñi, jiñi mesa mi caj i cʌytʌl ti norte.

³⁶ Mi caj la' mel cha'añ i majc i ti' jiñi Tabernáculo jump'ejl cortina bʌ pisil, yʌjyʌx bʌ yic'ot chʌccojan bʌ yic'ot chʌchʌc bʌ yic'ot wen jalbil bʌ lino bʌ pisil, yom wen joch'bil tac ili cortina.

³⁷ Mi caj la' mel jo'ts'ijt i yoyel ti acacia te' tep'bil bʌ ti oro cha'añ mi la' joc'chocon jiñi cortina yic'ot yom tep'bil ti oro i jol jiñi oy tac yic'ot mi caj la' melben jo'p'ejl i c'ʌclib jiñi oy tac melbil bʌ ti bronce.