Exodo 24 - Jiñi Tsiji' bʌ Wen T'añ cha'añ Estudio

Moisés yic'ot xñoxob ya' ti wits Sinaí

¹ Lac Yum tsi' su'be Moisés: —Yom ma' letsel tilel ba'añon, temel a wic'ot Aarón, Nadab, Abiú, yic'ot lujuntiquil i chʌnc'al xñoxo' bʌ ti Israel yic'ot ñajt jach mi caj i c'uchchocoñob i bʌ.

² Cojach Moisés mi caj i lʌc'tesan i bʌ ba'añon; ixcu jiñi yaño' bʌ ma'añic mi caj i lʌc'tesañob i bʌ mi jiñic israelob mi' mejlelob ti letsel ti wits.

³ Moisés tsa' sujti i su'beñob wiñicob x'ixicob pejtelel i t'añ lac Yum, yic'ot pejtelel i mandar tac. Ti pejtelel israelob tsi' jac'ʌyob ti junlajal: —Mux c mel lojon ti pejtelel che' bajche' tsi' yʌlʌ lac Yum.

⁴ Che' jiñi Moisés tsi' ts'ijbu pejtelel i t'añ lac Yum, tsa' ch'ojyi ti wen sʌc'an, tsi' melbe i pulʌntib i majtañ Dios yic'ot tsi' mele lajchʌntejc wa'al bʌ xajlel ya' ti ye'bal wits, jujuntejc cha'añ jujunmojt i p'olbal Israel.

⁵ Ti wi'il tsi' choco majlel ch'itoñ wiñicob i yalobilo' bʌ Israel, cha'añ mi' pulbeñob i majtañ Dios yic'ot cha'añ mi' tsʌnsʌbeñob alʌ tat wacax tac cha'añ mi' yʌq'ueñob Dios wocolix i yʌlʌ.

⁶ Moisés tsi' ch'ʌmʌ ojlil i ch'ich'el wacax tsi' yotsa ti poc' tac, jiñi yam bʌ ojlil tsi' c'ʌñʌ i tsijcʌben i pulʌntib.

⁷ Ti wi'il tsi' ch'ʌmʌ jiñi juñ cha'añ xuc'ul bʌ t'añ, c'am tsi' pejca ti' tojlel wiñicob x'ixicob, tsi' jac'ʌyob: —Mi caj c jac' lojon yic'ot mi caj c mel lojon ti pejtelel che' bajche' tsi' yʌlʌ lac Yum.

⁸ Jiñi cha'añ Moisés tsi' ch'ʌmʌ jiñi ch'ich', tsi' tsijca ti' tojlel wiñicob x'ixicob, tsi' yʌlʌ: —Ili ch'ich' jiñʌch i sellojlel jiñi xuc'ul bʌ t'añ tsa' bʌ i mele lac Yum ti la' tojlel ti' pejtelel.

⁹ Tsa' letsi majlel ti wits Moisés yic'ot Aarón yic'ot Nadab yic'ot Abiú, yic'ot lujuntiquil i chʌnc'al (70) xñoxo' bʌ ti Israel,

¹⁰ tsi' q'ueleyob i Dios Israel. Ya' ba' wa'al che' yilal bajche' tʌsbil bʌ zafiro xajlel, lajal bʌ che' bajche' panchan che' wen jamʌl.

¹¹ Pero ma'añic tsi' sʌts'ʌ i c'ʌb Dios cha'añ mi' contrajin i yumob israelob; tsi' q'ueleyob Dios, tsi' cha'leyob we'el uch'el.

¹² Che' jiñi lac Yum tsi' su'be Moisés: —Letsen ti wits ba'añon, pijtañon ya'i; mi caj cʌq'ueñet wechel bʌ xajlel ba' tsa' c ts'ijba jiñi mandar tac cha'añ ma' cʌntesan jiñi wiñicob x'ixicob.

¹³ Tsa' majli Moisés temel yic'ot Josué i yaj e'tel. Moisés tsa' letsi ti wits ba'añ Dios.

¹⁴ Moisés tsi' su'be jiñi xñoxo' bʌ: —Pijtañon lojon wʌ'i jinto mic cha' sujtel lojon ba'añetla. Aarón yic'ot Hur mi caj i yajñel la' wic'ot; mi añ wocol bʌ ti la' tojlel, cucula ba' añob.

¹⁵ Che' jiñi tsa' letsi majlel Moisés ti wits. Junmojt tocal tsi' moso jiñi wits,

¹⁶ che' ja'el i ñuclel lac Yum tsa' c'oti ti' pam jiñi wits Sinaí. Jiñi tocal tsi' moso jiñi wits wʌcp'ejl q'uiñ. Che' ti wucp'ejlel q'uiñ Dios tsi' pʌyʌ Moisés ya' ti' yojlil jiñi tocal.

¹⁷ Jiñi israelob tsi' q'ueleyob i ñuclel lac Yum che' bajche' c'ajc woli bʌ ti lejmel ya' ti' pam wits.

¹⁸ Moisés tsa' ochi ti' mal tocal che' bʌ tsa' letsi majlel ti wits. Tsa' ajñi Moisés ya' ti wits cha'c'al (40) q'uiñ yic'ot cha'c'al ac'ʌlel.