Exodo 23 - Jiñi Tsiji' bʌ Wen T'añ cha'añ Estudio

¹ Mach ma' p'ojlesan t'añ che' mach a wujilic mi isujm. Mach ma' laj a t'añ a wic'ot xjontolil cha'añ ma' mucben i mul.

² Mach ma' tsajcan i yonlelob cha'añ ma' mel jontolil, mi yomic ma' laj a t'añ yic'ot i yonlel a pi'ʌlob ya' ti melobʌjʌl cha'añ ti' melol jontolil.

³ Che' ja'el mach yomic ma' coltañ p'ump'un bʌ che' añʌch i mul.

⁴ Mi tsa' tajbe i tat wacax a contra o sajtem bʌ i burro, yom ma' pʌyben sujtel i yum.

⁵ Mi tsa' tajbe i burro a contra che' yajlem yic'ot i cuch, ¿che' jach ba mi caj a to'ol q'uel? Anquese i cha'añ a contra mu' bʌ i ts'a'leñet, yom ma' coltañ.

⁶ Mach ma' q'uel ti lolom i t'añ jiñi p'ump'un bʌ che' woli i c'ajtin meloñel.

⁷ Mach ma' jop'ben i mul a pi'ʌl che' mach isujmic, yic'ot mach ma' wʌc' ti tsʌnsʌntel jiñi mach bʌ añic i mul yic'ot jiñi toj bʌ, come ma'añic mi caj c ñusʌben i mul jiñi xjontolil.

⁸ Mach ma' mucul ch'ʌm a majtañ cha'añ ma' mel jiñi mach bʌ tojic, come jiñi mu' bʌ i mucul ch'ʌm i majtañ, woli i mʌcbentel i wut, yic'ot mi' socben isujmlel i t'añ jiñi tojo' bʌ.

⁹ Mach yomic ma' tic'lan jiñi ch'oyol bʌ ti yam bʌ lum, come la' wujil bajche' yu'bil che' bʌ tsa' ajñiyetla ti yam bʌ lum ya' ti Egipto.

¹⁰ Wʌcp'ejl ja'b mi caj a cha'len pac' yic'ot c'ajbal ya' ti a lum,

¹¹ pero che' ti' wucp'ejlel ja'b yom ma' poj cʌy a c'ʌñ jiñi a lum, cha'añ mi tajob i bʌl i ñʌc' jiñi p'ump'uño' bʌ año' ti la' tejclum; i wut jiñi pʌc'ʌbʌl mu' bʌ i cʌytʌl mi caj i c'ux bʌte'el tac. Che'ʌch mi caj a mel ti a ts'usubil yic'ot ti a wolivojil.

¹² Wʌcp'ejl q'uiñ mi caj a cha'len e'tel, pero ti' wucp'ejlel q'uiñ mi caj a c'aj a wo yic'ot a wacax yic'ot a burro yic'ot mi caj i c'aj i yoj i yalobil a criada yic'ot jiñi ch'oyol bʌ ti yam bʌ lum.

¹³ Ch'ʌmʌla ti la' wenta pejtelel chuqui tsa' c su'beyetla. Mach mi la' pejcan yam bʌ dios tac mi yomic mi la' wʌlben i c'aba'.

Jiñi uxyajl q'uiñijel ti jujump'ejl ja'b

¹⁴ Uxyajl mi caj la' melbeñon q'uiñijel ti jujump'ejl ja'b.

¹⁵ Yom mi la' mel q'uiñijel cha'añ waj mach bʌ añic i levadurajlel. Wucp'ejl q'uiñ mi caj la' c'ux waj mach bʌ añic i levadurajlel, che' bajche' tsa' c su'beyetla ti mandar, che' ti ojlil marzo c'ʌlʌl ti ojlil abril, come ti jim bʌ ora tsa' loq'uiyetla ti Egipto; jiñi cha'añ mach yomic mi juntiquilic to'ol meq'uel i c'ʌb mi tilel tic c tojlel.

¹⁶ Jiñi yam bʌ q'uiñijel jiñʌch i q'uiñilel i wut la' pʌc'ʌb, jiñʌch che' mi la' wʌq'ueñon ñaxan bʌ i wut la' pʌc'ʌb tsa' bʌ la' taja ti la' lum, yic'ot jiñi q'uiñijel che' bʌ tsa'ix ujti la' lotben i wut la' pʌc'ʌb ti' jilibal jujump'ejl ja'b.

¹⁷ Uxyajl ti jujump'ejl ja'b yom mi' pʌs i bʌ pejtelel wiñic tic tojlel.

¹⁸ Mach mi la' wʌq'ueñon i ch'ich'el c majtañ temel yic'ot waj am bʌ i levadurajlel, mi yomic mi' cʌlel i lewil jiñi majtañʌl c'ʌlʌl ti yijc'ʌlal.

¹⁹ Jiñi ñaxan bʌ i wut la' pʌc'ʌb mi caj la' ch'ʌm tilel ti cotot. Mach yomic mi la' ch'ʌx alʌ chivo ti ya'lel i chu' i ña'.

Tsa' chojqui tilel i yángel lac Yum cha'añ mi' toj-esan majlel israelob

²⁰ Joñon wolic chocbeñetla majlel jiñi c ángel ti ñaxan ti la' tojlel cha'añ mi' cʌntañetla ti jiñi bij yic'ot cha'añ mi' pʌyetla ochel ti jiñi lum chajpʌbil bʌ c cha'añ.

²¹ P'isi ti la' wenta, jac'benla i t'añ, mach mi la' ñusʌben i t'añ, come ma'añic mi caj i ñusʌbeñet la' mul, come mi caj i mel i ye'tel tij c'aba'.

²² Mi ti isujm mi la' jac'ben i t'añ yic'ot mi mux la' mel che' bajche' mic su'beñetla, mi caj j contrajin la' contrajob yic'ot mi caj c tic'lan jiñi mu' bʌ i tic'lañetla.

²³ Jiñi c ángel ñaxan mi caj i majlel ti' tojel la' wut cha'añ mi' pʌyetla majlel ti' lumal amorreojob yic'ot heteojob yic'ot ferezeojob yic'ot cananeojob yic'ot heveojob yic'ot jebuseojob. Mi caj c jisañob ti pejtelel.

²⁴ Mach yomic mi la' ch'ujutesan i diosob, mi yomic mi la' melben i ye'tel, mi yomic mi la' mel che' bajche' mi' melob; yom mi la' jisañob ti pejtelelob, yic'ot yom mi la' top' yic'ot yom mi la' xul pejtelel i yejtal i diosob.

²⁵ Pero yom mi la' melben i ye'tel la' Yum Dios, che' jiñi mi caj i yʌq'ueñetla ca'bʌl i bʌl la' ñʌc' yic'ot ja'. Mi caj tʌts' loq'uel ti a tojlel pejtelel c'am-ʌjel.

²⁶ Ya' ti a lumal ma'añic x'ixic mu' bʌ caj i choc i yalobil, mi añic to'ol wa'al jach bʌ x'ixic mi' cʌytʌl yic'ot mi caj c ñajt-esan la' ja'bilel.

²⁷ Mi caj choc tilel bʌbʌq'uen bʌ cha'añ mi la' bʌc'ñʌntel; mi caj i toj sajtelob i pusic'al pejtelel wiñicob x'ixicob ba' mi caj la' c'otel yic'ot mi caj c puts'tesan pejtelel la' contrajob.

²⁸ Mi caj c choc majlel ti ñaxan lajal bʌ bajche' xux cha'añ mi' choc loq'uel ti la' tojlel jiñi heveojob yic'ot cananeojob yic'ot heteojob.

²⁹ Ma'añic mi caj c chocob loq'uel ti la' tojlel ti jump'ejl jach ja'b cha'añ mach jocholic mi' cʌytʌl jiñi lum, mi yomic mi' p'ojlel ca'bʌl jontol bʌ bʌte'el ti jamil, ame i jisañet.

³⁰ C'unte', c'unte' jach mi caj c choc loq'uel ti la' tojlel, jinto mi la' wen p'ojlel cha'añ mi la' ch'ʌm ti la' wenta jiñi lum.

³¹ Mi caj c pʌs ba' jaxʌl la' lum, c'ʌlʌl ti Chʌchʌc bʌ Mar, yic'ot c'ʌlʌl ya' ti mar ba'añ filisteojob, yic'ot ba'añ tiquin bʌ lum, c'ʌlʌl ti colem ja' i c'aba' Éufrates, come mi caj cʌc' ti la' wenta pejtelel wiñicob x'ixicob año' bʌ ti jiñi lum, jatetla mi caj la' chocob loq'uel.

³² Mach mi la' laj la' t'añ yic'otob, mi jiñic yic'ot i diosob.

³³ Ya' ti a lumal mach yomic mi' tem chumtʌl la' wic'ot, ame mi' yʌq'uetla ti mulil tij contra che' mi la' ch'ujutesʌben i diosob, come jiñʌch mu' bʌ caj i yʌq'uetla ti yajlel.