Exodo 22 - Jiñi Tsiji' bʌ Wen T'añ cha'añ Estudio

Mandar tac cha'añ i q'uextʌntel bet

¹ Mi añ majqui mi' xujch'in juncojt xtat wacax o juncojt i ña'al tʌñʌme', mi tsi' tsʌnsa o mi tsi' choño, yom mi' yʌc' jo'cojt xtat wacax cha'añ i q'uexol; cha'añ i ña'al tʌñʌme' yom mi yʌc' chʌncojt tʌñʌme' cha'añ i q'uexol.

² Che' mi' tajtʌl xujch' woli bʌ i yochel ti' yotot yam bʌ wiñic che' ñup'ul i yotot, mi tsa' lojwi, mi tsa' chʌmi, ma'añic i mul jiñi tsa' bʌ i lowo.

³ Pero mi tsa' ujti che' ti q'uiñil, añ i mul jiñi mu' bʌ i tsʌnsan. Jiñi xujch' mi caj i sutq'uin ti' pejtelel jiñi tsa' bʌ i ch'ʌmʌ; mi mach mejlic i toj, mi caj i chojñel jiñi xujch' cha'añ mi' toj jiñi tsa' bʌ i xujch'i.

⁴ Mi tsa' tajle yic'ot i xujch', mi cuxul to jiñi xtat wacax, mi burro, o mi tʌñʌme', cha'yajl mi caj i toj.

⁵ Mi añ majqui mi' yotsan i yʌlac' ti buc'bal ti jumpejt jamil o ti jumpejt ts'usubil mach bʌ i cha'añic, mi caj i yʌq'ueñ i yum jiñi jamil o jiñi ts'usubil i q'uexol pejtelel chuqui tsi' jisa.

⁶ Mi añ majqui mi' tsuc' c'ajc cha'añ mi' pul ch'ix, mi tsa' c'axi c'ajc ti' lum yam bʌ wiñic, mi tsa' puli much'quibil bʌ i trigo yic'ot jiñi wa'al to bʌ trigo, jiñi tsa' bʌ i tsuc'u c'ajc wersa mi caj i toj jiñi tsa' bʌ puli.

⁷ Che' añ chuqui ma' wʌq'uen a pi'ʌl cha'añ mi' cʌntʌbeñet, mi taq'uiñ, mi chu'bʌañʌl letsem bʌ i tojol, mi tsa' xujch'ibenti loq'uel ya' ti yotot ba' lotol i cha'añ, mi tsa' tajle jiñi xujch', wersa mi' toj cha'yajl che' bajche' añ i tojol.

⁸ Mi ma'añic tsa' tajle jiñi xujch', jiñi cha'añ i yum otot wersa mi' pʌjyel majlel ba' mi' cha'leñob meloñel cha'añ mi' tsictesan mi jiñi tsi' ch'ʌmʌ i chu'bʌañ i pi'ʌl.

⁹ Che' añ chuqui sajtem, mi wacax, mi burro, mi tʌñʌme', mi bujcʌl, mi añ yam bʌ chuqui tsa' sajti, mi añ majqui tsi' yʌlʌ: “C cha'añʌch iliyi”, che' jiñi mi caj i majlelob ti' cha'ticlelob ti' tojlel xmeloñelob. Jiñi tsa' bʌ tajle i mul ti' tojlel xmeloñel, cha'yajl mi caj i tojben i pi'ʌl.

¹⁰ Che' añ chuqui ma' wʌq'uen yam bʌ wiñic cha'añ mi' cʌntʌbeñet, mi burro mi wacax mi tʌñʌme' o baqui jach bʌ alʌc'ʌl, mi tsa' chʌmi, mi tsa' lojwi, mi tsa' xujch'inti che' ma'añic majqui tsi' q'uele,

¹¹ jiñi wiñic mi caj i wa'chocon i t'añ ti' tojlel lac Yum cha'añ ma'añic tsi' xujch'ibe i chu'bʌañ i pi'ʌl: i yum jiñi chu'bʌañʌl, mi caj i ñopben i t'añ, che' jiñi ma'añic mi caj i yʌq'ueñ i toj.

¹² Pero mi tsa' xujch'ibenti jiñi alʌc'ʌl, wersa mi caj i tojben i yum jiñi alʌc'ʌl.

¹³ Mi tsi' c'uxu jontol bʌ bʌte'el, la' i ch'ʌmben tilel i colojbal cha'añ mi' q'uel, che' jiñi ma'añic mi caj i toj jiñi tsa' bʌ c'uxle.

¹⁴ Pero mi añ majqui mi' majñan alʌc'ʌl ti' tojlel i pi'ʌl, wersa mi caj i tojben i yum mi tsa' lojwi, o mi tsa' chʌmi che' mach ya'ic añ i yum,

¹⁵ pero mi ya'ʌch añ i yum jiñi alʌc'ʌl, ma'añic mi caj i toj. Mi woli jach i majñan yom mi tojben i yum cha'añ woli i c'ʌn ti e'tel.

Mandar tac che' bajche' yom mi yajñelob yic'ot i pi'ʌlob

¹⁶ Mi añ majqui mi' lotin juntiquil xch'oc maxto bʌ c'ajtibilic, mi tsi' pi'le, wersa mi caj i yʌc' i tojol ñujpuñijel, yic'ot wersa mi caj i pʌy cha'añ i yijñam.

¹⁷ Mi mach yomic i sijin i tat jiñi xch'oc ti' tojlel jiñi wiñic, mux i tojbentel i tat jiñi xch'oc che' bajche' i tojol tsiji' bʌ xch'oc.

¹⁸ Jiñi x'ixic mu' bʌ i cha'len wujt, yom mi' tsʌnsʌntel.

¹⁹ Mi añ mu' bʌ i pi'len alʌc'ʌl wersa mi' tsʌnsʌntel.

²⁰ Jiñi mu' bʌ i yʌq'ueñ i majtañ yam bʌ dios tac, wersa mi' tsʌnsʌntel, cojach lac Yum mi' yʌq'uentel i majtañ.

²¹ Mach ma' lotin jiñi mach bʌ ya'ic ch'oyol ti a lumal mi yomic ma' c'ʌn ti e'tel, come jatetla ja'el tsa' chumleyetla ba' mach la lumalic, che' bʌ ya'añetla ti Egipto.

²² Mach mi la' tic'lan me'ba' x'ixic yic'ot me'ba' alʌl.

²³ Come mi tsa' la' tic'la, mi c'am tsi' pejcayon, ti isujm mi caj cu'biben i t'añ,

²⁴ mi caj c wen mich'an, mi caj c tsʌnsañetla ti espada; jiñi la' wijñam yic'ot la' walobilob mi caj i yochelob ti me'ba'.

²⁵ Che' ma' wʌc' a taq'uiñ ti majan ti' tojlel juntiquil p'ump'un bʌ chumul bʌ ti a lumal, mach ma' ch'ʌmben i jol a taq'uiñ che' bajche' xp'ojlesa taq'uiñob.

²⁶ Mi tsa' ch'ʌmbe i pislel a pi'ʌl i wentajlel cha'añ wersa mi' toj i bet, yom ma' cha' sutq'uiben che' mi' yic'an,

²⁷ come jiñi pisil lʌpbil bʌ i cha'añ jiñʌch i mosil che' ti ac'ʌlel. Mi ma'añic ma' sutq'uiben, ¿bajche' mi' caj ti wʌyel? Che' c'am mi' pejcañon mi caj cu'biben i t'añ, come cujil p'untaya.

²⁸ Mach ma' p'aj Dios mi jiñic am bʌ i ye'tel ti' a lumal.

²⁹ Che' i yorajlelix c'ajbal mach mi' jal-añ c majtañ yom bʌ mi la' wʌq'ueñon, jiñʌch ñaxan bʌ i wut la' pʌc'ʌb yic'ot i ya'lel la' ts'usub. Aq'ueñon ja'el jiñi ascuñʌl bʌ la' walobilob.

³⁰ Aq'ueñon ja'el ñaxan bʌ i yal la' wacax yic'ot la' tʌñʌme'; wucp'ejl q'uiñ mi' yajñel yic'ot i ña', ti waxʌcp'ejlel q'uiñ mi caj la' wʌq'ueñon.

³¹ Yom mi la' wajñel ti ch'ujul. Mach mi la' c'ux i colojbal i we'el jiñi jontol bʌ bʌte'el che' mi la' taj ti jamil; yom mi la' chocben ts'i'.