Exodo 20 - Jiñi Tsiji' bʌ Wen T'añ cha'añ Estudio

Jiñi lujump'ejl mandar

¹ Dios tsi' su'bu pejtelel ili t'añ:

² “Joñon a Yumon a Dioson, tsa' c pʌyʌyetla loq'uel ti' lumal egiptojob, ya' ba' chucbiletla ti majtañ e'tel.

³ Mach a ñop yam bʌ dios tac, cojach joñon.

⁴ Mach a bajñel mel a dios tac, mi i yejtalic am bʌ ti panchan mi jiñic am bʌ ti pañimil, mi jiñic am bʌ ti mar.

⁵ Mach a c'uchchocon a bʌ ti' tojlelob, mach a ch'ujutesañob, come a Yumon a Dioson, p'ʌtʌl bʌ, mic mich'an che' ma'añic mij c'uxbintel, mi cʌq'ueñob i toj i mul wiñicob x'ixicob yic'ot i yalobilob c'ʌlʌl ti' yuxlajmlel yic'ot ti' chʌnlajmlel i p'olbalob che' mi' ts'a'leñoñob,

⁶ yic'ot mic pʌsbeñob i yutslel c pusic'al bajc'ʌlob mu' bʌ i c'uxbiñoñob yic'ot mu' bʌ i jac'beñoñob c mandar.

⁷ Mach a lon tajben i c'aba' a Yum Dios, come ma'añic mi caj i ñusʌben i mul jiñi mu' bʌ i lon tajben i c'aba'.

⁸ Yom ma' p'is ti a wenta i q'uiñilel c'aj-o, yom ma' q'uel ti ch'ujul.

⁹ Wʌcp'ejl q'uiñ yom ma' cha'len e'tel yic'ot pejtelel chuqui yom ma' mel,

¹⁰ pero ti' wucp'ejlel q'uiñ i yorajlelʌch c'aj-o cha'añ a Yum Dios; ti ili q'uiñ mach a wis cha'len e'tel, mi ch'itoñ bʌ a walobil, mi xch'oc bʌ a walobil, mi a wiñic, mi a criada, mi a wʌlac', mi jiñic am bʌ ti a tojlel mach bʌ israelobic,

¹¹ come ti' wʌcp'ejl q'uiñ a Yum tsi' mele panchan yic'ot pañimil, jiñi mar, yic'ot pejtelel i bʌl; tsi' c'aja i yoj che' ti wucp'ejlel q'uiñ; jiñi cha'añ a Yum tsi' q'uele ti uts'at i q'uiñilel c'aj-o yic'ot tsi' q'uele ti ch'ujul.

¹² C'uxbin a tat a ña' cha'añ ma' jalijel ti jiñi lum tsa' bʌ i yʌq'ueyet a Yum Dios.

¹³ Mach a cha'len tsʌnsa.

¹⁴ Mach a cha'len ts'i'lel.

¹⁵ Mach a cha'len xujch'.

¹⁶ Mach a cha'len jop't'añ ti' contra a pi'ʌl.

¹⁷ Mach a mulʌben i yotot a pi'ʌl, mi i yijñam, mi i wiñic, mi i criada, mi i tat wacax, mi i burro, mi yam bʌ chuqui tac añ i cha'añ.”

Jiñi wiñicob x'ixicob tsi' wen cha'leyob bʌq'uen

¹⁸ Pejtelel wiñicob x'ixicob tsi' q'ueleyob i xu'il chajc yic'ot tomocña bʌ i buts'il jiñi wits yic'ot tsi' yu'biyob i t'añ trompeta yic'ot chajc. Che' bʌ tsi' q'ueleyob iliyi, jiñi wiñicob x'ixicob tsi' cha'leyob bʌq'uen yic'ot ñajt tsa' wa'leyob.

¹⁹ Che' jiñi tsi' su'beyob Moisés: —Pejcañon lojon jatet, mi caj c ñʌch'tʌbeñet lojon a t'añ; pero mach comic mi' pejcañon lojon Dios cha'añ ma'añic mic chʌmel lojon.

²⁰ Moisés tsi' jac'beyob jiñi wiñicob x'ixicob: —Mach la' cha'len bʌq'uen, come tsa' tili Dios cha'añ mi' q'uel la' pusic'al, cha'añ mi la' bʌc'ñan Dios yic'ot cha'añ ma'añic mi la' cha'len mulil.

²¹ Che' ñajt wa'alob wiñicob x'ixicob, Moisés tsi' lʌc'tesa i bʌ ba'añ Dios ya' ba'añ ic'yoch'an bʌ tocal.

²² Lac Yum tsi' su'be Moisés: “Mi caj a su'ben israelob: Tsa'ix la' wu'bi che' bʌ tsa' c pejcayetla wʌ' ti panchan.

²³ Mach la' mel la' dios tac melbil bʌ ti plata mi ti oro cha'añ mi la' ch'ujutesan.

²⁴ Yom mi la' melbeñon pulʌntib melbil bʌ ti pajc', ba' mi la' pulbeñon jiñi tsʌnsʌbil bʌ c majtañ, yic'ot c majtañ cha'añ i ñʌch'tʌlel la' pusic'al yic'ot la' tʌñʌme' yic'ot la' wacax tac. Baqui jach mi cʌc' ti ña'tʌntel j C'aba', mi caj c tilel ba'añetla cha'añ mi cʌq'ueñetla i yutslel c pusic'al.

²⁵ Mi tsa' la' melbeyon c pulʌntib ti xajlel, mach mi la' tsep ti e'tijibʌl, come che' jiñi bi'bi' mij q'uel.

²⁶ Mach mi la' melben i quejp tac jiñi pulʌntib cha'añ ma' letsel ya'i ame tsictiyic i mal a bujc.”