Exodo 19 - Jiñi Tsiji' bʌ Wen T'añ cha'añ Estudio

3. XUC'UL BɅ I T'AÑ DIOS TSA' BɅ I YɅC'Ʌ YA' TI SINAÍ ( 19.1—24.18 ) Jiñi israelob ya' ti Sinaí

¹ Che' ti' yuxp'ejlel uw i loq'uelob israelob ti Egipto, ti jiñi jach bʌ q'uiñ tsa' c'otiyob ya' ti' tiquiñal lum i c'aba' Sinaí.

² Tsa' loq'uiyob ti Refidim, che' bʌ tsa' c'otiyob ti' tiquiñal lum i c'aba' Sinaí, ya'i tsa' jijliyob ti' tojel jiñi wits.

³ Moisés tsa' letsi ti jiñi wits cha'añ mi' taj Dios. Lac Yum tsi' pejca ya' ti wits, tsi' yʌlʌ: —Mi caj a su'beñob i p'olbal Jacob, jiñi israelob, che' bajche' iliyi:

⁴ “Tsa'ix la' q'uele chuqui tsa' c melbeyob egiptojob yic'ot bajche' tsa' c pʌyʌyetla tilel che' bajche' ti' wich' xiye'; tsa'ix c pʌyʌyetla tilel ba'añon.

⁵ Jiñi cha'añ, mi xuc'ul mi la' ñʌch'tʌbeñob c t'añ, mi uts'at mi la' jac' jiñi xuc'ul bʌ c t'añ, mi caj la' wochel tic cha'añ ti' tojlel pejtelel tejclum tac, come c cha'añʌch pejtelel pañimil.

⁶ Jatetla mi caj la' wochel ti motomaj cha'añ mi la' cha'len yumʌntel yic'ot mi caj la' wajñel ti ch'ujul.” Jiñʌch jiñi t'añ mu' bʌ caj a su'beñob israelob.

⁷ Jiñi cha'añ Moisés tsa' tili i pʌy jiñi ñoxobix bʌ ti' israelob, tsa' caji i tsictesʌbeñob pejtelel ili t'añ tsa' bʌ i yʌlʌ lac Yum ti' mandar.

⁸ Pejtelel wiñicob x'ixicob junlajal tsi' jac'ʌyob, tsi' yʌlʌyob: —Mi caj c mel lojon pejtelel tsa' bʌ i yʌlʌ lac Yum. Moisés tsi' cha' su'be lac Yum chuqui tsi' yʌlʌyob.

⁹ Lac Yum tsi' su'be: —Talon ba'añet ti pim bʌ tocal, cha'añ mi' yu'biñob jiñi israelob che' mic pejcañet, cha'añ mi' q'ueletob ti ñuc ti pejtelel ora. Moisés tsi' su'be Dios i t'añ jiñi israelob.

¹⁰ Lac Yum tsi' su'be: —Cucu ba'añ wiñicob x'ixicob, sʌc-esañob wʌle yic'ot ijc'ʌl. La' i wuts'ob i pislel,

¹¹ yom chajpʌbilobix cha'bi, come ti jiñi q'uiñ mi caj c ju'bel tilel cha'añ mij c'otel ya' ti' pam wits i c'aba' Sinaí ti' wut pejtelel wiñicob x'ixicob.

¹² Mi caj a mel mojon ba' jaxʌl yom mi' c'otelob wiñicob x'ixicob yic'ot mi caj c su'beñob: “Chʌcʌ q'uele la' bʌ cha'añ ma'añic mi la' letsel ti wits, mi yomic mi la' tʌl jiñi mojon; majqui jach mi' tʌl jiñi wits wersa mi caj i chʌmel.”

¹³ Mach yomic mi' tʌl mi juntiquilic, come mi caj i jujlel ti xajlel o mi caj i tsʌnsʌntel ti jalʌjb; mi bʌte'el o mi wiñic, mach cuxulic mi caj i cʌytʌl. Che' mi yu'bintel c'am bʌ i t'añ trompeta, mi caj i letselob ya' ti wits.

¹⁴ Tsa' ju'bi Moisés ti wits cha'añ mi' sʌc-esañob jiñi israelob yic'ot tsi' wuts'uyob i pislel.

¹⁵ Moisés tsi' su'beyob israelob: —Yom chajpʌbiletixla cha'bi, mach yomic mi la' pi'len la' wijñam.

¹⁶ Che' ti sʌc'ajel ti' yuxp'ejlel q'uiñ tsa' caji ti tojmel tac chajc yic'ot i xu'il tac yic'ot tsi' moso ti pim bʌ tocal jiñi wits, yic'ot tsi' yu'biyob c'am bʌ i t'añ trompeta. Pejtelel wiñicob x'ixicob ya' ti jiñi xchumtʌl tsiltsilña tsa' cajiyob ti bʌq'uen.

¹⁷ Moisés tsi' pʌyʌyob loq'uel ba' jijlemob cha'añ mi' tajob Dios, ya' tsa' cʌleyob ti ye'bal wits.

¹⁸ Tsa' joy ic'a ti buts' jiñi wits i c'aba' Sinaí, come lac Yum tsa' ju'bi tilel ti c'ajc ya' ti' pam wits. Jiñi buts' tomocña tsa' letsi che' bajche' i buts'il horno yic'ot jiñi wits bʌbʌq'uen tsi' ñijca i bʌ.

¹⁹ Tsa' caji ti c'am-añ majlel i t'añ jiñi trompeta. Moisés tsi' cha'le t'añ, Dios tsi' jac'ʌ che' bajche' i t'añ chajc.

²⁰ Tsa' ju'bi tilel lac Yum, tsa' c'oti ya' ti' pam wits i c'aba' Sinaí. Lac Yum tsi' su'be letsel Moisés ya' ti' pam wits, che' jiñi Moisés tsa' letsi majlel.

²¹ Lac Yum tsi' su'be Moisés: —Yom ma' cha' ju'bel cha'añ ma' wʌq'ueñob mandar a pi'ʌlob, cha'añ mach mi' ñumelob ba'añ mojon tac cha'añ mi' q'ueloñob, come ca'bʌl mi caj i chʌmelob mi tsa' c'axiyob.

²² Che' ja'el, la' i sʌc-esañob i bʌ jiñi motomajob mu' bʌ caj i lʌc'tesañob i bʌ tic tojlel, cha'añ ma'añic mic jisañob.

²³ Moisés tsi' su'be lac Yum: —Jiñi wiñicob x'ixicob mach mejlicob ti letsel ti wits i c'aba' Sinaí, come tsa' wʌq'ueyon lojon mandar, tsa' wʌlʌ: “Yom ma' wʌq'uen i mojonlel tac ili wits yic'ot sʌc-esan cha'añ ch'ujul mi yajñel.”

²⁴ Pero lac Yum tsi' su'be: —Yom ma' ju'bel, ti wi'il pʌyʌ letsel Aarón a wic'ot; pero jiñi motomajob yic'ot jiñi wiñicob x'ixicob mach yomic mi' c'axelob ba'añ jiñi mojon tac cha'añ mi' tilelob ba'añon, ame c jisañob.

²⁵ Jiñi cha'añ Moisés tsa' ju'bi i su'beñob wiñicob x'ixicob. Jiñi wits Ba' mi lac taj ti Biblia Jiñi wits i c'aba' Carmelo 1 R 18.19-20,42; 2 R 2.25; Jer 46.18 Ba' tsi' cha'le cʌntesa Jesús Mt 5.1; 8.1 Ya' ba' tsa' ajñi Jesús Mt 17.1 Ya' ba' tsa' ilʌbenti i pusic'al Jesús Mt 4.8 Ya' ti wits ba'añ olivo te' tac Mt 21.1; 24.3; 26.30; Jn 8.1; Hch 1.12 q'uele ja'el Getsemaní ba'añ jiñi tema tac Wits i c'aba' Ebal Dt 11.29; 27.4,13; Jos 8.30,33 Jiñi wits i c'aba' Gólgota Mt 27.33; Jn 19.17 Wits i c'aba' Gerizim Dt 11.29; 27.12; Jos 8.33; Jue 9.7 Gilboa 1 Sam 31.1; 2 Sam 1.6 Hermón Jos 12.1; 13.5,11; Sal 133.3 Horeb Ex 3.1; Dt 1.6; 4.15 Moriah Gn 22.2; 2 Cr 3.1 Seir Gn 14.6; 36.8,9; Dt 1.2; Jos 15.10 Sinaí Ex 3.1; 19.10-23; 24.16; Hch 7.30,38; Gl 4.24,25 Sión Sal 2.6; 78.68; Heb 12.22; Ap 14.1 Tabor Jos 19.22; Jue 4.6,12,14; Sal 89.12, 13; Jer 46.18 Cha'añ ma' ña'tan baqui añ ili wits tac yom ma' q'uel baqui añ ti jiñi Mapa tac.