Exodo 18 - Jiñi Tsiji' bʌ Wen T'añ cha'añ Estudio

Jetro tsi' jula'ta Moisés

¹ Tsi' yu'bi Jetro, jiñi motomaj bʌ ti Madián, i ñij-al Moisés, pejtelel jiñi ñuc tac bʌ tsa' bʌ i mele Dios cha'añ mi' coltañ Moisés yic'ot israelob i cha'año' bʌ yic'ot che' bajche' tsi' pʌyʌyob loq'uel israelob ti Egipto.

² Jiñi cha'añ Jetro, i ñij-al Moisés, tsi' cha' pʌybe tilel Séfora, i yijñam Moisés, come Moisés tsi' su'be sujtel ti yotot ya' ti Madián che' ya' to añob ti Egipto,

³ yic'ot tsi' pʌybe c'otel jiñi cha'tiquil ch'itoñ bʌ i yalobilob; juntiquil i c'aba' Gersón, come Moisés tsi' yʌlʌ: “Xñumelon jach ti ili lum ba' mach c lumalic”;

⁴ i c'aba' jiñi yam bʌ jiñʌch Eliezer, come Moisés tsi' yʌlʌ: “I Dios c Tat tsi' coltayon, che' colel i tsʌnsañon ti espada faraón.”

⁵ Che' bʌ Jetro, i ñij-al Moisés, tsi' pʌybe tilel i yijñam yic'ot i yalobilob Moisés, tsa' c'oti ya' ti' tiquiñal lum, ba' jijlemob israelob ya' ti' wits Dios.

⁶ Jetro tsi' su'be Moisés: —Joñon a ñij-al Jetro, wolic tilel ba'añet yic'ot a wijñam yic'ot cha'tiquil a walobilob.

⁷ Moisés tsa' loq'ui i taj i ñij-al, tsi' c'uchchoco i bʌ, tsi' ts'ujts'u. Tsi' c'ajtibeyob i bʌ bajche' añob, che' jiñi tsa' tem ochiyob ti otot.

⁸ Moisés tsi' tsictesʌbe i ñij-al pejtelel tsa' bʌ i mele lac Yum ti' tojlel faraón yic'ot ti' tojlel egiptojob cha'añ i c'uxbintel israelob, yic'ot bajche' tsi' coltayob lac Yum ti pejtelel wocol tac tsa' bʌ i yu'biyob ti bij.

⁹ Tsi' yu'bi i tijicñʌyel Jetro cha'añ pejtelel ñuc tac bʌ tsa' bʌ i mele lac Yum ti' tojlel israelob, che' bʌ tsi' loc'sayob ti' p'ʌtʌlel egiptojob.

¹⁰ Jetro tsi' yʌlʌ: —La' sujbic i ñuclel lac Yum, come tsi' loc'sayetla ti' p'ʌtʌlel i c'ʌb egiptojob yic'ot ti' p'ʌtʌlel i c'ʌb faraón. Lac Yum tsi' loc'sa i tejclum ti' p'ʌtʌlel i c'ʌb egiptojob.

¹¹ Wʌle cʌmbilix c cha'añ, ñumen ñuc lac Yum che' bajche' pejtelel dios tac, come ñuc tsi' pʌsʌ i bʌ lac Yum ti' tojlel jiñi egiptojob tsa' bʌ i chañ-esayob i bʌ.

¹² Ti wi'il Jetro, i ñij-al Moisés tsi' yʌq'ue pulbil bʌ yic'ot tsʌnsʌbil bʌ i majtañ Dios; Aarón yic'ot pejtelel xñoxob ti Israel tsa' tiliyob ba'añ i ñij-al Moisés cha'añ temel mi' c'uxob waj ti' tojlel Dios.

Tsa' wa'choconti juezob

¹³ Che' ti yijc'ʌlal tsa' buchle Moisés cha'añ mi' cha'len meloñel ti' tojlel israelob, jiñi cha'añ tsa' ajñiyob wiñicob x'ixicob ti' tojlel Moisés c'ʌlʌl ti sʌc'ajel c'ʌlʌl ti ic'ajel.

¹⁴ Che' bʌ tsi' q'uele i ñij-al Moisés pejtelel i ye'tel Moisés ti' tojlel wiñicob x'ixicob, tsi' c'ajtibe: —¿Chuqui woli a melben israelob? ¿Chucoch bajñel buchulet ti meloñel ti' tojlel pejtelel wiñicob x'ixicob c'ʌlʌl ti sʌc'ajel c'ʌlʌl ti ic'ajel?

¹⁵ Moisés tsi' jac'be i ñij-al: —Come jiñi wiñicob x'ixicob mi' tilelob ba'añon che' yomob i toj-esʌntel ti Dios.

¹⁶ Che' añ majqui woli ti leto, mi' tilelob ba'añon; joñon mic cha'len meloñel ti' tojlelob yic'ot mic tsictesʌbeñob chuqui tsi' yʌlʌ Dios ti' mandar.

¹⁷ Jiñi cha'añ i ñij-al Moisés tsi' su'be: —Mach uts'atic bajche' woli a mel.

¹⁸ Ca'bʌl woli a jisan a wersa yic'ot woli' lujb-añob ja'el jiñi wiñicob x'ixicob, come c'ax tsʌts ili e'tel woli bʌ a mel, mach mejlic a bajñel mel.

¹⁹ Ñʌch'tʌbeñon c t'añ: mi caj c toj-esañet, Dios mi caj i yajñel a wic'ot. Jatet yom ma' pejcan Dios cha'añ i coltʌntel wiñicob x'ixicob yic'ot ac'ʌ ti' wenta Dios chuqui woli yujtel.

²⁰ Yom ma' cʌntesan israelob ti jiñi mandar tac che' bajche' ts'ijbubil, pʌsbeñob i bijlel ba' yom mi' cha'leñob xʌmbal, yic'ot chuqui yom mi' melob.

²¹ Che' ja'el yom ma' yajcan wiñicob año' bʌ i ña'tʌbal, mu' bʌ i bʌc'ñañob Dios, isujm bʌ mi' cha'leñob t'añ, mach bʌ añic mi' mulañob taq'uiñ. Yom ma' wa'chocoñob ti ye'tel ti' tojlel israelob, yom juntiquil yumʌl ti' tojlel jujump'ejl mil tac yic'ot ti' tojlel jo'jo'c'al tac yic'ot ti' tojlel lujump'ejl i yuxc'al tac yic'ot ti' tojlel lujuntiquil tac.

²² Jiñi wa'chocobilo' bʌ mi caj i cha'leñob meloñel ti pejtelel ora ti' tojlel i pi'ʌlob. Che' mi' tejchel tsʌts tac bʌ wocol, la' tilic i su'beñetob; jiñi wa'chocobilo' bʌ mi caj i melob jiñi e'tel mach bʌ wocolic. Che' jiñi mi caj i sejb-añ a we'tel, come jiñi año' bʌ i ye'tel mi caj i coltañetob.

²³ Mi che'ʌch ma' mel, Dios mi caj i su'beñet chuqui mi caj a mel, che' jiñi mi caj i mejlel a chʌn cha'len a we'tel yic'ot mi caj i sujtelob ti yotot pejtelel wiñicob x'ixicob ti' ñʌch'tʌlelob i pusic'al.

²⁴ Moisés tsi' jac'be i t'añ i ñij-al. Tsi' laj mele che' bajche' tsi' yʌlʌ.

²⁵ Moisés tsi' yajca wiñicob año' bʌ i ña'tʌbal ti pejtelel Israel yic'ot tsi' yʌq'ueyob i ye'tel ti' tojlel i pi'ʌlob ti jujunmojt. Yom juntiquil yumʌl ti' tojlel jujump'ejl mil tac yic'ot ti' tojlel jo'jo'c'al tac yic'ot ti' tojlel lujump'ejl i yuxc'al tac yic'ot ti' tojlel lujuntiquil tac,

²⁶ tsi' cha'leyob meloñel ti pejtelel ora ti' tojlel i pi'ʌlob. Jiñi tsʌts tac bʌ tsi' su'beyob Moisés; jiñi mach bʌ wocolic ti' melol tsi' bajñel toj-esayob.

²⁷ Ti wi'il Moisés tsa' majli i cʌy ti bij i ñij-al che' bʌ tsa' sujti ti' lumal.