Exodo 17 - Jiñi Tsiji' bʌ Wen T'añ cha'añ Estudio

Tsa' loq'ui ja' ti xajlel

¹ Pejtelel jiñi israelob tsi' techeyob i xʌmbal ya' ti tiquiñal lum i c'aba' Sin, c'unte' c'unte' tsi' xʌñʌyob majlel che' bajche' tsi' su'beyob lac Yum; tsa' c'otiyob ti jijlel ya' ti Refidim ya' ba' ma'añic ja' cha'añ mi' japob.

² Jiñi cha'añ jiñi israelob tsi' yʌ'leyob Moisés, tsi' su'beyob: —Aq'ueñon lojon ja' cha'añ mic jap lojon. Moisés tsi' jac'beyob: —¿Chucoch mi la' wʌ'leñon? ¿Chucoch mi la' wilʌben i pusic'al lac Yum?

³ Jiñi cha'añ jiñi wiñicob x'ixicob tsa' tiquiyob i ti', tsi' cha'leyob wulwul t'añ ti' contra Moisés, tsi' yʌlʌyob: —¿Chucoch tsa' pʌyʌyon lojon loq'uel ti Egipto cha'añ ma' tsʌnsañon lojon ti tiquinti' yic'ot calobil lojon yic'ot cʌlac' lojon?

⁴ Jiñi cha'añ Moisés c'am tsi' pejca lac Yum, tsi' yʌlʌ: —¿Chuqui yom mic melbeñob ili wiñicob x'ixicob? ¡Ts'ita' jax yom cha'añ mi' juloñob ti xajlel!

⁵ Lac Yum tsi' jac'be Moisés: —Cucu ti' tojel wiñicob x'ixicob, pʌyʌ majlel lamital jiñi xñoxob año' bʌ ti Israel; ch'ʌmʌ majlel ja'el a barajte' tsa' bʌ a c'ʌñʌ a jats' jiñi ja' i c'aba' Nilo. Cucu ti ora.

⁶ Ya'i mi caj c cajñel a wic'ot ya' ba'añ jiñi xajlel am bʌ ti Horeb; mi caj a jats' jiñi xajlel, ya'i mi caj i loq'uel ja' cha'añ mi' japob wiñicob x'ixicob. Che'ʌch tsi' mele Moisés che' bʌ ya' añob jiñi xñoxob ti Israel.

⁷ Ya' baqui tsa' ujti iliyi tsa' otsʌbenti i c'aba' ti Masah yic'ot ti Meriba, cha'añ ti' caj tsi' cha'leyob mich'ajel jiñi israelob yic'ot cha'añ tsi' yilʌbeyob i pusic'al lac Yum che' bʌ tsi' yʌlʌyob: “¿Wʌ' ba' añ lac Yum la' quic'ot o ma'añic?”

Guerra ti' contra amalecob

⁸ Ti wi'il tsa' tiliyob amalecob, tsi' cha'leyob guerra ti' contra israelob ya' ti Refidim.

⁹ Moisés tsi' su'be Josué: —Yajcan lamital wiñicob cha'añ ma' pʌyob majlel ti guerra ti' contra amalecob. Ijc'ʌl mi caj c wa'tʌl ti' pam wits, mi caj c chuc tij c'ʌb i barajte' Dios.

¹⁰ Josué tsi' mele che' bajche' tsi' su'be Moisés, tsa' majli i contrajiñob ti guerra amalecob. Moisés yic'ot Aarón yic'ot Hur tsa' letsiyob ti' pam wits.

¹¹ Che' bʌ tsi' letsa i c'ʌb Moisés tsa' mʌjli i cha'añ israelob; pero che' bʌ tsi' ju'sa i c'ʌb, tsa' mʌjli i cha'añ amalecob.

¹² Come tsa' lujb-a i c'ʌb Moisés, jiñi cha'añ tsi' yʌc'ʌyob jump'ejl xajlel cha'añ mi' buchtan, pero Aarón yic'ot Hur tsi' ch'uybeyob i c'ʌb Moisés, jujuntiquil ti jujunwejl; che' jiñi chʌn sʌts'ʌl tsa' cʌle i c'ʌb Moisés c'ʌlʌl tsa' bʌjli q'uiñ.

¹³ Che' jiñi Josué tsi' jisa jiñi amalecob ti espada.

¹⁴ Jiñi cha'añ lac Yum tsi' su'be Moisés: —Ts'ijban ti juñ chuqui tsa' ujti cha'añ mi' chʌn ña'tʌntel yic'ot su'ben Josué cha'añ mi caj c laj jisan amalecob ti pañimil cha'añ ma'añic mi' chʌn ña'tʌntelob.

¹⁵ Ti wi'il Moisés tsi' mele jump'ejl pulʌntib, tsa' bʌ i yotsʌbe i c'aba' ti Jehová-nisi,

¹⁶ tsi' yʌlʌ: “Cha'añ ti' caj tsi' letsa i c'ʌb Amalec ti' contra i buchlib lac Yum, jiñi cha'añ lac Yum mi caj i cha'len guerra ti' contra i p'olbal Amalec ti' lajm ti' lajm.”