Exodo 16 - Jiñi Tsiji' bʌ Wen T'añ cha'añ Estudio

Dios tsi' yʌq'ueyob maná

¹ Pejtelel jiñi israelob tsa' loq'uiyob ti Elim, tsa' c'otiyob ti' tiquiñal lum i c'aba' Sin am bʌ ti ojlil Elim yic'ot Sinaí, tsa' c'otiyob che' ti' jo'lujump'ejlel tsic che' ti' cha'p'ejlel uw che' loq'uemobix ti Egipto.

² Ya' ti tiquiñal lum, pejtelel jiñi israelob tsi' cha'leyob wulwul t'añ ti' contra Moisés yic'ot Aarón.

³ Jiñi israelob tsi' su'beyob: —Uts'at tsa'ic i tsʌnsayon lojon lac Yum ya' ti' lumal Egipto, ba' tsa' buchleyon lojon ti c'ux waj yic'ot we'elʌl añ tac bʌ ti p'ejt, jinto tsa' ñaj-ayon lojon, pero tsa'ix a pʌyʌyon lojon tilel ba'añ i tiquiñal lum cha'añ ma' tsʌnsan ti wi'ñal pejtelel ili wiñicob x'ixicob.

⁴ Lac Yum tsi' su'be Moisés: —Awilan, mi caj c chocbeñetla tilel waj tilem bʌ ti panchan. Jiñi wiñicob x'ixicob mi caj i loq'uelob cha'añ mi' tempañob bajche' c'amel mi' c'uxob ti jujump'ejl q'uiñ, cha'añ mij q'uel mi woli i jac'ob c mandar o mi ma'añic.

⁵ Pero che' ti' wʌcp'ejlel q'uiñ mi caj la' tempan i bʌl la' ñʌc' cha'añ cha'p'ejl q'uiñ.

⁶ Jiñi cha'añ Moisés yic'ot Aarón tsi' su'beyob israelob: —Che' ti ic'ajel mi caj la' ña'tan cha'añ lac Yum tsi' pʌyʌyetla loq'uel ti Egipto,

⁷ che' ti sʌc'ajel mi caj la' q'uel i ñuclel lac Yum, come tsi' yu'bi che' woliyetla ti wulwul t'añ ti' contra; come ¿chuqui c mul lojon cha'añ mi la' cha'len wulwul t'añ tij contra lojon?

⁸ Moisés tsi' cha' alʌ: —Lac Yum mi caj i yʌq'ueñetla la c'ux we'elʌl che' ti ic'ajel yic'ot che' ti sʌc'ajel mi caj i yʌq'ueñetla waj che' bajche' c'amel la' wom, come lac Yum tsi' yu'bi che' bʌ tsa' la' cha'le wulwul t'añ ti' contra; come ¿chuqui c mul lojon? Ma'añic tsa' la' cha'le wulwul t'añ tic tojlel lojon, pero tsa' la' cha'le ti' contra lac Yum.

⁹ Ti wi'il Moisés tsi' su'be Aarón: —Su'beñob pejtelel israelob: “Lʌc'tesan la' bʌ ti' tojlel lac Yum, come tsi' yu'bi che' bʌ tsa' la' cha'le wulwul t'añ.”

¹⁰ Che' bʌ Aarón woli to i pejcañob jiñi israelob, tsi' q'ueleyob pañimil ya' ti' tojel colem bʌ i tiquiñal lum, awilan, tsa' tsictiyi i ñuclel lac Yum ya' ti tocal.

¹¹ Lac Yum tsi' su'be Moisés:

¹² —Tsa'ix cu'bibeyob che' bʌ tsi' cha'leyob wulwul t'añ jiñi israelob. Su'beñob: “Che' ti ic'ajel mi caj la' c'ux we'elʌl, che' ti sʌc'ajel mi caj la' ñaj-añ ti waj. Che' jiñi mi caj la' ña'tan joñon la' Yumon la' Dioson.”

¹³ Che' ti ic'ajel tsa' tili ca'bʌl xculucab ti pejtelel xchumtʌl, che' ti sʌc'ajel tsa' ju'bi tilel ye'eb ya' ti' joytʌlel.

¹⁴ Che' bʌ tsa' tijq'ui ti ju'bel ye'eb, ya' ti pam i tiquiñal lum tsi' pʌsʌ i bʌ junchajp biq'uit tac bʌ, selel tac che' bajche' i ña'al tsʌñal.

¹⁵ Che' bʌ tsi' q'ueleyob jiñi israelob, tsi' c'ajtibeyob i bʌ: ¿Chuqui iliyi?, Come mach yujilobic chuqui jiñi. Jiñi cha'añ Moisés tsi' su'beyob: —Jiñʌch i bʌl la' ñʌc' tsa' bʌ i yʌq'ueyetla lac Yum cha'añ mi la' c'ux.

¹⁶ Jiñʌch tsa' bʌ i yʌlʌ lac Yum: “Tempanla ti jujuntiquiletla che' bajche' c'amel mi la' c'ux, che' bajche' cha'p'ejl kilo ti jujuntiquil, che'ʌch bajche' jaytiquiletla ti jujump'ejl otot.”

¹⁷ Che'ʌch tsi' meleyob jiñi israelob, lamital oñ tsi' tempayob, yaño' bʌ mach oñic tsi' tempayob.

¹⁸ Che' bʌ tsi' laj p'isiyob jasʌl cha'añ pejtelelob, ma'añic tsa' colojbaji jiñi oñ bʌ tsi' tempa, mi tsa'ic jili jiñi ts'ita' jach bʌ tsi' tempa; ti jujuntiquil tsi' tempayob che' bajche' c'amel tsa' mejli i c'uxob.

¹⁹ Ti wi'il Moisés tsi' su'beyob: —Mach yomic mi' la' lot mi ts'ita'ic cha'añ ijc'ʌl.

²⁰ Pero ma'añic tsi' jac'beyob Moisés, cha'tiquil uxtiquil tsi' lotoyob lamital cha'añ i yijc'ʌlal; pero tsa' p'ojli i motso'lel, tsa' tuw-a, jiñi cha'añ Moisés tsa' mich'a ti' tojlelob.

²¹ Ti jujump'ejl sʌc'ajel tsi' tempayob i bʌl i ñʌc' ti jujuntiquil che' bajche' c'amel tsa' mejli i c'uxob; pero che' c'uxix q'uiñ, tsa' ulmʌ.

²² Che' ti' wʌcp'ejlel q'uiñ oñ tsi' tempayob i bʌl i ñʌc' cha'añ cha'p'ejl q'uiñ, jiñʌch che' bajche' chʌmp'ejl kilo ti jujuntiquil. Pejtelel año' bʌ i ye'tel ti' jujunmojt ti' tojlel israelob tsa' majliyob cha'añ mi' su'beñob Moisés.

²³ Moisés tsi' su'beyob: —Lac Yum tsi' yʌlʌ che' bajche' iliyi: “Ijc'ʌl jiñʌch i q'uiñilel c'aj-o, jiñʌch ch'ujul bʌ c'aj-o cha'añ mi la' ch'ujutesan lac Yum; jiñi yom bʌ mi la' ch'ʌx, ch'ʌxʌla wʌle, jiñi yom bʌ mi la' pojpon, pojponla wʌle; pejtelel i colojbal, lotola cha'añ i yijc'ʌlal.”

²⁴ Jiñi israelob tsi' lotoyob cha'añ mi' c'uxob ti yijc'ʌlal che' bajche' tsi' yʌlʌ Moisés, ma'añic tsa' p'ojli i motso'lel yic'ot ma'añic tsa' tuw-a.

²⁵ Jiñi cha'añ tsi' yʌlʌ Moisés: —C'uxula, come wʌle jiñʌch i q'uiñilel c'aj-o cha'añ lac Yum; wʌle ma'añic chuqui mi caj la' taj ya' ti lum.

²⁶ Wʌcp'ejl q'uiñ mi caj la' tempan i bʌl la' ñʌc', pero che' ti' wucp'ejlel q'uiñ ma'añic chuqui mi' cajel la' taj, come jiñʌch i yorajlel c'aj-o.

²⁷ Pero lamital wiñicob x'ixicob tsa' loq'ui i sʌclañob i bʌl i ñʌc' che' ti' wucp'ejlel q'uiñ, pero ma'añic chuqui tsi' tajayob.

²⁸ Jiñi cha'añ lac Yum tsi' su'be Moisés: —¿Jayp'ejl to ora mi caj i chʌn ñusʌbeñoñob c mandar ili wiñicob x'ixicob?

²⁹ Ña'tanla, cha'añ lac Yum tsa'ix i yʌq'ueyetla i q'uiñilel c'aj-o, come che' ti' wʌcp'ejlel q'uiñ oñ mi yʌq'ueñetla waj cha'añ jasʌl cha'añ cha'p'ejl q'uiñ. Cʌlenla ti la' chumlib ti jujuntiquiletla, che' ja'el ma'añic majqui yom mi' loq'uel ti yotot che' ti' wucp'ejlel q'uiñ.

³⁰ Jiñi cha'añ jiñi wiñicob x'ixicob tsi' c'ajayob i yoj che' ti' wucp'ejlel q'uiñ.

³¹ Jiñi israelob tsi' yotsʌbeyob i c'aba' ili waj ti “maná”; lajalʌch bajche' i wut xculanta, sʌsʌc yic'ot lajalʌch i sumuclel che' bajche' waj melbil bʌ yic'ot cha'b.

³² Ti wi'il Moisés tsi' yʌlʌ: —Jiñʌch i mandar lac Yum tsa' bʌ i yʌlʌ: “Yom mi la' tempan cha'p'ejl kilo maná cha'añ mi la' lot, cha'añ mi' q'uelob la' p'olbalob bajche' yilal jiñi waj tsa' bʌ cʌq'ueyetla ti' tiquiñal lum che' bʌ tsa' c pʌyʌyetla loq'uel ti' lumal Egipto.”

³³ Moisés tsi' su'be Aarón: —Ch'ʌmʌ tilel jump'ejl chiquib, otsan cha'p'ejl kilo maná; ac'ʌla ti' tojlel lac Yum, che' jiñi lotbil mi yajñel cha'añ la' p'olbalob.

³⁴ Aarón tsi' loto jiñi maná ya' ti' t'ejl jiñi cha'q'uejl xajlel ba' ts'ijbubil jiñi mandar, che' bajche' lac Yum tsi' yʌq'ue mandar Moisés.

³⁵ Che'ʌch tsi' c'uxuyob maná jiñi israelob cha'añ cha'c'al ja'b, jinto tsa' c'otiyob ti' lum ba' mi' mejlelob ti chumtʌl; tsi' c'uxuyob maná jinto tsa' c'otiyob ba' jaxʌl i lumal Canaán.

³⁶ I c'aba' jiñi p'isoñib jiñʌch gomer.