Exodo 15 - Jiñi Tsiji' bʌ Wen T'añ cha'añ Estudio

I c'ay tac Moisés yic'ot María

¹ Jiñi cha'añ Moisés yic'ot israelob tsi' c'ʌyiyob lac Yum yic'ot ili c'ay: “Mi caj j c'ʌyin lac Yum, come ti' p'ʌtʌlel tsa' mʌjli i cha'añ; tsa'ix i choco ochel ti mar jiñi caballo tac yic'ot c'ʌchʌlo' bʌ.

² Lac Yum c p'ʌtʌlelʌch mu' bʌ j c'ʌyin, jiñʌch xcoltaya c cha'añ. Jiñʌch c Dios, mu' bʌ caj j c'ʌyin; jiñʌch i Dios c tat, mu' bʌ c su'b i ñuclel.

³ Lac Yum wen yujil guerra. I c'aba'ʌch lac Yum.

⁴ Tsi' choco ochel ti mar i carreta tac faraón yic'ot i soldadojob. Tsa' chʌmiyob ti Chʌchʌc bʌ Mar jiñi yajcʌbilo' bʌ cha'añ guerra.

⁵ Tsa' mujlʌyiyob ti tam bʌ ja'. Lajal bajche' xajlel tsa' ju'biyob ti ye'bal tam bʌ ja'.

⁶ C Yum, jiñi ñoj bʌ a c'ʌb, tsi' wen tsictesa a p'ʌtʌlel. C Yum, jiñi ñoj bʌ a c'ʌb, tsi' pets' ye'e a contra.

⁷ Cha'añ ti' ñuclel a p'ʌtʌlel tsa' jisa jiñi tsa' bʌ i contrajiyet. Tsa' choco ju'bel a mich'ajel, tsa' pulu che' bajche' i yopol te'.

⁸ Che' bʌ tsa' wujta, tsi' tempayob i bʌ jiñi ja'. Jiñi wʌlʌcña bʌ ja' tsa' wa'le che' bajche' ts'ajc. Jiñi tam bʌ ja' tsa' tsʌts-a ya' ti yojlil jiñi mar.

⁹ Jiñi xcontra tsi' yʌlʌ: Mi caj cajñesañob majlel, mi caj c chucob. Mi caj c t'oxben lojon c bʌ i chu'bʌañob. Mi caj c mel chuqui com ti' tojlelob. Mi caj c loc'san quespada, cha'añ mic jisañob.

¹⁰ Tsa' wujtayob ti ic', tsa' mujlʌyiyob ti mar, tsa' sujp'iyob ochel che' bajche' tsucu taq'uiñ ti jiñi p'ʌtʌl bʌ ja'.

¹¹ ¿Am ba yam bʌ diosob lajal bʌ bajche'et c Yum? ¿Am ba yam bʌ ñuc bʌ, ch'ujul bʌ che' bajche' Jatet, bʌbʌq'uen bʌ mi pʌs wen bʌ i melbal?

¹² Che' bʌ tsa' sʌts'ʌ ñoj bʌ a c'ʌb, jiñi lum tsi' mʌsayob.

¹³ Ti yutslel a pusic'al tsa' pʌyʌ majlel a cha'año' bʌ mʌmbilo' bʌ a cha'añ. Ti a p'ʌtʌlel tsa' pʌyʌyob majlel ba'añ ch'ujul bʌ a chumlib.

¹⁴ Jiñi año' bʌ ti tejclum tac mi caj i yu'biñob, tsiltsilña mi' cajelob. Jiñi filisteojob mi caj i yu'biñob wocol ya' ti' lumal.

¹⁵ Jiñi cha'añ jiñi yumʌlob ti Edom mi' cajelob ti bʌq'uen, jiñi ch'ejlo' bʌ ti Moab mi' cajelob ti tsiltsilñʌyel, mi caj i jilelob i ch'ejlel pejtelel año' bʌ ti Canaán.

¹⁶ ¡La' tilic bʌq'uen yic'ot tsiltsilñʌyel ti' tojlelob! Che' mi q'uelob i p'ʌtʌlel a c'ʌb, la' ñʌjch'icob che' bajche' xajlel, jinto che' ñumeñobix a tejclum, c Yum, jinto mi' c'otelob a tejclum tsa' bʌ a mʌñʌyob.

¹⁷ Jatet mi caj a pʌyob ochel yic'ot mi caj a wʌc'ob ti chumtʌl ya' ti wits yajcʌbil bʌ a cha'añ, ya' ti lum chajpʌbil bʌ a cha'añ, c Yum, ya' ba'añ a chumlib, ya' ti ch'ujul bʌ a wajñib c Yum, wa'chocobil bʌ a cha'añ ti a c'ʌb.

¹⁸ ¡Lac Yum mi' caj i cha'len yumʌntel ti pejtelel ora, ma'añic i jilibal!”

¹⁹ Che' bʌ faraón tsa' ochi ti mar che' c'ʌchʌl ti caballo yic'ot i carreta tac temel yic'ot i soldadojob, lac Yum tsi' cha' tempa jiñi ja' cha'añ mi' mujlañob, pero jiñi israelob tsa' ñumiyob ti tiquin lum ya' ti yojlil mar.

²⁰ Jiñi cha'añ María jiñi x'ixic bʌ x'alt'añ, i yijts'in Aarón, tsi' ñijca pandero am bʌ ti' c'ʌb, yic'ot pejtelel jiñi x'ixicob tsi' tʌp'leyob majlel, tsi' ñijcayob majlel pandero ja'el yic'ot tsi' cha'leyob majlel son.

²¹ Ixcu María tsi' c'ʌyi ili c'ay: “C'ʌyinla lac Yum, come tsa' tsictiyi i ñuclel; tsi' choco ochel ti mar jiñi caballo tac yic'ot c'ʌchʌlo' bʌ.”

2. JIÑI ISRAELOB WOLI I XɅÑɅYOB MAJLEL TI TOJEL WITS I C'ABA' SINAÍ ( 15.22—18.27 ) Jiñi ch'aj bʌ ja' am bʌ ti Mara

²² Moisés tsi' pʌyʌ majlel israelob, tsi' cʌyʌyob jiñi Chʌchʌc bʌ Mar. Tsa' majliyob ti' tiquiñal lum i c'aba' Shur, uxp'ejl q'uiñ tsi' cha'leyob xʌmbal ya' ti' tiquiñal lum pero ma'añic tsi' tajayob ja'.

²³ Che' bʌ tsa' c'otiyob ti Mara, ma'añic tsa' mejli i japob jiñi ja' ya' bʌ añ ya'i come ch'aj, jiñi cha'añ tsi' yotsʌbeyob i c'aba' ti Mara.

²⁴ Jiñi cha'añ jiñi israelob tsa' cajiyob ti wulwult'añ ti' contra Moisés, tsi' su'beyob: “¿Chuqui mi mejlel lac jap?”

²⁵ Jiñi cha'añ Moisés c'am tsi' pejca lac Yum, ixcu lac Yum tsi' pʌsbe juntejc te'; Moisés tsi' choco ochel ti ja', jiñi ja' tsa' tsaj-a. Ya'i lac Yum tsi' yʌq'ueyob i mandar yic'ot tsi' q'uelbeyob i xuc'tʌlel i pusic'al.

²⁶ Tsi' yʌlʌ: “Mi xuc'ul mi la' jac'beñon c t'añ yic'ot mi toj chuqui mi la' mel tic wut, mi tsa' la' wen ñʌch'ta c mandar yic'ot mi tsa' la' jac'ʌ pejtelel j cʌntesʌbal, ma'añic mi caj cʌq'ueñetla mi junchajpic c'am-ʌjel tsa' bʌ c choco c'otel ti' tojlel egiptojob, come Joñon Yumʌlon, mu' bʌ c lajmesañetla.”

²⁷ Ti wi'il tsa' c'otiyob ti Elim, ya' baqui añ lajchʌmp'ejl ba' woli i loq'uel cuxul bʌ ja' yic'ot lujuntejc i chʌnc'al (70) palmera; ya'i tsa' jijliyob ya' ti ti' jiñi ja'.