Exodo 11 - Jiñi Tsiji' bʌ Wen T'añ cha'añ Estudio

Mi caj i chʌmel ascuñʌlo' bʌ

¹ Lac Yum tsi' su'be Moisés: —Mi caj choc tilel yam bʌ junyajl i tic'lʌntel faraón yic'ot egiptojob, ti wi'il mi caj i yʌq'uetla ti loq'uel. Ti isujm mi caj i choquetla loq'uel ti junyajlel.

² Su'beñob pejtelel israelob, wiñico' bʌ x'ixico' bʌ cha'añ mi' c'ajtiben i pi'ʌlob ti chumtʌl i ch'ʌjlib melbil tac bʌ ti plata yic'ot ti oro.

³ Lac Yum tsi' ñijcʌbeyob i pusic'al egiptojob cha'añ mi' pʌsbeñob i yutslel i pusic'al jiñi israelob. Che' ja'el Moisés wen ñuc tsa' q'uejli ti pejtelel i lumal egiptojob, wen ñuc ti' wut i wiñicob faraón yic'ot ti' wut pejtelel egiptojob.

⁴ Moisés tsi' su'be faraón: —Lac Yum woli' yʌl: “Che' ti yojlil ac'ʌlel mi caj c ñumel ti' lumal egiptojob,

⁵ mi caj i chʌmel pejtelel ascuñʌlo' bʌ ti Egipto, mi' tejchel ti ascuñʌl bʌ i yalobil faraón c'ʌlʌl ti ascuñʌl bʌ i yalobil jiñi mozo bʌ x'ixic woli bʌ ti e'tel ti molino, yic'ot ja'el pejtelel ñaxan bʌ alʌc'ʌl tac.

⁶ Mi caj i cha'leñob c'am bʌ uq'uel ti pejtelel i lumal Egipto, mach bʌ añic ba' ora ujtem, mi añic ba' ora mi caj i cha' ujtel lajal bʌ bajche' jiñi.

⁷ Pero ma'añic chuqui mi caj i tumbentelob israelob, mi wiñic, mi bʌte'el, mi juncojtic ts'i' mi' caj ti woj, cha'añ ma' ña'tan mach lajalic mi' q'uel lac Yum jiñi egiptojob bajche' israelob.”

⁸ Che' jiñi pejtelel a pi'ʌlob ti e'tel mi caj i tilelob ba'añon, mi caj i c'uchchocoñob i bʌ tic tojlel, mi caj i yʌlob: “Cucux, jatet yic'ot pejtelel a pi'ʌlob año' bʌ ti a wenta.” Che' mi yujtel iliyi mi caj c loq'uel. Moisés wen mich' tsa' loq'ui ti' tojlel faraón.

⁹ Ti wi'il lac Yum tsi' su'be Moisés: —Jiñi faraón ma'añic mi caj i jac'beñet, come yom mic pʌs ca'bʌl ñuc tac bʌ c p'ʌtʌlel ti' lumal Egipto.

¹⁰ Moisés yic'ot Aarón tsi' pʌsʌyob pejtelel ili bʌbʌq'uen tac bʌ i p'ʌtʌlel ti' tojlel faraón, pero ma'añic tsi' chocoyob loq'uel ti' lumal come lac Yum tsi' tsʌts-esʌbe i pusic'al faraón.