Efesios 4 - Jiñi Tsiji' bʌ Wen T'añ cha'añ Estudio

2. I CUXTɅLEL XÑOPT'AÑOB ( 4.1—6.20 ) Juntiquil jach bʌ Espíritu

¹ Joñon xñujp'elon cha'añ lac Yum, ti wocol t'añ mic su'beñetla cha'añ mi la' wajñel che' bajche' yom Dios, come jiñi cha'añ tsi' pʌyʌyetla,

² jiñi cha'añ ajñenla ti pec' ti yutslel la' pusic'al, chʌn cuchbenla i sajtemal la' pi'ʌlob ti la' c'uxbiya,

³ cha'lenla wersa cha'añ ñʌch'ʌl mi la' wajñel ti jump'ejl jach la' pusic'al ti jiñi Espíritu;

⁴ jump'ejlʌch i bʌc'tal Cristo ba' ochemonla, juntiquil Espíritu, pʌybiletla cha'añ mi la' wajñel ti junsujm jach la' pijtaya come jiñi cha'añ tsi' pʌyʌyetla Dios;

⁵ juntiquil lac Yum, junsujm jach woli bʌ lac ñop, junsujm jach ch'ʌmja',

⁶ juntiquil jach Dios, lac Tat ti lac pejtelel, i yumʌch wiñicob, mi' cha'len i ye'tel ti' tojlel pejtelel wiñicob x'ixicob, mi' yajñel ti la' pusic'al ti la' pejtelel.

⁷ Ti jujuntiquilonla Dios tsi' yʌq'ueyonla i yutslel i pusic'al che' bajche' lac majtañ tsa' bʌ i t'oxbeyonla Cristo.

⁸ Jiñi cha'añ tsi' yʌlʌ ti salmo: “Che' bʌ tsa' letsi majlel Cristo ti panchan, tsi' pʌyʌ majlel cʌchbilo' bʌ ti yam bʌ ora, yic'ot tsi' yʌq'ueyob i c'ʌjñibal wiñicob x'ixicob.”

⁹ Jiñi tsa' bʌ letsi majlel ti panchan, ¿mach ba' ñaxañic tsajñi ti ye'bal lum?

¹⁰ Jiñi tsa' bʌ ju'bi tilel, jiñʌch tsa' bʌ letsi majlel ti' chañelal tac panchan cha'añ mi' laj but' ti pejtelel.

¹¹ Jiñʌch jiñi tsa' bʌ i yʌq'ueyob i ye'tel wiñicob: ti apóstolob, ti x'alt'añob, ti subt'añob, ti xcʌntayajob, yic'ot ti xcʌntesajob,

¹² laj wa'chocobilob ti' pejtelel cha'añ mi' cʌntesañob i cha'año' bʌ Dios, cha'añ mi' cha'libeñob i ye'tel, cha'añ mi' p'ʌt-an majlel i bʌc'tal Cristo,

¹³ jinto mi lac ñop ti jump'ejl jach lac pusic'al cha'añ mi laj cʌn i Yalobil Dios ti pejtelonla, jinto mi lac taj laj colel ti Cristo cha'añ mi lac tsictesan i ñuclel che' junlajalonla yic'ot.

¹⁴ Che' jiñi mach chʌn aloboñixla, mach yomix mi lac chʌn ñijcʌyel cha'añ i cʌntesa wiñicob che' bajche' i yopol te' mu' bʌ i wejlan majlel ic', mayajax mi' melob i bajñel sojquemal cha'añ mi' lotiñonla,

¹⁵ pero joñonla mi lac su'b isujmlel yic'ot c'uxbiya, mi lac taj laj colel ti Cristo ti pejtelel chuqui yom, come jiñʌch lac jol,

¹⁶ pejtelel i bʌc'tal Cristo mi' taj i p'ʌtʌlel ti' jol, che' mi' jac'ben i jol yic'ot pejtel chucbil tac bʌ ti' bʌc'tal, tsuyulʌch mi' yajñel yic'ot i p'aquel, che' uts'atʌch mi' mel i ye'tel, mi' wen colel yic'ot ca'bʌl i p'ʌtʌlel yic'ot ca'bʌl c'uxbiya che' bajche' yom.

Tsiji' bʌ laj cuxtʌlel ti Cristo

¹⁷ Jiñi cha'añ mic su'beñetla ti lac Yum, mach yomic mi la' chʌn ajñel che' bajche' yaño' bʌ gentilob, sojquem jax bʌ i ña'tʌbal,

¹⁸ añob ti ac'ʌlel yilal, ma'añic mi' ch'ʌmbeñob isujm, come ma'añobic i cuxtʌlel ch'oyol bʌ ti Dios, mach i cʌñʌyobic come tsʌtsob jax i pusic'al;

¹⁹ ma'añobix i quisin, tsa' ñʌm-ayob i pusic'al ti mulil, tsa'ix i junyajlel ac'ʌyob i bʌ ti melol jontolil, wo'ob jax ti jujunchajp i bi'bi'lel.

²⁰ Pero jatetla ma'añic tsa' la' cʌñʌ Cristo cha'añ mi la' wajñel che' bajche' jiñi,

²¹ mi ti isujm tsa'ix la' wu'bibe i t'añ, yic'ot tsa'ix cʌntesʌntiyetla che' bajche' yom mi la' wajñel ti isujmlel am bʌ ti Jesús;

²² jiñi cha'añ yom mi la' cʌy i tsuculel la' pusic'al tsa' bʌ i lotiyetla che' bʌ tsa' la' jac'ʌ ti yam bʌ ora, come tuwix yu'bil cha'añ i colosojlel,

²³ jiñi cha'añ la' mejlic la' pusic'al ti tsijib yic'ot la' ña'tʌbal,

²⁴ yom mi la' ch'ʌm tsiji' bʌ la' pusic'al melbil bʌ ti toj ti isujm cha'añ ch'ujul mi la' wajñel che' bajche' Dios.

²⁵ Jiñi cha'añ cʌyʌla lot. Cha'lenla t'añ ti isujm ti jujuntiquiletla yic'ot la' pi'ʌlob, come lac pi'ʌlʌch lac bʌ.

²⁶ Mi tsa' mich'ayetla, mach la' cha'len mulil; mach yomic c'ʌlʌl mich'etla che' mi' bʌjlel q'uiñ,

²⁷ mach yomic mi la' wis jamben la' pusic'al xi'ba.

²⁸ Jiñi tsa' bʌ i cha'le xujch' mach i chʌn cha'len, la'ix i cha'len e'tel, la'ix i c'ʌn i c'ʌb cha'añ wen bʌ i ye'tel, che' jiñi mi mejlel i yʌq'ueñ i chu'bʌañ jiñi añ to bʌ yom i cha'añ.

²⁹ Mach yomic mi la' c'ʌn la' wej ti leco t'añ, yom jach mi la' wʌl chuqui uts'at cha'añ mi la' p'ʌt-esan jiñi mu' bʌ i yu'biñob, cha'añ mi la' wʌq'ueñob i yutslel i pusic'al.

³⁰ Mach la' wʌq'uen i ch'ijiyemlel i pusic'al jiñi Ch'ujul bʌ Espíritu tsa' bʌ la' taja ti Dios, come jiñʌch la' sellojlel ti jiñi tal to bʌ q'uiñ che' mi caj la' coltʌntel.

³¹ Cʌyʌla ti junyajlel: ts'a'leya, mich'ajel, a'leya, mich' bʌ t'añ, u'yaj t'añ, yic'ot pejtelel jontolil.

³² Yom mi la' coltañ la' pi'ʌlob ti' yutslel la' pusic'al, p'untan la' pi'ʌlob, ñusʌben la' bʌ la' mul che' bajche' Dios tsi' ñusʌbeyetla la' mul ti Cristo.