Efesios 3 - Jiñi Tsiji' bʌ Wen T'añ cha'añ Estudio

I ye'tel Pablo ti' tojlel gentilob

¹ Joñon Pablojon, xñujp'elon i cha'añ Cristo Jesús cha'añetla gentilet bʌ la;

² mi cʌl, tsa'ix la' wu'bi bajche' tsa' aq'uentiyon que'tel cha'añ mi cʌq'ueñetla la' cʌn i yutslel i pusic'al Dios;

³ Dios tsi' pʌsbeyon isujmlel mach bʌ tsictiyemic ti yam bʌ ora, tsa'ix c ts'ita' ts'ijbubeyetla che' bajche' ti ñaxan.

⁴ Che' mi la' q'uel jiñi juñ tsa' bʌ c ts'ijba, mi mejlel la' ch'ʌmben isujm jiñi mucul tac bʌ tsa' bʌ i cʌntesayon Cristo,

⁵ mach bʌ añic tsa' aq'uentiyob i cʌn jiñi wiñicob ti yam bʌ ora, pero wʌle jiñi Espíritu tsa'ix i tsictesʌbeyob jiñi ch'ujul bʌ apóstolob yic'ot x'alt'añob i cha'añ:

⁶ Jiñʌch isujmlel cha'añ lajal mi caj i yʌq'ueñtelob i wenlel gentilob yic'ot israelob, come jump'ejlobix i bʌc'tal yic'ot Cristo Jesús, mi caj i tem aq'uentelob ti Cristo chuqui albil ti jiñi wen t'añ,

⁷ Dios tsi' wa'chocoyon ti' yutslel i pusic'al, tsi' yʌq'ueyon que'tel ti jiñi wen t'añ, cha'añ mi' tsictesan i p'ʌtʌlel tic tojlel.

⁸ Anquese joñon mach ñucoñic che' bajche' yaño' bʌ i cha'año' bʌ Dios, pero tsa' aq'uentiyon que'tel ti yutslel Cristo cha'añ mic su'beñob gentilob jiñi wen t'añ, cha'añ mi' cʌmbeñob i ñuclel Cristo maxto bʌ laj cʌmbilic lac cha'añ,

⁹ jiñi cha'añ mic tsictesʌbeñob pejtelel wiñicob x'ixicob jiñi ñuc bʌ i ye'tel Cristo, jiñʌch jiñi mach bʌ tsictiyemic c'ʌlʌl ti' cajibal pañimil, ba ora Dios tsi' mele pejtelel chuqui tac añ;

¹⁰ cha'añ mi cʌjñel jiñi ñuc tac bʌ i ña'tʌbal Dios tsi' wʌn ña'ta i c'ʌn jiñi xñopt'añob, ti' tojlel yumʌlob yic'ot ángelob año' bʌ i ye'tel ti panchan,

¹¹ che'ʌch tsi' wʌn ña'ta i mel Dios che' maxto añic pañimil, tsa'ix i yʌc'ʌ ti ts'ʌctiyel ti' tojlel Cristo Jesús jiñi lac Yum,

¹² ti lac Yum ch'ejl lac pusic'al mi mejlel la cochel ti' tojlel Dios cha'añ tsa' lac ñopo Cristo;

¹³ jiñi cha'añ mic su'beñetla ti wocol t'añ, cha'añ ma'añic mi la' wʌc' ti lujb-an la' pusic'al cha'añ ili wocol woli bʌ j cuch, come añ i c'ʌjñibal cha'añ mi la' taj la' wenlel.

Jiñi c'uxbiya mu' bʌ i ñumel ti pejtelel lac ña'tʌbal

¹⁴ Jiñi cha'añ mic ñocchocon c bʌ ti' tojlel i Tat [lac Yum Jesucristo]

¹⁵ tsa' bʌ i ch'ʌmbe i c'aba' jujunchajp wiñicob x'ixicob ti panchan yic'ot ti pañimil,

¹⁶ mij c'ajtiben Dios, cha'añ mi yʌq'ueñetla jiñi ñumen ñuc bʌ i ñuclel lac Yum, yic'ot cha'añ mi' p'ʌt-esʌbeñetla la' pusic'al yic'ot jiñi Espíritu,

¹⁷ cha'añ mi' chumtʌl Cristo ti la' pusic'al che' xuc'ul woli la' ñop, cha'añ che' jiñi mi' caj i tam-añ la' wi' yic'ot tsʌts cʌyʌletla ti' c'uxbiya Cristo,

¹⁸ com mi la' ch'ʌmben isujm yic'ot pejtelel i cha'año' bʌ Dios che' bajche' c'amel añ i c'uxbiya Jesús, che' bajche' añ i jawticlel, i ñajtlel, i tamlel, yic'ot i chañlel,

¹⁹ com mi la' cʌmben i c'uxbiya Cristo, jiñi mach bʌ añic i p'isol i ña'tʌbal, cha'añ che' jiñi mi lac tajben i bujt'emal Cristo.

²⁰ Jiñi wen p'ʌtʌl bʌ woli ti e'tel ti lac pusic'al cha'añ mi' mel ñumen ñuc bʌ i ye'tel che' bajche' pejtelel chuqui mi laj c'ajtiben yic'ot pejtelel mu' bʌ lac ña'tan,

²¹ jiñi cha'añ la' sujbic i ñuclel Dios ti' tojlel jiñi xñopt'añob ti Cristo Jesús ti pejtelel ora. Amén.