Deuteronomio 9 - Jiñi Tsiji' bʌ Wen T'añ cha'añ Estudio

Dios mi caj i jisʌben i tejclum tac cananeojob

¹ U'binla israelob: wʌle mi caj la' c'axel ti junwejl Jordán ja' cha'añ mi caj la' wochel la' chilbeñob i tejclum tac wiñicob ñumen ca'bʌlo' bʌ yic'ot ñumen p'ʌtʌlo' bʌ bajche' jatetla yic'ot joy mʌcbil bʌ colem tejclum tac ti chañ tac bʌ ts'ajc,

² colem wiñicob yic'ot wen chañob ja'el, i yalobilobʌch anaceojob, cʌmbilix bʌ la' cha'añ yic'ot u'bibilix bʌ la' cha'añ ili t'añ: “¿Majqui mi' mejlel i coltañ i bʌ ti' tojlel i yalobilob Anac?”

³ Jiñi cha'añ yomix mi la' ña'tan wʌle, cha'añ jiñʌch lac Yum Dios mu' bʌ caj i majlel ti ñaxan ti la' tojlel, che' bajche' c'ajc yujil bʌ jisaya, jiñʌch mu' bʌ caj i jisañob yic'ot mu' bʌ caj i ju'sʌbeñob i pusic'al ti la' tojlel. Jatetla mi caj la' chocob loq'uel ti' lum yic'ot mi caj la' jisañob ti ora, che' bajche' lac Yum tsi' su'beyetla.

⁴ Che' ba' ora lac Yum Dios tsa'ix i choco loq'uel jiñi wiñicob ti la' tojlel, mach mi la' wʌl ti la' pusic'al: “Cha'añ ti' caj tojonla jiñi cha'añ tsi' pʌyʌyonla tilel lac Yum cha'añ mi lac ch'ʌm ili lum”, cha'añ ti' caj i jontolil ili tejclum tac, lac Yum woli i chocob loq'uel ti la' tojlel.

⁵ Mach cha'añic tojetla mi cha'añic wen la' pusic'al mi caj la' wochel ti chumtʌl ti' lumob, pero cha'añ ti' caj jontolob jiñi tejclum tac, lac Yum Dios mi' chocob loq'uel ti la' tojlel yic'ot cha'añ mi' ts'ʌctiyel i t'añ lac Yum tsa' bʌ i wʌn su'beyob la' ñojte'elob, Abraham, Isaac yic'ot Jacob.

⁶ Jiñi cha'añ yom mi la' ña'tan cha'añ lac Yum Dios woli i yʌq'ueñetla ili wen bʌ lum, mach cha'añic toj bʌ la' melbal, come wen tsʌtsatax la' pusic'al.

I ñusa t'añ israelob ya' ti Horeb

⁷ Mach yomic mi' ñajʌyel la' cha'añ, cha'añ tsa' la' techbe i mich'ajel lac Yum Dios ya' ti' tiquiñal lum; c'ʌlʌl ti jiñi q'uiñ che' bʌ tsa' loq'uiyetla ti' lumal egiptojob, c'ʌlʌl che' bʌ tsa' ochiyetla ti ili i tiquiñal lum, tsa'ix la' ñusʌbe i t'añ lac Yum.

⁸ Ya' ti Horeb tsa' la' techbe i mich'ajel lac Yum, jiñi cha'añ lac Yum tsa' mich'a ti la' tojlel, colel i jisañetla.

⁹ Che' bʌ tsa' letsiyon ti wits cha'añ mic ch'ʌm jiñi cha'q'uejl xajlel ba' ts'ijbubil jiñi xuc'ul bʌ i t'añ lac Yum tsa' bʌ i mele ti la' tojlel, tsa' jal-ayon ya' ti wits cha'c'al q'uiñ yic'ot cha'c'al ac'ʌlel che' ma'añic chuqui tsa' j c'uxu yic'ot ma'añic chuqui tsa' c japʌ.

¹⁰ Lac Yum tsi' yʌq'ueyon jiñi cha'q'uejl xajlel tsa' bʌ i ts'ijba ti yal i c'ʌb, ba' ts'ijbubil pejtelel jiñi t'añ tsa' bʌ i yʌlʌ lac Yum ya' ti yojlil c'ajc ti' pam wits che' bʌ tsa' la' tempa la' bʌ ti ye'bal wits.

¹¹ Che' ñumeñix cha'c'al q'uiñ yic'ot cha'c'al ac'ʌlel, lac Yum tsi' yʌq'ueyon jiñi cha'q'uejl xajlel ba' ts'ijbubil jiñi xuc'ul bʌ t'añ,

¹² che' jiñi tsi' su'beyon: “Ch'ojyen, cucux ti ju'bel ti ora, come jiñi wiñicob x'ixicob tsa' bʌ a loc'sa ti' lumal Egipto tsa'ix sojquiyob. Tsa'ix i bʌc' cʌyʌyob jiñi bij tsa' bʌ c su'beyob, yic'ot tsa'ix i meleyob i yejtal i dios.”

¹³ Lac Yum tsi' su'beyon ja'el: “Tsa'ix c wen q'uele cha'añ wen tsʌtsob i pusic'al ili wiñicob x'ixicob.

¹⁴ Tʌts'ʌ a bʌ cha'añ mic jisañob yic'ot cha'añ mic yʌpbeñob i c'aba' ila ti pañimil, yic'ot mi caj c tech ti a tojlel yaño' bʌ wiñicob x'ixicob ñumen p'ʌtʌlo' bʌ yic'ot ñumen ca'bʌlo' bʌ che' bajche' israelob.”

¹⁵ Jiñi cha'añ tsa' bʌc' ju'biyon ti wits, ba' woli ti lejmel c'ajc, chucul c cha'añ ti' cha'ts'ijtlel j c'ʌb jiñi cha'q'uejl xajlel ba' ts'ijbubil jiñi xuc'ul bʌ i t'añ lac Yum.

¹⁶ Che' jiñi tsa' j q'uele tsa'ix la' cha'le mulil ti' tojlel lac Yum Dios: tsa'ix la' mele la' dios wacax, tsa'ix la' bʌc' cʌyʌ i bijlel lac Yum tsa' bʌ i pʌsbeyetla.

¹⁷ Che' jiñi tsa' c ch'ʌmʌ jiñi cha'q'uejl xajlel, ti' cha'ts'ijtlel j c'ʌb tsa' c choco ju'bel yic'ot tsa' c top'o ti la wut.

¹⁸ Ti wi'il tsa' c ñucchoco c bʌ ti' tojlel lac Yum che' bajche' tsa' c mele ti ñaxan, cha'c'al q'uiñ yic'ot cha'c'al ac'ʌlel ma'añic chuqui tsa' j c'uxu yic'ot ma'añic chuqui tsa' c japʌ, cha'añ ti' caj la' mul che' bʌ tsa' la' mele chuqui leco ti' wut lac Yum cha'añ mi la' techben i mich'ajel.

¹⁹ Come tsa' c bʌc'ña jiñi tsʌts bʌ i mich'ajel lac Yum come colel i jisañetla. Pero lac Yum tsa' to i cha' u'bibeyon c t'añ ti jiñi q'uiñ.

²⁰ Lac Yum tsi' mich'le ja'el Aarón, colel i tsʌnsan. Tsa' c taja ja'el ti oración Aarón ti jiñi q'uiñ.

²¹ Ti wi'il tsa' c ch'ʌmʌ jiñi tsa' bʌ i yʌc'ʌyetla ti mulil, jiñʌch i yejtal jiñi wacax tsa' bʌ la' mele, tsa' c pulu ti c'ajc, tsa' c bic'ti top'o, much'ul tsa' j cʌyʌ che' bajche' ts'u'bejn, che' jiñi tsa' c choco jiñi ts'u'bejn ti ja' woli bʌ i ju'bel tilel ti wits.

²² Che' ja'el tsa' la' cha' techbe i mich'ajel lac Yum ya' ti Tabera, yic'ot ti Masah, yic'ot ti Kibrot-hataava.

²³ Che' bʌ ya'añetla ti Cades-barnea che' bʌ tsi' su'beyetla: “Cucula ti chumtʌl ya' ti la' lum tsa' bʌ cʌq'ueyetla”, che' ja'el tsa' la' ñusʌbe i mandar lac Yum Dios, ma'añic tsa' la' ñopo mi tsa'ic la' jac'be i t'añ.

²⁴ Xñusa t'añetla ti' tojlel lac Yum c'ʌlʌl ti jiñi q'uiñ che' bʌ tsa' caji j cʌñetla.

²⁵ Jiñi cha'añ tsa' c cha' ñucchoco c bʌ ti' tojlel lac Yum cha'c'al q'uiñ yic'ot cha'c'al ac'ʌlel, come lac Yum tsi' yʌlʌ mi caj i laj jisañetla.

²⁶ Jiñi cha'añ tsa' c pejca lac Yum ti oración: C Yum Dios, mach a jisan a tejclum, a cha'año' bʌ tsa' bʌ a mʌñʌ ti a ñuclel, tsa' bʌ a pʌyʌyob loq'uel ti Egipto ti p'ʌtʌl bʌ a c'ʌb.

²⁷ C Yum, ña'tan a wiñicob Abraham yic'ot Isaac yic'ot Jacob; mach a q'uelbeñob i tsʌtslel i pusic'al ili wiñicob x'ixicob, mi' jontolil mi' mulobic,

²⁸ ame cajic i yʌlob jiñi wiñicob x'ixicob ba' tsa' loc'sayon lojon tilel: “Jiñi i Yumob ma'añic tsa' mejli i yʌq'ueñob i lum tsa' bʌ i lon su'beyob, come tsi' ts'a'leyob, tsa' jach i loc'sayob ti Egipto cha'añ mi' tsʌnsañob ya' ti' tiquiñal lum.”

²⁹ Pero a cha'añobʌch jiñi israelob, yajcʌbilo' bʌ a cha'añ, tsa' bʌ a loc'sayob ti Egipto ti ca'bʌl a p'ʌtʌlel yic'ot tsa' pʌsbeyob i yejtal tac a p'ʌtʌlel.