Deuteronomio 8 - Jiñi Tsiji' bʌ Wen T'añ cha'añ Estudio

Jiñi wen bʌ lum mu' bʌ caj la' taj

¹ Tsajiletmela, yom mi la' jac' pejtelel jiñi mandar mu' bʌ c su'beñetla wʌle, cha'añ cuxul mi la' wajñel, cha'añ uts'at mi la' p'ojlel yic'ot cha'añ mi la' wochel ti chumtʌl ti jiñi lum mu' bʌ caj i yʌq'ueñetla lac Yum che' bajche' tsi' wʌn su'beyob la' ñojte'elob.

² Yom c'ajal la' cha'añ pejtelel jiñi bij tsa' bʌ la' xʌñʌ ya' ti' tiquiñal pañimil ba' tsi' pʌyʌyetla tilel lac Yum Dios, ili cha'c'al ja'b cha'añ mi' yʌq'ueñetla wocol, cha'añ mi' q'uel la' pusic'al, cha'añ mi' ña'tan chuqui añ ti la' pusic'al, mi mux la' jac'ben i mandar o mi ma'añic.

³ Tsi' yʌq'ueyetla wocol, tsi' yʌq'ueyetla la' wu'bin wi'ñal, pero tsi' yʌq'ueyetla la' c'ux maná mach bʌ cʌmbilic i cha'añ la' ñojte'elob mi jateticla, cha'añ mi' yʌq'ueñetla la' ña'tan mach cojic jach ti waj cuxulob wiñicob x'ixicob, pero cuxul mi' yajñel wiñicob x'ixicob ti pejtelel t'añ mu' bʌ i yʌl Dios.

⁴ Ma'añic tsa' tsuculʌyi la' pislel xojol bʌ la' cha'añ yic'ot ma'añic tsa' sijt'i la' woc anquese tsa' jal-ayetla ti xʌmbal cha'c'al ja'b.

⁵ Yom mi la' ña'tan ti la' pusic'al, che' bajche' wiñic mu' bʌ i ju'sʌben i pusic'al i yalobil, che'ʌch mi' ju'sʌbeñetla la' pusic'al lac Yum Dios.

⁶ Jiñi cha'añ yom mi la' wen jac'ben i mandar lac Yum Dios, yom mi la' chʌn cha'len xʌmbal ti' bijlel yic'ot yom mi la' bʌc'ñan.

⁷ Come lac Yum Dios woli' pʌyetla ochel ti wen bʌ lum baqui añ pa' tac, yic'ot cuxul bʌ ja' mu' bʌ i loq'uel ti joctʌl tac, yic'ot ti bujtʌl tac;

⁸ jiñʌch lum mu' bʌ i yʌc' ti colel trigo yic'ot cebada, yic'ot ts'usub, yic'ot higuera yic'ot te' lajal bʌ i wut che' bajche' alaxax; jiñʌch lum ba' mi' yʌc' i wut olivo te', yic'ot olivo aceite yic'ot cha'b;

⁹ jiñʌch lum ba' mach p'isbilic jach chuqui mi caj la' c'ux yic'ot ba' ma'añic chuqui mi caj i wis sʌjlel la' cha'añ; jiñʌch lum ba' mi caj la' taj hierro ya' ti xajlel tac yic'ot ya' ti bujtʌl tac mi caj la' loc' cobre.

¹⁰ Mi caj la' wen ñaj-añ ti' bʌl la' ñʌc' yic'ot mi caj la' ch'ujutesan lac Yum Dios cha'añ jiñi wen bʌ lum tsa' bʌ i yʌq'ueyetla.

I xic'bentelob cha'añ ma'añic mi' ñajʌyelob i cha'añ lac Yum

¹¹ Tsajin la' bʌ cha'añ ma'añic mi' ñajʌyel la' cha'añ lac Yum Dios, cha'añ ts'ʌcʌl mi la' jac'ben i mandar yic'ot i t'añ woli bʌ c su'beñetla wʌle;

¹² ame che' wen ca'bʌlix chuqui mi la' c'ux yic'ot che' tsa'ix la' mele wen bʌ la' wotot tac,

¹³ yic'ot che' wolix i wen p'ojlel la' wacax yic'ot la' tʌñʌme' yic'ot che' oñix la' plata yic'ot oro yic'ot che' wolix ti p'ojlel pejtelel chuqui añ la' cha'añ,

¹⁴ bʌ'bʌq'uen mi caj la' chañ-esan la' bʌ yic'ot mi caj i ñajʌyel ti la' pusic'al lac Yum Dios tsa' bʌ i loc'sayetla ti' lumal Egipto ba' tsa' la' cha'le majtañ e'tel;

¹⁵ tsa' bʌ i yʌc'ʌyetla ti xʌmbal ti colem bʌ i tiquiñal lum ba' wen bʌ'bʌq'uen, ya' ba'añ ca'bʌl lucum am bʌ i venenojlel yic'ot jontol bʌ siñan; ya' ba' ma'añic ja' che' tiquin la' ti', lac Yum tsi' yʌq'ueyetla ja' tsa' bʌ i loc'sa ti colem bʌ xajlel;

¹⁶ tsa' bʌ i yʌq'ueyetla la' c'ux maná ya' ti' tiquiñal lum, waj mach bʌ añic tsi' q'ueleyob la' ñojte'elob, tsa' bʌ i yʌq'ueyetla wocol yic'ot i q'uelol la' pusic'al, cha'añ mi yʌq'ueñetla la' wenlel ti wi'il,

¹⁷ ame cajic la' wʌl ti la' pusic'al: “Cha'añ ti lac ñuclel yic'ot ti' p'ʌtʌlel laj c'ʌb tsa' lac taja lac chu'bʌañ”;

¹⁸ pero ña'tanla lac Yum Dios, come jiñʌch tsa' bʌ i yʌq'ueyetla la' p'ʌtʌlel ti' tajol la' chu'bʌañ, cha'añ mi' ts'ʌctesan jiñi xuc'ul bʌ i t'añ tsa' bʌ i yʌlʌ ti' tojlel la' ñojte'elob, che' bajche' woli i ts'ʌctesan wʌle.

¹⁹ Pero mi tsa' ñajʌyi la' cha'añ lac Yum Dios, mi tsa' majli la' ñocchocon la' bʌ cha'añ mi la' ch'ujutesan yam bʌ dios tac, isujm mic su'beñetla wʌle, mi caj la' jisʌntel.

²⁰ Come mi caj la' q'uel che' bajche' lac Yum mi caj i jisan jiñi wiñicob ti' mojt ti' mojt, che'ʌch ja'el mi caj i jisañetla cha'añ ti' caj mach la' womic la' jac'ben i t'añ lac Yum Dios.