Deuteronomio 7 - Jiñi Tsiji' bʌ Wen T'añ cha'añ Estudio

I su'bentelob cha'añ mach yomic mi' ch'ujutesañob yam bʌ dios tac

¹ Che' ba' ora lac Yum Dios tsa'ix i pʌyʌyetla ochel ti jiñi lum mu' bʌ caj la' ch'ʌm yic'ot che' bʌ tsa'ix i choco loq'uel ca'bʌl tejclumob ti la' tojlel, che' bajche' heteojob, gergeseojob, amorreojob, cananeojob, ferezeojob, heveojob yic'ot jebuseojob; jiñʌch wucpejt tejclum ñumen oño' bʌ yic'ot ñumen p'ʌtʌlo' bʌ bajche' jatetla.

² Che' bʌ lac Yum Dios tsa'ix i yʌc'ʌyob ti a p'ʌtʌlel cha'añ mi la' jisañob yic'ot che' mʌlbilix la' cha'añ, yom mi la' junyajlel jisañob ti pejtelelob. Mach yomic mi la' laj la' t'añ yic'otob yic'ot mach yomic mi la' p'untañob.

³ Mach yomic mi la' ñujpuñijel yic'otob, mach yomic mi la' sijiben xch'oc bʌ la' walobilob jiñi ch'itoñ bʌ i yalobilob yic'ot mach yomic mi la' c'ajtiben xch'oc bʌ i yalobilob cha'añ ch'itoñ bʌ la' walobilob.

⁴ Come mi caj i yʌc' ti sajtel la' walobilob cha'añ mi' cʌyoñob, cha'añ mi' ch'ujutesañob yam bʌ dios tac. Che' jiñi mi caj i mich'leñetla lac Yum yic'ot mi caj i bʌc' jisañetla.

⁵ Pero yom mi la' mel che' bajche' iliyi: Mi caj la' jembeñob ba' mi' pulbeñob i majtañ i diosob, mi caj la' top' jiñi xajlel mu' bʌ q'uelob ti ch'ujul yilal, mi caj la' jisʌbeñob i yejtal i dios Asera yic'ot mi caj la' pulbeñob i yejtal i diosob.

⁶ Come jatetla ch'ujul bʌ i tejclumetla lac Yum Dios; lac Yum Dios tsa'ix i yajcayetla ti' tojlel pejtelel wiñicob ti pejtelel lum cha'añ mi' la' wochel ti c'uxbibil bʌ i tejclum.

Jump'ejl ch'ujul bʌ tejclum i cha'añ lac Yum

⁷ Mach cha'añic ñumen ca'bʌletla tsi' c'uxbiyetla yic'ot tsi' yajcayetla lac Yum, come mach ñumen ñuqueticla ti' tojlel yam bʌ tejclumob,

⁸ pero cha'añ jach tsi' c'uxbiyetla lac Yum yic'ot cha'añ mi' ts'ʌctesan i t'añ tsa' bʌ i wʌn su'beyob la' ñojte'el; jiñi cha'añ lac Yum tsi' loc'sayetla ti p'ʌtʌl bʌ i c'ʌb ya' ba' tsa' la' cha'le majtañ e'tel ti' tojlel jiñi rey faraón ti Egipto.

⁹ Ña'tanla cha'añ Diosʌch jiñi lac Yum Dios, xuc'ulʌch bʌ Dios, mu' bʌ chʌn ña'tan jiñi xuc'ul bʌ i t'añ yic'ot mi' pʌsbeñob i yutslel i pusic'al jiñi mu' bʌ i c'uxbiñob yic'ot mu' bʌ i jac'beñob i mandar, c'ʌlʌl ti jump'ejl mil ti lajm i p'olbal,

¹⁰ pero mi' q'uextʌbeñob i mul pejtelel jiñi mu' bʌ i ts'a'leñob yic'ot mi caj i jisañob; ma'añic mi' jalitesan i bʌ cha'añ mi' yʌq'ueñob i toj i mul majqui jach mi' ts'a'len.

¹¹ Jiñi cha'añ mic su'beñetla, yom mi la' jac'ben i t'añ yic'ot pejtelel i mandar lac Yum mu' bʌ c su'beñetla wʌle cha'añ mi la' mel.

Lac wenlel che' mi lac jac'

¹² Cha'añ ti' caj tsa' la' wu'bi jiñi t'añ, cha'añ ti' caj tsa' la' jac'ʌ yic'ot cha'añ ti' caj tsa' la' mele che' bajche' mi yʌl jiñi mandar, lac Yum Dios mi caj i chʌn ña'tan jiñi xuc'ul bʌ i t'añ yic'ot mi caj i chʌn pʌs i yutslel i pusic'al che' bajche' tsi' wʌn su'beyob la' ñojte'elob.

¹³ Lac Yum mi caj i c'uxbiñetla, mi caj i yʌq'ueñetla i yutslel i t'añ yic'ot mi caj i yʌq'uetla ti p'ojlel, uts'at mi caj i yilan pañimil la' walobilob yic'ot uts'at mi caj i yʌc' i wut la' pʌc'ʌb, che' bajche' la' trigo, la' ts'usubil, la' wolivo aceite, yic'ot i yal tac la' wacax yic'ot i yal tac la' tʌñʌme', ti jiñi lum mu' bʌ caj i yʌq'ueñetla lac Yum che' bajche' tsi' wʌn su'beyob la' ñojte'elob.

¹⁴ Ñumen tijicñayetla bajche' pejtelel yan tac bʌ tejclum; ma'añic ti la' tojlel wiñic mi x'ixic mach bʌ añic mi caj i tilel i yalobil, mi ti la' wʌlaq'uic ja'el.

¹⁵ Lac Yum mi caj i loc'sʌbeñetla pejtelel la' c'am-ʌjel yic'ot ma'añic mi caj i yʌc' i t'añ cha'añ mi' tajetla jiñi wocol tac tsa' bʌ la' cʌñʌ ti Egipto, pero mi caj i yʌc' jiñi wocol ti' tojlel pejtelel jiñi mu' bʌ i ts'a'leñetla.

¹⁶ Mi caj la' laj jisan pejtelel jiñi tejclum tac mu' bʌ caj i yʌq'ueñetla lac Yum Dios. Mach mi la' p'untañob, mi yomic mi la' ch'ujutesan i diosob, cha'añ ma'añic mi' yʌq'uetla ti yajlel.

¹⁷ Mi tsa' caji la' wʌl ti la' pusic'al: “Ili wiñicob ñumen ca'bʌlob che' bajche' joñonla. ¿Bajche' mi caj lac laj jisañob?”,

¹⁸ mach mi la' bʌc'ñañob. Wen ña'tanla chuqui tsi' mele lac Yum Dios ti' tojlel Faraón yic'ot ti' tojlel pejtelel jiñi año' bʌ ti Egipto,

¹⁹ tsa'ix la' q'uele jiñi bʌbʌq'uen tac bʌ i yejtal i p'ʌtʌlel Dios, tsa' bʌ i mele ti p'ʌtʌl bʌ i c'ʌb che' bʌ tsi' loc'sayetla ti Egipto. Che'ʌch mi caj i mel lac Yum Dios ti' tojlel pejtelel jiñi tejclum tac mu' bʌ la' bʌc'ñan.

²⁰ Che' ja'el lac Yum Dios mi caj i chocbeñob majlel xux ti' tojlelob, jinto mi' laj jilelob jiñi tsa' bʌ cʌleyob yic'ot jiñi tsa' bʌ puts'iyob majlel ti la' tojlel.

²¹ Mach la' lij la' bʌ ti' tojlelob, come lac Yum Dios añ la' wic'ot, jiñi ñuc bʌ Dios, wen bʌc'ñʌbil bʌ.

²² Lac Yum Dios c'unte' c'unte' mi caj i jisan majlel la' contrajob; mach mejlic la' laj jisañob ti ora, cha'añ ma'añic mi' p'ojlel jontol bʌ bʌte'el ti' lumob cha'añ mi' contrajiñetla.

²³ Pero lac Yum Dios mi caj i yʌc' ti la' wenta cha'añ mi la' mʌlben la' contrajob yic'ot mi caj i yʌq'ueñob ca'bʌl wocol jinto mi' laj jilelob.

²⁴ Dios mi caj i yʌc' ti la' c'ʌb i reyob yic'ot mi caj la' yʌpbeñob i c'aba' ila ti pañimil. Ma'añic majqui mi caj i mʌlbeñet, jinto mi la' laj jisañob.

²⁵ Mi caj la' laj pulbeñob i diosob ti c'ajc; mach mi la' mulʌbeñob i plata mi oro mucbilo' bʌ i cha'añ, mach mi la' ch'ʌm, cha'añ ma'añic mi la' yajlel ti wocol, come bi'bi' ti' tojlel lac Yum Dios pejtelel jiñi.

²⁶ Mach mi la' wis ch'ʌm majlel ti la' wotot jiñi bi'bi' bʌ mi' q'uel Dios, cha'añ ma'añic mi la' chojquel. Yom mi la' ts'a'len yic'ot yom bi'bi' mi la' q'uel pejtelel jiñi, come chocbil ti lac Yum.