Deuteronomio 6 - Jiñi Tsiji' bʌ Wen T'añ cha'añ Estudio

Jiñi ñuc bʌ mandar

¹ Iliyi, jiñʌch i mandar tac, yic'ot i cʌntesa tac yic'ot i su'bal tac lac Yum Dios, tsa' bʌ i yʌlʌ cha'añ mi' cʌntesañetla, cha'añ mi la' jac' ti jiñi lum ba' mi caj la' majlel ti chumtʌl,

² cha'añ mi la' chʌn bʌc'ñan lac Yum Dios; mi caj la' jac'ben pejtelel i t'añ yic'ot i mandar mu' bʌ c su'beñetla, jatetla yic'ot la' walobilob, yic'ot i yalobilob la' walobilob, cha'añ mi' ñajt añ la' ja'bilel ti pañimil.

³ U'binla israelob, jac'ʌla ti xuc'ul i mandar lac Yum, cha'añ uts'at mi la' wajñel ti jiñi lum ba'añ leche yic'ot cha'b, yic'ot cha'añ mi la' p'ojlel, che' bajche' tsi' su'beyetla lac Yum, i Dios la' ñojte'elob.

⁴ U'binla israelob: Lac Yum Dios juntiquil jach.

⁵ C'uxbin la' Yum Dios ti pejtelel la' pusic'al, ti pejtelel la' ch'ujlel, yic'ot ti pejtelel la' p'ʌtʌlel.

⁶ Ts'ijbanla cʌytʌl ti la' pusic'al ili t'añ mu' bʌ c su'beñetla wʌle.

⁷ Mi caj la' cha' su'beñob la' walobilob che' ya'añetla ti la' wotot, yic'ot che' woliyetla ti xʌmbal ti bij, yic'ot che' mi la' cajel ti wʌyel, yic'ot che' mi la' cha' ch'ojyel.

⁸ Mi caj la' cʌch ti la' c'ʌb yic'ot ti la' pam ba' ts'ijbubil jiñi mandar, che' bajche' i yejtal;

⁹ mi caj la' ts'ijban ti' chumte'lel la' wotot yic'ot ti ti' la' wotot.

I xic'bentelob cha'añ mi' jac'ob

¹⁰ Che' ba' ora la' Yum Dios tsa'ix i yotsayetla ti jiñi lum tsa' bʌ i wʌn su'beyob la' ñojte'el Abraham, yic'ot Isaac, yic'ot Jacob, cha'añ mi caj i yʌq'ueñetla colem tejclum tac yic'ot uts'at tac bʌ mach bʌ la' wa'chocobalic,

¹¹ yic'ot otot tac but'ul bʌ ti' chajp ti' chajp bʌ chu'bʌañʌl mach bʌ la' we'telic, yic'ot i yajñib ja' mach bʌ la' melbalic, yic'ot ts'usubil yic'ot olivo te' tac mach bʌ la' pʌc'balic, che' tsa'ix la' c'uxbe i wut yic'ot che' ñajetixla,

¹² tsajiletmela cha'añ ma'añic mi' ñajʌyel la' cha'añ lac Yum, tsa' bʌ i loc'sayetla ti' lumal Egipto ba' tsa' la' cha'le majtañ e'tel.

¹³ Yom mi la' bʌc'ñan lac Yum Dios, cojach jiñi mi caj la' ch'ujutesan, yic'ot ti' c'aba' mi caj la' wa'chocon la' t'añ.

¹⁴ Mach mi la' majlel ba'añ i diosob yaño' bʌ wiñicob, jiñi i diosob jiñi xchumtʌl tac año' bʌ ti la' joytʌlel,

¹⁵ come la' Yum Dios am bʌ ti la' tojlel, jiñʌch juntiquil Dios yujil bʌ mich'ajel; mi caj i pʌsbeñetla bʌbʌq'uen bʌ i mich'ajel, che' jiñi mi caj i jisañetla ti jiñi lum.

¹⁶ Mach la' wilʌben i pusic'al lac Yum Dios, che' bajche' tsa' la' wilʌbe i pusic'al ya' ti Masah.

¹⁷ Yom wen tsajiletla ti' jac'ol i mandar tac lac Yum Dios, yic'ot la' tic'ol yic'ot la' cʌntesʌntel tsa' bʌ i su'beyetla.

¹⁸ Melela chuqui toj yic'ot chuqui wen ti' tojlel lac Yum, cha'añ uts'at mi la' wajñel yic'ot cha'añ mi la' wochel ti chumtʌl ti jiñi wen bʌ lum tsa' bʌ i wʌn su'be lac Yum la' ñojte'elob cha'añ mi caj i yʌq'ueñob,

¹⁹ yic'ot cha'añ lac Yum mi' choc loq'uel la' contrajob ti la' tojlel, che' bajche' tsi' yʌlʌ lac Yum.

²⁰ Ti wi'il bʌ q'uiñ, che' mi' c'ajtibeñetla la' walobilob: “¿Chuqui isujmlel jiñi lac tic'ol, yic'ot i cʌntesa yic'ot i mandar lac Yum Dios tsa' bʌ i su'beyetla?”,

²¹ mi caj la' su'ben la' walobilob: “Ti yam bʌ ora mozojon lojon ti Egipto ti' tojlel faraón, pero lac Yum tsi' loc'sayon lojon ti p'ʌtʌl bʌ i c'ʌb ya' ti Egipto.

²² Lac Yum tsi' pʌsʌ tic wut lojon i yejtal i p'ʌtʌlel yic'ot ñuc tac bʌ yic'ot bʌbʌq'uen tac bʌ i p'ʌtʌlel ti Egipto ti' tojlel Faraón yic'ot ti' tojlel año' bʌ ti yotot.

²³ Tsi' loc'sayon lojon ya'i cha'añ mi' pʌyon lojon tilel ti ili lum cha'añ mi' yʌq'ueñon lojon, che' bajche' tsi' wʌn su'be lac ñojte'elob.

²⁴ Lac Yum tsi' yʌq'ueyonla mandar cha'añ mi lac jac' pejtelel i cʌntesa yic'ot cha'añ mi lac bʌc'ñan lac Yum Dios, cha'añ uts'at mi la cajñel ti pejtelel ora yic'ot cha'añ cuxul mi la cajñel, che' bajche' c'ʌlʌl wʌle.

²⁵ Che' jiñi mi caj i q'uelonla ti toj che' mi lac jac'ben pejtelel i mandar lac Yum Dios, che' bajche' tsi' su'beyonla.”