Deuteronomio 5 - Jiñi Tsiji' bʌ Wen T'añ cha'añ Estudio

Jiñi lujump'ejl mandar

¹ Moisés tsi' pʌyʌ tilel pejtelel jiñi israelob, tsi' su'beyob: “Ñʌch'tanla pejtelel ili mandar yic'ot la' tic'ol woli bʌ c su'beñetla wʌle cha'añ mi la' wu'bin. Yom mi la' ñop yic'ot yom mi la' jac', cha'añ mi la' mel.”

² Lac Yum Dios tsi' yʌq'ueyonla xuc'ul bʌ i t'añ ya' ti Horeb.

³ Mach ti' tojlelobic lac ñojte'elob tsi' su'bu jiñi xuc'ul bʌ t'añ, pero ti lac tojlel, joñonla cuxulonto bʌ la wʌle.

⁴ Lac Yum tsi' pejcayetla ya' ti wits, che' ya'añ ti yojlil c'ajc.

⁵ Xinlʌpʌlon ti la' tojlel yic'ot ti' tojlel lac Yum cha'añ mic su'beñetla i t'añ lac Yum, come jatetla tsa' la' bʌc'ña jiñi c'ajc, yic'ot ma'añic tsa' letsiyetla ti jiñi wits. Lac Yum tsi' yʌlʌ:

⁶ “Joñon a Yumon a Dioson, tsa' bʌ c pʌyʌyet loq'uel ti' lumal Egipto ya' ba' chucbilet ti majtañ e'tel.”

⁷ “Mach a ñop yam bʌ dios cha'añ ma' xʌ' otsan tic tojlel.”

⁸ “Mach a mel a dios, mi' yejtalic chuqui tac añ ti panchan, mi i yejtalic chuqui tac añ ti pañimil, mi i yejtalic chuqui tac añ ti ja'.

⁹ Mach a c'uchchocon a bʌ ti' tojlel yic'ot mach yomic ma' ch'ujutesan, come Joñon, a Yumon a Dioson, p'ʌtʌl bʌ, cujil bʌ mich'ajel, mu' bʌ cʌq'uen i tojbeñob i mul i tatob ti' tojlel i yalobilob c'ʌlʌl ti' yuxlajmlel yic'ot ti' chʌnlajmlel i p'olbal jiñi mu' bʌ i ts'a'leñoñob,

¹⁰ pero mic pʌsbeñob j c'uxbiya ti' tojlel bajc'ʌl wiñicob x'ixicob mu' bʌ i c'uxbiñoñob yic'ot mu' bʌ i jac'beñoñob c mandar.”

¹¹ “Mach a lon taj ti t'añ j c'aba', come Joñon, a Yum Dios, ma'añic mi caj c ñusʌben i mul jiñi mu' bʌ i lon taj ti t'añ j c'aba'.”

¹² “Yom ma' q'uel ti ñuc i q'uiñilel c'aj-o, che' bajche' tsa' cʌq'ueyet mandar.

¹³ Wʌcp'ejl q'uiñ cha'añ ma' mel a we'tel yic'ot pejtelel chuqui a wom a mel,

¹⁴ pero ti' wucp'ejlel q'uiñ jiñʌch i q'uiñilel c'aj-o cha'añ ma' q'uelon ti ñuc. Ti ili q'uiñ mach a cha'len e'tel, mi jiñic ch'itoñ bʌ a walobil, mi jiñic xch'oc bʌ a walobil, mi jiñic a wiñic, mi jiñic a criada, mi jiñic a tat wacax, mi jiñic a burro, mi jiñic a wʌlac', mi jiñic tilem bʌ ti yam bʌ lum ya' bʌ chumul ti a tejclum, cha'añ mi' mejlel i c'ajob i yoj ja'el a wiñic yic'ot a criada, che' bajche' jatet ma' c'aj a woj.

¹⁵ Yom ma' ña'tan xmajtan e'telet ti yam bʌ ora ti' lumal Egipto, pero Joñon a Yum Dios tsa' c loc'sayet ti p'ʌtʌl bʌ j c'ʌb, jiñi cha'añ mic su'beñet cha'añ ma' c'aj a woj ti' q'uiñilel c'aj-o.”

¹⁶ “Q'uele ti ñuc a tat a ña', che' bajche' tsa' c su'beyet, cha'añ mi' ñajt añ a ja'bilel ti ili lum mu' bʌ cʌq'ueñet.”

¹⁷ “Mach a cha'len tsʌnsa.”

¹⁸ “Mach a cha'len ts'i'lel.”

¹⁹ “Mach a cha'len xujch'.”

²⁰ “Mach a cha'len jop't'añ ti' contra a pi'ʌl.”

²¹ “Mach a mulʌben i yijñam a pi'ʌl, mi i yototic, mi i lumic, mi i wiñiquic, mi i criadajic, mi i tat wacaxic, mi i burrojic, mi junchajpic chuqui añ i cha'añ a pi'ʌl.”

Tsa' bʌc'ñayob wiñicob x'ixicob

²² Jiñʌch i t'añ lac Yum tsa' bʌ i yʌlʌ ti c'am bʌ t'añ ti' tojlel pejtelel israelob che' bʌ ya'añob ya' ti wits, che' ya'añ ti yojlil c'ajc, ti yojlil tocal yic'ot ti ic'ch'ipan bʌ pañimil; ma'añic yam bʌ mandar tsa' bʌ i yʌc'ʌ. Ti' wi'il tsi' ts'ijba ti cha'q'uejl xajlel tsa' bʌ i yʌq'ueyon.

²³ Che' bʌ tsa' la' wu'bi jiñi c'am bʌ t'añ ya' ba' ic'ch'ipan pañimil, yic'ot che' bʌ tsa' la' q'uele woli ti lejmel jiñi wits ti c'ajc, tsa' laj tiliyetla ba'añon ñuc tac bʌ la' we'tel ti jujunmojt israelob yic'ot xñoxob,

²⁴ tsa' la' wʌlʌ: “Tsa'ix i pʌsbeyonla i ñuclel lac Yum Dios yic'ot i p'ʌtʌlel, yic'ot tsa'ix la cu'bibe i t'añ, tsa' bʌ loq'ui ya' ti yojlil c'ajc. Wʌle tsa'ix laj q'uele cha'añ chʌn cuxul mi' yajñel wiñic che' mi' pejcʌntel ti lac Yum.

²⁵ Jiñi cha'añ wʌle, ¿chucoch mi caj lac chʌmel? —come ili colem c'ajc mi caj i jisañonla—; mi tsa' caji lac chʌn u'biben i t'añ lac Yum Dios, mi caj lac chʌmel.

²⁶ Come, ¿majqui jiñi wiñic cha'añ mi' mejlel i yu'biben i t'añ jiñi cuxul bʌ Dios ti yojlil jiñi c'ajc, che' bajche' joñonla tsa' la cu'bi, che' ma'añic tsa' chʌmiyonla?

²⁷ Lʌc'tesan a bʌ jatet yic'ot ñʌch'tʌben pejtelel chuqui mi yʌl lac Yum Dios. Ti wi'il ma' cha' su'beñon lojon tsa' bʌ i su'beyet lac Yum Dios, che' jiñi mi caj cu'bin lojon yic'ot mi caj c jac' lojon.”

²⁸ Lac Yum tsi' yu'bibeyetla la' t'añ che' bʌ tsa' la' pejcayon, tsi' su'beyon: “Tsa'ix cu'bibeyob i t'añ ili wiñicob x'ixicob, tsa' bʌ i su'beyetob; uts'at bajche' tsi' yʌlʌyob.

²⁹ ¡Uts'atax che'ic mi' ña'tañob ti pejtelel ora bajche' jiñi, che' mi' bʌc'ñañoñob yic'ot che' ti pejtelelic ora mi' jac'beñoñob c mandar, cha'añ che' jiñi mi caj i ñusañob q'uiñ ti uts'at yic'ot i yalobilob ti pejtelel ora!

³⁰ Cucu, su'beñob: Cha' sujtenla ti' la' wotot.

³¹ Pero jatet wʌ' to ma' cʌytʌl quic'ot; mi caj su'beñet pejtelel c mandar, j cʌntesa yic'ot c tic'ojel, cha'añ ma' cʌntesañob, cha'añ mi' jac'ob che' ya'ix añob ti jiñi lum woli bʌ cʌq'ueñob.”

³² Jiñi cha'añ chʌcʌ q'uele la' bʌ cha'añ mi la' mel che' bajche' tsi' su'beyetla lac Yum Dios. Mach yomic mi la' xoy la' bijlel, mi ti la' ñoj, mi ti la' ts'ej.

³³ Chʌn cha'lenla xʌmbal ti' bijlel lac Yum Dios, che' bajche' tsi' su'beyetla, cha'añ cuxul mi la' wajñel, cha'añ uts'at mi la' wajñel yic'ot cha'añ mi' ñajt-esʌntel la' ja'bilel ya' ti jiñi lum ba' mi caj la' ch'ʌm.