Deuteronomio 4 - Jiñi Tsiji' bʌ Wen T'añ cha'añ Estudio

Moisés tsi' xic'be israelob cha'añ mi' jac'ob mandar

¹ “Jiñi cha'añ, israelob, wen ñʌch'tanla jiñi mandar yic'ot la' tic'ol mu' bʌ c su'beñetla, cha'añ mi la' jac', cha'añ cuxul mi la' wajñel yic'ot cha'añ mi la' wochel la' ch'ʌm jiñi lum mu' bʌ caj i yʌq'ueñetla lac Yum, i Dios la' tatob.

² Mach mi la' won-esan yam bʌ t'añ mu' bʌ c su'beñetla mi yomic mi la' t'ox jisan ili t'añ, pero yom ts'ʌcʌl mi la' jac' i mandar lac Yum Dios mu' bʌ c su'beñetla.

³ Tsa'ix la' q'uele bajche' tsi' mele lac Yum cha'añ ti' caj Baal-peor: pejtelel wiñicob tsa' bʌ i tsajcayob Baal-peor, lac Yum Dios tsi' laj jisayob ti la' tojlel.

⁴ Pero jatetla tsa' bʌ la' chʌn tsajca lac Yum Dios, laj cuxulet to la wʌle.

⁵ Tsa'ix j cʌntesayetla ti' tic'ojel yic'ot ti' mandar c Yum Dios che' bajche' tsi' su'beyon, cha'añ ts'ʌcʌl mi la' jac' che' ya'ix añetla ti jiñi lum baqui mi la' majlel la' ch'ʌm.

⁶ Jiñi cha'añ yom mi la' wen lot ti la' pusic'al yic'ot yom ts'ʌcʌl mi la' jac', come jiñʌch toj bʌ la' ña'tʌbal yic'ot i p'ip'lel la' ña'tʌbal ti' wut jiñi yan tac bʌ tejclum, che' mi yu'biñob pejtelel ili mandar, mi caj i yʌlob: ‘Isujm, ili wiñicob añob i ña'tʌbal yic'ot mi' ch'ʌmbeñob isujm pañimil yic'ot wen ca'bʌlob.’

⁷ Come ¿am ba yam bʌ ñuc bʌ tejclum am bʌ i diosob lʌc'ʌl bʌ añ yic'otob che' bajche' lac Yum Dios lʌc'ʌl bʌ añ la quic'ot, mu' bʌ i yu'biñonla che' añ chuqui mi laj c'ajtiben?

⁸ Yic'ot ¿am ba yam bʌ ñuc bʌ tejclum am bʌ toj bʌ i mandar yic'ot yujil bʌ toj bʌ meloñel che' bajche' ili mandar woli bʌ c su'beñetla wʌle?

⁹ Jiñi cha'añ, tsajilet yic'ot cʌntan a bʌ ti uts'at, cha'añ ma'añic mi' ñajʌyel a cha'añ chuqui tac tsa' q'uele, mi yomic mi' yʌjñel ti a pusic'al che' cuxulet to; che' ja'el cʌntesan a walobilob yic'ot i yalobilob a walobilob.”

Jiñi tsa' bʌ i cʌñʌyob israelob ya' ti Horeb

¹⁰ Ti jiñi q'uiñ che' bʌ ya'añetla ti' tojlel la' Yum Dios ya' ti Horeb, lac Yum tsi' su'beyon: “Tempʌbeñon jiñi wiñicob x'ixicob cha'añ mi yu'biñob c t'añ, cha'añ mi' ñopob i bʌc'ñañoñob ti pejtelel ora che' wʌ' to añob ti pañimil yic'ot yom mi' cʌntesañob i yalobilob”,

¹¹ che' jiñi tsa' la' lʌc'tesa la' bʌ yic'ot tsa' wa'leyetla ti ye'bal jiñi wits che' woli ti lejmel jiñi c'ajc tsa' bʌ c'oti i c'ʌlʌl ti panchan, ti' joytʌlel añ tocal yic'ot ic'ch'ipan pañimil.

¹² Che' jiñi lac Yum tsi' pejcayetla ya' ti yojlil jiñi c'ajc; tsa' la' wu'bibe i t'añ, pero ma'añic tsa' la' q'uele ti' wa'tʌlel.

¹³ Lac Yum tsi' tsictesʌbeyetla jiñi xuc'ul bʌ i t'añ, cha'añ mi la' jac' jiñi lujump'ejl i mandar tsa' bʌ i ts'ijbu ti cha'q'uejl xajlel.

¹⁴ Che' ja'el tsi' su'beyon lac Yum ti jim bʌ ora cha'añ mij cʌntesañetla ti mandar yic'ot ti toj bʌ meloñel, cha'añ mi la' jac' ti jiñi lum ya' baqui mi caj la' c'axel ti chumtʌl.

I tic'olob cha'añ ma'añic mi' ch'ujutesañob yam bʌ dios

¹⁵ Ti jim bʌ ora che' bʌ lac Yum tsi' pejcayetla ya' ti' yojlil c'ajc, ma'añic tsa' la' q'uele ti' wa'tʌlel, jiñi cha'añ wen cʌntanla la' pusic'al,

¹⁶ cha'añ ma'añic mi la' wʌsin la' bʌ yic'ot cha'añ ma'añic mi la' melben i yejtal la' dios, mi' yejtalic wiñic o x'ixic,

¹⁷ mi' yejtalic bʌte'el am bʌ ti lum, mi i yejtalic te'lemut mu' bʌ ti wejlel ti panchan,

¹⁸ mi i yejtalic mu' bʌ i jexban i ñʌc' ti lum, mi i yejtalic chʌy am bʌ ti ja' ti ye'bal lum.

¹⁹ Che' ma' letsan a wut ti panchan, che' ma' q'uel jiñi q'uiñ, jiñi uw, jiñi ec' tac yic'ot pejtelel chuqui tac añ ti panchan, mach yomic ma' ñocchocon a bʌ cha'añ ma' ch'ujutesan ili tac, come a Yum Dios tsi' yʌc'ʌ jiñi q'uiñ, jiñi uw yic'ot jiñi ec' tac cha'añ mi' pʌs i c'ʌc'al ti' tojlel wiñicob x'ixicob ti pañimil.

²⁰ Pero lac Yum tsi' ch'ʌmʌyetla ti' wenta yic'ot tsi' loc'sayetla ya' ti wen ticʌw bʌ horno ya' ti Egipto, cha'añ mi la' wochel ti' tejclum che' bajche' wʌle.

²¹ Pero lac Yum tsi' mich'leyon cha'añ ti la' caj, yic'ot tsi' wa'choco i t'añ cha'añ ma'añic mi caj c'axel ti Jordán ja' mi muq'uic caj cochel ti jiñi wen bʌ lum mu' bʌ caj i yʌq'ueñetla lac Yum Dios.

²² Jiñi cha'añ wʌ'ix mi caj c chʌmel ti ili lum, ma'añix mi caj c c'axel ya' ti junwejl Jordán ja'; pero jatetla mi caj la' c'axel cha'añ mi la' chumtʌl ya' ti jiñi wen bʌ lum.

²³ Jiñi cha'añ cʌntan la' bʌ, mach yomic mi' ñajʌyel la' cha'añ jiñi xuc'ul bʌ i t'añ la' Yum Dios tsa' bʌ i yʌq'ueyetla yic'ot mach yomic mi la' mel i yejtal la' dios mi i yejtalic mi junchajpic tic'bil bʌ i cha'añ la' Yum Dios.

²⁴ Come la' Yum Dios jiñʌch c'ajc yujil bʌ jisaya, yujil bʌ mich'ajel che' mi la' cʌy.

²⁵ Che' añix ca'bʌl la' walobilob yic'ot la' buts yic'ot che' tsa'ix ñox-ayetla ila ti pañimil, mi tsa' asiyiyetla yic'ot mi tsa' caji la' mel la' dios tac o i yejtal tac chuqui tac añ yic'ot mi leco chuqui tac tsa' caji la' mel ti' wut lac Yum Dios, cha'añ mi la' techben i mich'ajel,

²⁶ wʌle mic wa'chocon jiñi panchan yic'ot pañimil cha'añ mi yochelob ti testigo cha'añ mi caj la' junyajlel jilel ti jiñi lum mu' bʌ caj la' ch'ʌm che' mi la' ñumel ti junwejl Jordán ja'. Mach ca'bʌlic q'uiñ mi caj la' jal-añ come mi caj la' jisʌntel.

²⁷ Lac Yum mi caj i pam puquetla ti yan tac bʌ tejclum, ts'ita' jach mi caj la' cʌytʌl ya' ti tejclum tac ya' ba' mi caj i pʌyetla majlel lac Yum.

²⁸ Ya'i mi caj la' ch'ujutesan dios tac melbil bʌ ti c'ʌbʌl, melbil bʌ ti te' yic'ot ti xajlel, mach bʌ añic mi' c'otel i wut, mach bʌ añic mi' yu'bin t'añ, mach bʌ yujilic we'el yic'ot mach bʌ añic mi' sic' ic'.

²⁹ Pero mi ya' ba' pujquemetla, mi tsa' caji la' sajcan la' Yum Dios, mi caj la' taj, mi tsa' la' sajca ti pejtelel la' pusic'al yic'ot ti pejtelel la' ch'ujlel.

³⁰ Che' wen ch'ijiyem la' pusic'al yic'ot che' mi' tajetla pejtelel jiñi wocol, pero mi tsa' caji la' cha' ña'tan lac Yum Dios, mi tsa' caji la' ñʌch'tʌben i t'añ,

³¹ come jiñi la' Yum Dios wen ca'bʌl i yutslel i pusic'al: Ma'añic mi caj i cʌyetla mi muq'uic caj i jisañetla mi muq'uic caj i ñajʌyel i cha'añ jiñi xuc'ul bʌ i t'añ tsa' bʌ i wa'choco ti' tojlel la' ñojte'elob.

³² Ña'tanla chuqui tsa' ujti ti oñiyi, c'ʌlʌl ti jiñi q'uiñ che' bʌ Dios tsi' mele wiñic ti pañimil, mi añ ti' junwejlel panchan ba' tsa' ujti lajal bʌ che' bajche' iliyi woli bʌ la' q'uel, o añ ba' tsa' la' wu'bi lajal bʌ che' bajche' iliyi.

³³ ¿Am ba yam bʌ wiñicob tsa' bʌ i yu'bibeyob i t'añ Dios ti yojlil c'ajc, che' bajche' jatetla, che' ma'añic tsa' jiliyetla?

³⁴ ¿O tsa' ba tili yam bʌ dios i coltañ wiñicob che' bajche' tsi' coltayonla lac Yum Dios? Tsi' pʌsʌ i p'ʌtʌlel ti lac tojlel che' bʌ tsi' pʌyʌyonla loq'uel ti' p'ʌtʌlel laj contrajob. Tsi' yotsayonla ti' cha'añ bʌ. Tsi' pʌsʌ i yejtal tac i p'ʌtʌlel yic'ot bʌbʌq'uen tac bʌ yic'ot tsʌts tac bʌ ti la' tojlel che' bʌ tsi' loc'sayetla ti Egipto.

³⁵ Tsa'ix pʌsbentiyetla pejtelel iliyi cha'añ mi la' ña'tan cha'añ lac Yum jiñʌch Dios, ma'añic yam bʌ che' bajche' Dios.

³⁶ Ya' ti panchan tsi' yʌq'ueyetla la' wu'bin i t'añ cha'añ la' cʌntesʌntel, yic'ot ti pañimil tsi' pʌsbeyetla i c'ʌc'al yic'ot tsa' la' wu'bibe i t'añ ti' yojlil jiñi c'ajc.

³⁷ Come lac Yum tsi' c'uxbi la' ñojte'elob, tsi' yajcʌbeyob i p'olbal yic'ot tsi' loc'sayetla ti Egipto ti ca'bʌl i p'ʌtʌlel,

³⁸ cha'añ mi' choc loq'uel ti la' tojlel ñumen ñuco' bʌ bajche' jatetla yic'ot ñumen p'ʌtʌlo' bʌ che' bajche' jatetla yic'ot cha'añ mi' yʌq'ueñetla i lum cha'añ mi la' ch'ʌm, che' bajche' woli i yujtel wʌle.

³⁹ Jiñi cha'añ wen ñopola wʌle yic'ot wen ña'tanla ti la' pusic'al cha'añ lac Yum jiñʌch Dios ya' ti panchan yic'ot ila ti pañimil; ma'añic yam bʌ.

⁴⁰ Yom mi la' jac'ben i t'añ yic'ot i mandar woli bʌ c su'beñetla wʌle, cha'añ uts'at mi la' wajñel yic'ot la' walobilob, yic'ot cha'añ mi' tam-esʌntel la' ja'bilel ti jiñi lum mu' bʌ i yʌq'ueñetla la' Yum Dios ti pejtelel ora.

Tejclum tac cha'añ puts'ibʌl ya' ti' tojel i pasibal q'uiñ ti junwejl Jordán ja'

⁴¹ Jiñic cha'añ Moisés tsi' wa'choco uxpejt tejclum wʌ' ti junwejl Jordán ja' ti' tojel i pasibal q'uiñ,

⁴² cha'añ ya'i mi' puts'el jiñi xtsʌnsa mi tsi' tsʌnsa yam bʌ i pi'ʌl che' mach yʌlo tsajilic i cha'añ, che' ma'añic ba' i contrajiyob i bʌ; mi mux i yochel ti puts'el ti jiñi tejclum tac, cuxul mi yajñel.

⁴³ Ili tejclum tac jiñʌch Beser am bʌ ti' tiquiñal pañimil ya' ti joctʌl, cha'añ jiñi rubeñob; Ramot am bʌ ti Galaad cha'añ jiñi gadob, yic'ot Golán am bʌ ti Basán, cha'añ manasesob.

Moisés tsi' cha' tsictesa Mandar

⁴⁴ Jiñʌch i mandar lac Yum tsa' bʌ i su'bu Moisés ti' tojlel israelob.

⁴⁵ Jiñʌch i su'bal tac, yic'ot i tic'ojel tac, yic'ot i mandar tac, tsa' bʌ i su'bu Moisés ti' tojlel jiñi israelob che' bʌ tsa' loq'uiyob ti Egipto,

⁴⁶ che' wʌ' to añob ti junwejl Jordán ja', ya' ti joctʌl ti' tojel Bet-peor, ya' ti' lum Sehón, i rey amorreojob ya' ba' tsa' chumleyob ti Hesbón, tsa' bʌ i jisa Moisés temel yic'ot israelob, che' bʌ tsa' loq'uiyob ti Egipto.

⁴⁷ Che' jiñi tsi' ch'ʌmbeyob i lum yic'ot i lum jiñi Og rey bʌ ti Basán, —jiñʌch jiñi cha'tiquil i rey amorreojob wʌ' bʌ añob ti junwejl Jordán ja' ti' tojel ba' mi' pasel q'uiñ—,

⁴⁸ che' ja'el tsi' ch'ʌmʌyob jiñi lum mu' bʌ i tejchel ti Aroer am bʌ ti' t'ejl joctʌl ya' ba'añ colem ja' i c'aba' Arnón, c'ʌlʌl ti jiñi wits i c'aba' Sión, jiñʌch Hermón,

⁴⁹ yic'ot pejtelel jiñi lum ti Arabá wʌ' bʌ añ ti junwejl Jordán ja' ti' tojel ba' mi' pasel q'uiñ, c'ʌlʌl ti Mar i c'aba' Arabá, am bʌ ti ye'bal wits i c'aba' Pisga.