Deuteronomio 34 - Jiñi Tsiji' bʌ Wen T'añ cha'añ Estudio

Tsa' chʌmi Moisés

¹ Che' ya'añ Moisés ti joctʌl ya' ti Moab, tsa' caji ti letsel majlel ya' ti wits i c'aba' Nebo, ti' pam jiñi wits i c'aba' Pisga, am bʌ ti' tojel Jericó. Lac Yum tsi' teche i pʌsben pejtelel i lum Galaad c'ʌlʌl ti Dan,

² pejtelel i lum Neftalí, i lum Efraín yic'ot i lum Manasés, pejtelel i lum Judá c'ʌlʌl ti mar am bʌ ti' bʌjlibal q'uiñ,

³ yic'ot ti Neguev, yic'ot jiñi joctʌl am bʌ ti Jericó ba'añ ca'bʌl bonxan, c'ʌlʌl ti' lum Zoar.

⁴ Lac Yum tsi' su'be Moisés: “Jiñʌch jiñi lum woli bʌ cʌq'ueñob israelob che' bajche' tsa' c wʌn su'be Abraham, Isaac, yic'ot Jacob, che' bʌ tsa' c su'be: ‘Mi caj cʌq'ueñob a p'olbal.’ Tsa' cʌq'ueyet c t'añ cha'añ mi caj a ñajti q'uel jiñi lum, pero ma'añic mi caj a wochel ya'i.”

⁵ Ya'i tsa' chʌmi Moisés, i wiñic lac Yum, ya' ti' lum Moab, che' bajche' tsi' yʌlʌ lac Yum.

⁶ Lac Yum tsi' mucu Moisés ti joctʌl ti lum Moab, ti' tojel Bet-peor, pero ma'añic majqui yujil baqui tsa' mujqui c'ʌlʌl wʌle.

⁷ Añix wʌcc'al (120) i ja'bilel Moisés che' bʌ tsa' chʌmi; pero c'ʌlʌl mu' to i c'otel i wut yic'ot ch'ejlto ja'el.

⁸ Jiñi israelob tsi' yuc'tayob ya' ti joctʌl ti' lum Moab lujump'ejl i cha'c'al (30) q'uiñ; che'ʌch tsa' joloñi i q'uiñilel i ch'ijiyemlelob cha'añ Moisés.

⁹ Josué i yalobil Nun but'ul ti ca'bʌl i ña'tʌbal, come Moisés tsi' yʌc'ʌ i c'ʌb ti' tojlel; jiñi cha'añ jiñi israelob tsi' jac'beyob i t'añ Josué, tsi' meleyob che' bajche' lac Yum tsi' su'be Moisés.

¹⁰ Ma'añic yam bʌ juntiquil x'alt'añ tsa' bʌ tili ti' tojlel israelob che' bajche' Moisés tsa' bʌ i cha'le t'añ yic'ot lac Yum, come tsi' pejca ti' wut;

¹¹ ma'añic yam bʌ bajche' Moisés come tsi' cha'le ñuc tac bʌ i ye'tel yic'ot bʌbʌq'uen tac bʌ tsa' bʌ i su'be i mel lac Yum ya' ti' lumal Egipto, ti' contra faraón yic'ot ti' wut pejtelel año' bʌ i ye'tel ti Egipto yic'ot ti pejtelel i lumal;

¹² yic'ot tsi' pʌsʌ ñuc tac bʌ yic'ot bʌbʌq'uen tac bʌ i yejtal i p'ʌtʌlel Moisés ti' wut pejtelel israelob.