Deuteronomio 30 - Jiñi Tsiji' bʌ Wen T'añ cha'añ Estudio

Jiñi mu' bʌ i taj i ñusʌntel i mul yic'ot bendición

¹ Che' ba' ora mi' tilel tac ti la' tojlel pejtelel jiñi bendición yic'ot jiñi wocol tac bʌ tsa' bʌ c su'beyetla, mi tsa' la' cha' cʌyʌ la' mul ya' ba' pam pujquemetla ti yan tac bʌ tejclum ba' mi' choquetla majlel lac Yum Dios,

² mi tsa' la' cha' sutq'ui la' bʌ ba'añ lac Yum Dios yic'ot mi tsa' la' cha' jac'be i t'añ ti pejtelel che' bajche' tsa' c su'beyetla wʌle ti mandar, jatetla yic'ot la' walobilob mi ti pejtelel la' pusic'al yic'ot mi pejtelel la' ña'tʌbal,

³ che' jiñi lac Yum mi caj i cha' coltañetla sujtel ti la' lumal, mi caj i p'untañetla, yic'ot mi caj i cha' ch'ʌmetla ti jiñi tejclum tac ya' ba' tsi' pam pucuyetla majlel lac Yum Dios.

⁴ Anquese pam pujquemetla ti ñajt tac bʌ pañimil, ya'i lac Yum Dios mi caj i cha' pʌyetla loq'uel ya' baqui añetla.

⁵ Lac Yum Dios mi caj i cha' pʌyetla tilel ti jiñi lum aq'uebilo' bʌ la' ñojte'elob, la' cha'añʌch; mi caj i yʌq'ueñetla la' wenlel yic'ot mi caj i wen p'ojlesañetla, ñumen che' bajche' la' ñojte'elob.

⁶ Lac Yum Dios mi caj i sʌc-esan la' pusic'al yic'ot i pusic'al la' walobilob cha'añ mi la' c'uxbin lac Yum Dios ti pejtelel la' pusic'al, yic'ot ti pejtelel la' ch'ujlel cha'añ cuxul mi la' wajñel.

⁷ Che' jiñi lac Yum Dios mi caj i yʌq'ueñob pejtelel ili wocol la' contrajob, tsa' bʌ i ts'a'leyetla, tsa' bʌ i yajñesayetla.

⁸ Mi caj la' sutq'uin la' bʌ yic'ot mi caj la' wu'biben i t'añ lac Yum cha'añ mi la' cha' jac' pejtelel i mandar mu' bʌ c su'beñetla wʌle.

⁹ Lac Yum Dios mi caj i coltañetla ti pejtelel chuqui tac mi la' mel, mi caj i p'ojlesan la' walobilob, mi' caj ti p'ojlel la' wʌlac' yic'ot i wut pejtelel chuqui mi la' pʌc' ti lum, cha'añ la' wenlel; come lac Yum mi caj i cha' u'bin i tijicñʌyel i pusic'al che' mi' coltañetla, che' bajche' tsi' yu'bi i tijicñʌyel i pusic'al ti' tojlel la' ñojte'elob,

¹⁰ che' ba' ora mi la' jac'ben i t'añ lac Yum Dios, yic'ot che' mi la' jac'ben i mandar ts'ijbubil bʌ ti ili i juñilel bʌ Mandar; che' mi la' cha' sutq'uin la' bʌ ba'añ lac Yum Dios ti pejtelel la' pusic'al yic'ot ti pejtelel la' ña'tʌbal.

¹¹ Come ili mandar woli bʌ c su'beñetla wʌle mach wocolic ti jac'ol, mach ñajtic añ ti la' tojlel.

¹² Ma'añic ti panchan, cha'añ ma' wʌl: “¿Majqui mi' mejlel ti letsel ti panchan cha'añ mi' cha' ch'ʌmbeñonla tilel cha'añ mi la cu'bin, cha'añ mi lac jac'?”

¹³ Mi ya'ic añ ti' junwejlel mar, cha'añ mi la' wʌl: “¿Majqui mi' mejlel ti c'axel ti colem mar cha'añ mi' ch'ʌmbeñonla tilel, cha'añ mi la cu'bin, cha'añ mi lac jac'?”

¹⁴ Come c'ax lʌc'ʌl jax añ ti la' tojlel jiñi t'añ, ya'ʌch añ ti la' wej yic'ot ti la' pusic'al, cha'añ mi la' jac'.

¹⁵ Jiñi cha'añ wʌle tsa'ix c pʌsbeyetla i bijlel la' cuxtʌlel ba'añ bendición, yic'ot i bijlel chʌmel ba'añ wocol,

¹⁶ come wolic xic'beñetla wʌle cha'añ yom mi la' c'uxbin lac Yum Dios, cha'añ yom mi la' cha'len xʌmbal ti' bijlel yic'ot cha'añ yom mi la' jac'ben pejtelel i mandar, i su'bal yic'ot i cʌntesʌbal, cha'añ cuxul mi la' wajñel yic'ot cha'añ mi la' p'ojlel, che' jiñi lac Yum Dios mi caj i yʌq'ueñetla la' wenlel ya' ti jiñi lum baqui mi la' majlel ti chumtʌl.

¹⁷ Pero mi tsa' sojqui la' pusic'al, mi tsa' la' cʌyʌ la' jac' i t'añ lac Yum, mi tsa' la' sʌtʌ la' bʌ, mi tsa' la' ñocchoco la' bʌ ti' tojlel yam bʌ dios tac cha'añ mi la' ch'ujutesan,

¹⁸ mic su'beñetla wʌle cha'añ wersa mi caj la' chʌmel; mach ca'bʌlic ora mi caj la' wajñel ya' ti jiñi lum baqui mi caj la' majlel ti chumtʌl ya' ti junwejl Jordán ja'.

¹⁹ Mic wa'chocon jiñi año' bʌ ti panchan yic'ot ti pañimil che' bajche' testigojob ti la' tojlel, cha'añ tsa'ix c pʌsbeyetla i bijlel la' cuxtʌlel ba'añ bendición yic'ot i bijlel chʌmel ba'añ wocol; yajcan la' cuxtʌlel cha'añ chʌn cuxul mi la' wajñel yic'ot la' walobilob,

²⁰ cha'añ mi la' chʌn c'uxbin lac Yum Dios, cha'añ mi la' chʌn ñʌch'tʌben i t'añ yic'ot cha'añ mi la' chʌn tsajcan, come jiñʌch la' cuxtʌlel jiñi lac Yum yic'ot jiñʌch mu' bʌ i ñajt-esan la' ja'bilel, cha'añ mi la' chumtʌl ya' ti lum mu' bʌ caj i yʌq'ueñetla lac Yum che' bajche' tsi' wʌn su'be la' ñojte'elob, Abraham, Isaac, yic'ot Jacob.