Deuteronomio 3 - Jiñi Tsiji' bʌ Wen T'añ cha'añ Estudio

Israel tsi' mʌlbe Og, rey bʌ ti Basán

¹ Jiñi cha'añ tsa' cha' sujtiyonla, tsa' letsiyonla majlel ti' bijlel Basán. Che' jiñi Og, rey bʌ ti Basán tsa' tiliyob yic'ot pejtelel i wiñicob cha'añ mi' contrajiñonla ya' ti Edrei.

² Pero lac Yum tsi' su'beyon: “Mach ma' bʌc'ñan, come tsa'ix cʌc'ʌ ti a wenta yic'ot i tejclumob, yic'ot pejtelel i lum. Che' yom ma' melben che' bajche' tsa' melbe Sehón i reyob amorreojob tsa' bʌ chumleyob ti Hesbón.”

³ Lac Yum Dios tsi' yʌc'ʌ ti laj c'ʌb ja'el jiñi Og, rey bʌ ti Basán yic'ot pejtelel i tejclum, jiñi cha'añ tsa' lac mʌlbeyob, jinto tsa' lac laj jisayob.

⁴ Che' jiñi tsa' lac ch'ʌmbe pejtelel i tejclum tac. Ma'añic tsa' cʌle mi jump'ejlic tejclum mach bʌ añic tsa' lac ch'ʌmʌ. Añ uxc'al (60) jiñi tejclum tac, yic'ot pejtelel jiñi lum am bʌ ti Argob ba' tsi' cha'le yumʌntel jiñi rey Og chumul bʌ ti Basán.

⁵ Pejtelel ili tejclum tac wen melbil, joy ts'ajquibil tac ti chañ bʌ ts'ajc, añ tac i puertajlel yic'ot i te'el tac; mach tsicbilic jiñi xchumtʌl tac mach bʌ joy ts'ajquibilic.

⁶ Tsa' lac laj jisayob, che' bajche' tsa' lac laj jisa jiñi Sehón, rey bʌ ti Hesbón; tsa' lac tsʌnsa wiñicob x'ixicob, yic'ot alʌlob ti jujump'ejl tejclum.

⁷ Pero tsa' lac ch'ʌmbeyob i yʌlac'ob yic'ot pejtelel chu'bʌañʌl tsa' bʌ cʌle ya' ti tejclum tac.

⁸ “Che' ja'el ti jiñi q'uiñ tsa' lac ch'ʌmbeyob i lum jiñi cha'tiquil i rey amorreojob año' bʌ ti junwejl Jordán ja', c'ʌlʌl ti jiñi ja' i c'aba' Arnón yic'ot c'ʌlʌl ti wits i c'aba' Hermón.

⁹ (Jiñi sidoniojob mi' pejcañob ti Sirión jiñi wits i c'aba' Hermón ixcu jiñi amorreojob mi' pejcañob ti Senir.)

¹⁰ Pejtelel jiñi tejclum tac am bʌ ti joctʌl yic'ot pejtelel i lum Galaad, yic'ot i lum Basán, c'ʌlʌl ti Salca yic'ot ti Edrei, jiñʌch jiñi tejclum tac ba' tsi' cha'le i yumʌntel jiñi rey Og chumul bʌ ti Basán.

¹¹ Jiñi Og, rey bʌ ti Basán, jiñʌch cojix bʌ i p'olbal chañ bʌ wiñicob. Melbil i wʌyib Og ti tsucul taq'uiñ, ¿mach ba ya'ic lotol ti Rabá ti' wenta i yalobilob Amón? Añ ojlil i jo'p'ejl metro i tamlel yic'ot cha'p'ejl metro i xujc.”

Rubén, Gad yic'ot ojlil i p'olbal Manasés tsa' chumleyob ti junwejl Jordán ja'

¹² Jiñi lum tsa' bʌ lac ch'ʌmʌ ti jiñi bʌ ora, tsa' bʌ tejchi ti Aroer am bʌ ti' t'ejl ja' i c'aba' Arnón, c'ʌlʌl ti ojlil jiñi wits tac am bʌ ti Galaad yic'ot pejtelel i tejclum tac, tsa' cʌq'ueyob i p'olbal Rubén yic'ot i p'olbal Gad.

¹³ I colojbal jiñi lum am bʌ ti Galaad yic'ot pejtelel i lum Basán ba' tsi' cha'le yumʌntel Og yic'ot pejtelel jiñi lum am bʌ ti Argob, mu' bʌ i pejcʌntel ti' lum chañ bʌ wiñicob, tsa' cʌq'ueyob lamital i p'olbal Manasés.

¹⁴ Jair i yalobil Manasés tsi' laj ch'ʌmʌ jiñi lum ti Argob c'ʌlʌl ba' jaxʌl i lumob Gesur yic'ot Maaca; tsi' yotsʌbe i c'aba' jiñi lum ti Basán-havot-jair.

¹⁵ Jiñi Galaad tsa' cʌq'ue Maquir.

¹⁶ Jiñi rubeñob yic'ot gadob tsa' cʌq'ueyob jiñi lum mu' bʌ i tejchel ti Galaad c'ʌlʌl ti ja' i c'aba' Arnón, —ya' ti' yojlil jiñi joctʌl ya' jaxʌl i lumob—, yic'ot c'ʌlʌl ti jiñi ja' i c'aba' Jaboc, mu' bʌ i c'ʌjñibʌyel che' bajche' i cayajonlel i lum i yalobilob Amón;

¹⁷ yic'ot ja'el tsa' cʌq'ueyob Arabá am bʌ ti' ye'ye'bal jiñi wits i c'aba' Pisga am bʌ ti' pasibal q'uiñ: i cayajonlel ili lum jiñʌch ti' jʌlol jiñi Jordán ja' mu' bʌ i tejchel ti Cineret c'ʌlʌl mi' c'otel ti mar i c'aba' Arabá, jiñi Tsaj bʌ Mar.

¹⁸ Che' jiñi tsa' c su'beyetla: “Lac Yum Dios tsi' yʌq'ueyetla ili lum cha'añ mi la' ch'ʌm; pero yom chajpʌbiletla ti la' we'tijib mi la' majlel pejtelel la' wujil bʌ guerra cha'añ ñaxan mi la' majlel ti' tojlel la' pi'ʌlob israelo' bʌ.

¹⁹ Cojach la' wijñam, yic'ot la' walobilob, yic'ot pejtelel la' wʌlac' tac (come cujil wen ca'bʌl la' wacax), mi caj i cʌytʌl ti ili tejclum tac tsa'ix bʌ cʌq'ueyetla,

²⁰ jinto che' bʌ lac Yum tsa'ix i yʌq'ueyob i lum la' pi'ʌlob cha'añ mi' ch'ʌmob ya' ti junwejl Jordán ja', che' bajche' jatetla tsa'ix bʌ la' taja la' lum. Che' jiñi muq'uix i mejlel la' cha' sujtel ti jujuntiquiletla ya' ti la' lum tsa' bʌ cʌq'ueyetla.”

²¹ Ti jim bʌ ora tsa' c su'be ja'el Josué: “Ti a wut tsa' q'uele pejtelel jiñi tsa' bʌ i mele lac Yum Dios ti' tojlel jiñi cha'tiquil reyob; che'ʌch mi caj i mel lac Yum ti' tojlel jiñi yumʌlob baqui jach mi caj a ñumel.

²² Mach yomic mi la' bʌc'ñañob, come lac Yum Dios mi caj i cha'len guerra cha'añetla.”

Moisés mi caj i yochel ti Canaán

²³ Ti jim bʌ ora tsa' c pejca lac Yum ti wocol t'añ, tsa' cʌlʌ:

²⁴ “C Yum Dios, tsa'ix a teche a pʌsbeñon a ñuclel yic'ot a p'ʌtʌlel, come ¿am ba yam bʌ dios ti panchan yic'ot ti pañimil lajal bʌ i ye'tel yic'ot i p'ʌtʌlel bajche' jatet?

²⁵ Jiñi cha'añ ti wocol t'añ mij c'ajtibeñet: La' c'axicon ti junwejl Jordán ja' cha'añ mij q'uel jiñi wen bʌ lum, ba'añ uts'atax bʌ wits yic'ot Líbano.”

²⁶ Pero lac Yum tsi' mich'leyon ti la' caj, jiñi cha'añ ma'añic tsi' ñʌch'tʌbeyon c t'añ, tsa' jach i su'beyon: “¡Jasʌlix!, mach a chʌn su'beñon ili woli bʌ a c'ajtibeñon.

²⁷ Letsen ti' pam jiñi wits i c'aba' Pisga. Letsan a wut ti' tojel i bʌjlibal q'uiñ, yic'ot ti norte, yic'ot ti sur, yic'ot ti' pasibal q'uiñ yic'ot pam q'uele, come ma'añic mi caj a c'axel ya' ti Jordán ja'.

²⁸ Cʌntesan Josué, xic'ben yic'ot p'ʌt-esʌben i pusic'al, come jiñi mi caj i pʌy ochel israelob yic'ot jiñi mi caj i yʌq'ueñob jiñi lum mu' bʌ caj a q'uel.”

²⁹ Che' jiñi tsa' cʌleyonla ti joctʌl am bʌ ti' tojel Bet-peor.