Deuteronomio 26 - Jiñi Tsiji' bʌ Wen T'añ cha'añ Estudio

Primicia tac yic'ot diezmo tac

¹ Che' ochemetix ti chumtʌl ti jiñi lum mu' bʌ i yʌq'ueñet lac Yum Dios,

² che' jiñi yom ma' loc'san pejtelel jiñi ñaxan tac bʌ i wut a pʌc'ʌb ya' ti a lum tsa' bʌ i yʌq'ueyet lac Yum Dios. Yom ma' wotsan ti a chiquib, cha'añ ma' ch'ʌm majlel ya' ti ajñibʌl yajcʌbil bʌ i cha'añ lac Yum Dios, ya' ba' yom ajñel la' wic'ot ba' mi' yʌc' ti cʌjñel i c'aba'.

³ Mi caj a c'otel ba'añ jiñi motomaj am bʌ i ye'tel ti jim bʌ ora, mi caj a su'ben: “Mic tsictesan wʌle ti' tojlel lac Yum Dios cha'añ tsa'ix ochiyon wʌ' ti lum tsa' bʌ i yʌq'ueyonla lac Yum che' bajche' tsi' wʌn su'be lac ñojte'elob.”

⁴ Jiñi motomaj mi caj i ch'ʌm jiñi chiquib am bʌ ti a c'ʌb cha'añ mi caj i yʌc' ya' ti' pulʌntib i majtañ lac Yum Dios.

⁵ Che' jiñi mi caj a wʌl ili t'añ ya' ti' tojlel lac Yum Dios: “Jiñi c tat jiñʌch juntiquil arameo colel bʌ i chʌmel, tsa' bʌ ju'bi majlel ti Egipto, tsa' bʌ chumle yic'ot wiñico' bʌ i yalobilob. Ya'i tsa' wen p'ojliyob, jinto tsa' ochiyob ti colem tejclum, wen p'ʌtʌl bʌ.

⁶ Jiñi egiptojob tsi' tic'layonla, tsi' yʌc'ʌyonla ti mel pusic'al yic'ot tsi' yʌc'ʌyonla ti tsʌts bʌ to'ol e'tel.

⁷ Che' jiñi c'am tsa' lac pejca lac Yum, i Dios lac ñojte'elob; jiñi lac Yum tsi' yu'bibeyonla lac t'añ yic'ot tsi' q'uele lac wocol, la que'tel yic'ot lac tic'lʌntel.

⁸ Lac Yum tsi' loc'sayonla ti Egipto ti ñuc bʌ i p'ʌtʌlel i c'ʌb yic'ot bʌbʌq'uen tac bʌ i yejtal i p'ʌtʌlel tsa' bʌ i pʌsʌ;

⁹ tsi' pʌyʌyonla tilel ilayi yic'ot tsi' yʌq'ueyonla ili lum, ba'añ ca'bʌl leche yic'ot cha'b.

¹⁰ Jiñi cha'añ wʌle c Yum, tsa' c ch'ʌmʌ tilel ili ñaxan bʌ i wut c pʌc'ʌb tsa' bʌ c taja ti ili lum tsa' bʌ a wʌq'ueyon.” Mi caj a wʌc' jiñi ñaxan bʌ i wut a pʌc'ʌb ti' tojlel lac Yum Dios yic'ot mi caj a ñocchocon a bʌ ti' tojlel lac Yum Dios.

¹¹ Yom ma' tijicñesan a pusic'al cha'añ pejtelel i bendición lac Yum Dios tsa' bʌ i yʌq'ueyet temel yic'ot pejtelel año' bʌ ti a wotot, yic'ot levijob, yic'ot jiñi ñajt bʌ ch'oyolob ya' bʌ añob a wic'ot.

¹² Che' ti' yuxp'ejlel ja'b, jiñʌch i ja'bilel diezmo, che' bʌ tsa'ix ujti a loc'sʌben i diezmojlel pejtelel a pʌc'ʌb, mi caj a wʌq'ueñob jiñi levijob, yic'ot jiñi ñajt bʌ ch'oyolob, yic'ot me'ba' alʌlob, yic'ot me'ba' x'ixicob, cha'añ mi' c'uxob ya' ba' chumuletla jinto mi' ñaj-añob.

¹³ Che' jiñi mi caj a wʌl ti' tojlel lac Yum Dios: “Tsa'ix c loc'sa c diezmo ti cotot yic'ot tsa' cʌq'ueyob jiñi levijob, yic'ot jiñi ñajt bʌ ch'oyolob, yic'ot me'ba' alʌlob, yic'ot me'ba' x'ixicob che' bajche' tsa' su'beyon ti mandar; ma'añic tsa' c ñusʌbeyet a mandar yic'ot ma'añic tsa' ñajʌyi c cha'añ.

¹⁴ Ma'añic tsa' j c'uxu che' woliyon ti uc'taya, mi tsa'ic c jisa che' bi'bi'on, mi tsa'ic cʌq'ue jiñi chʌmeño' bʌ. Tsa' c jac'be i t'añ c Yum Dios yic'ot tsa' c mele che' bajche' tsa' su'beyon.

¹⁵ Q'uele che' añet ya' ti panchan ti ch'ujul bʌ a wajñibal, yic'ot aq'uen i yutslel a pusic'al jiñi a tejclum Israel yic'ot jiñi lum tsa' bʌ a wʌq'ueyon lojon, che' bajche' tsa' wʌn su'be c ñojte'el lojon, ya' ba'añ ca'bʌl leche yic'ot cha'b.”

¹⁶ “Lac Yum Dios woli' su'beñet wʌle cha'añ ts'ʌcʌl yom ma' jac'ben i t'añ yic'ot i mandar; yom wen tsajilet cha'añ ts'ʌcʌl ma' mel ti pejtelel a pusic'al, yic'ot pejtelel a ch'ujlel.”

¹⁷ “Tsa' tsictesa wʌle cha'añ lac Yum jiñʌch a Dios, cha'añ mi caj a cha'len xʌmbal ti' bijlel, cha'añ mi caj a jac'ben i t'añ, pejtelel i mandar yic'ot pejtelel i su'bal tac yic'ot cha'añ mi caj a wen u'biben i t'añ.

¹⁸ Yic'ot wʌle tsa'ix i yʌc'ʌ i t'añ lac Yum cha'añ i bajñel tejclumet, che' bajche' tsi' wʌn su'beyet, cha'añ ma' jac'ben pejtelel i mandar;

¹⁹ cha'añ che' jiñi mi caj i yʌq'uet ti q'uelol ti ñuc ti' tojlel pejtelel tejclum tac tsa' bʌ i mele, cha'añ mi' sujbel a ñuclel yic'ot cha'añ ma' wochel ti ch'ujul bʌ i tejclum lac Yum Dios, che' bajche' tsi' yʌlʌ.”