Deuteronomio 25 - Jiñi Tsiji' bʌ Wen T'añ cha'añ Estudio

¹ Che' ba' ora añ leto ti' tojlel cha'tiquil uxtiquil, mi' tsa' majliyob ti melobʌjʌl cha'añ mi' melob i bʌ ba'añ jiñi juezob, come jiñobʌch año' bʌ ti' wenta cha'añ mi' tsictesañob ti toj jiñi mach bʌ añic i mul, ixcu jiñi am bʌ i mul mux i yʌq'uentel i toj.

² Mi jiñi am bʌ i mul mi wersa yom mi yu'bin asiyal, jiñi cha'añ jiñi juez mux i yʌc' ti ñoltʌl ti lum cha'añ mi' yʌc' ti jajts'el ti asiyal ti' tojlel; che' bajche' c'amel i mul mi caj i jajts'el.

³ Mi' mejlel ti jajts'el ti asiyal cha'c'al ti yajl, pero mach yomic i ñumel; come che' añ i ñumel mi' jajts'el mi caj i yu'bin quisin ti' tojlel i pi'ʌlob.

⁴ Mach a cʌchben i yej tat wacax mu' bʌ i t'uchtʌben loq'uel i wut trigo.

⁵ Mi tsa' chʌmi wiñic, mi ma'añic i yalobil i yijñam tsa' bʌ i cʌyʌ, jiñi me'ba' x'ixic mach mejlic ti ñujpuñijel yic'ot yam bʌ wiñic mach bʌ i cʌñʌyic i ñoxi'al; pero mi caj i tilel i mu' jiñi x'ixic cha'añ mi' pʌy cha'añ i yijñam, cha'añ mi' techben i p'olbal i yeran.

⁶ Jiñi ñaxan bʌ i yalobil mu' bʌ i yʌc' ti pañimil jiñi x'ixic mi caj i yotsʌbentel i c'aba' che' bajche' añ i c'aba' jiñi ñaxan bʌ i ñoxi'al jiñi x'ixic cha'añ ma'añic mi' junyajlel jilel i c'aba' jiñi wiñic ti' tojlel Israel.

⁷ Pero mi mach yomic i pʌyben i yijñam i yeran jiñi wiñic, jiñi i jawʌn mi caj i majlel ba'añ xñoxob cha'añ mi' su'beñob ili t'añ: “Jiñi c mu' mach yomic i pʌyon cha'añ mi' yʌq'ueñon calobil cha'añ mi' chʌn ña'tʌntel i c'aba' c ñoxi'al ti Israel.”

⁸ Jiñi xñoxob ya' ti jiñi tejclum mux i chocob ti pʌyol jiñi wiñic cha'añ mi' pejcañob. Mi tsi' yʌlʌ: “Mach comic c pʌy,”

⁹ jiñi i jawʌn mux i lʌc'tesan i bʌ ya' ba'añ i mu' ti' tojlel jiñi xñoxob. Jiñi x'ixic mi caj i loc'sʌben i warach ti' yoc i mu', mi caj i tujbʌben i wut i mu', mi caj i su'ben: “Che'ʌch mi' mejlel ti' tojlel jiñi wiñic mach bʌ yomic i techben i p'olbal i yeran.”

¹⁰ Mi caj i yotsʌbentel i c'aba' jiñi wiñic ti Israel: “Jiñi xchumtʌl tsa' bʌ jochbenti i xʌñʌb.”

¹¹ Mi woli' contrajiñob i bʌ cha'tiquil wiñicob, mi tsa' tili i yijñam juntiquil, mi tsi' chucbe i wiñiclel jiñi i contra,

¹² wersa yom ma' tsepben i c'ʌb jiñi x'ixic. Mach ma' p'untan.

¹³ Mach yomic cha'p'ejl a p'isoñib ya' ti a mochila, jump'ejl ch'och'oc bʌ yic'ot jump'ejl ñuc bʌ,

¹⁴ mi yomic ti a wotot jump'ejl colem bʌ yic'ot ch'och'oc bʌ p'isoñib.

¹⁵ Yom ts'ʌcʌl yic'ot yom toj la' p'isoñib, cha'añ che' jiñi mi caj i tam-esʌntel la' ja'bilel wʌ' ti jiñi lum woli bʌ i yʌq'ueñetla lac Yum.

¹⁶ Come bi'bi' ti' tojlel lac Yum Dios majqui jach mi' mel che' bajche' jiñi yic'ot majqui jach mach tojic mi' mel.

Mandar cha'añ i jisʌntel amalecob

¹⁷ Ña'tanla chuqui tsi' melbeyetla Amalec ya' ti bij, che' woli la' loq'uel ti Egipto;

¹⁸ che' bʌ tsa' loq'ui i tajetla ya' ti bij, ma'añic tsi' bʌc'ñayob Dios, tsi' laj bʌc'tesayob jiñi c'uño' bʌ soldadojob woli bʌ i tilelob ti la' pat che' lujbetixla yic'ot che' ma'añix la' p'ʌtʌlel.

¹⁹ Jiñi cha'añ, che' mi' yʌq'ueñetla c'aj-o lac Yum Dios ti' tojlel pejtelel la' contrajob am bʌ ti la' joytʌlel ya' ba' mi la' majlel ti chumtʌl mu' bʌ i yʌq'ueñetla lac Yum Dios, yom mi la' junyajlel jisan jiñi amalecob ti pañimil; mach yomic mi' ñajʌyel la' cha'añ.