Deuteronomio 23 - Jiñi Tsiji' bʌ Wen T'añ cha'añ Estudio

Jiñi mach bʌ ch'ʌmbilobic ti' tejclum lac Yum

¹ Mach mejlic ti ochel ba' mi' tempañob i bʌ i tejclum lac Yum jiñi tojmeñix bʌ i bʌc' o tsepbilix bʌ i wiñiclel.

² Mach mejlic ti ochel ba' mi' tempañob i bʌ i tejclum lac Yum jiñi wiñic tsa' bʌ i yila pañimil che' ñujpuñijem juntiquil Israel yic'ot x'ixic mach israelic; mi jiñic i yalobil mi' mejlel ti ochel ba' mi' tempañob i bʌ i tejclum lac Yum c'ʌlʌl ti' lujunlajmlel i p'olbal.

³ Mach mejlic ti ochel jiñi amoñob yic'ot moabitajob ba' mi' tempañob i bʌ i tejclum lac Yum, mi jiñic i p'olbal mi' mejlel ti ochel anquese tsa'ix ñumi lujunlajm i p'olbalob; ma'añic ba' ora mi caj i mejlelob ti ochel ba' mi' tempañob i bʌ i tejclum lac Yum,

⁴ come ma'añic tsi' ch'ʌmbeyetla tilel i bʌl la' ñʌc' ya' ti bij che' bʌ tsa' loq'uiyetla ti Egipto, yic'ot cha'añ ti' caj tsi' su'beyob Balaam i yalobil bʌ Beor, am bʌ ti Petor ya' ti Mesopotamia, cha'añ mi' ch'ʌquetla.

⁵ Pero lac Yum Dios ma'añic tsi' ñʌch'tʌbe i t'añ Balaam; jiñi lac Yum Dios tsi' yʌq'ueyetla i yutslel i pusic'al ti' q'uexol i ch'ʌcojel Balaam, come c'ux mi' yu'biñetla lac Yum Dios.

⁶ Ma'añic mi caj la' wʌq'ueñob i ñʌch'tʌlel i pusic'al, mi muq'uic caj la' sʌclʌbeñob i wenlel ti pejtelel ora che' cuxuletola.

⁷ Mach yomic mi la' ts'a'len jiñi edomob, come la' pi'ʌlobʌch; mach yomic mi la' ts'a'len jiñi egiptojob, come ti yam bʌ ora tsa' chumleyetla ti' lumalob.

⁸ I yuxlajmlel i yalobilob jiñi edomob yic'ot egiptojob mi' mejlelob ti ochel ba' mi' tempañob i bʌ i tejclum lac Yum.

Mandar cha'añ laj c'oc'lel

⁹ Che' mi la' majlel ti guerra ti' tojlel la' contrajob, yom mi la' cʌntan la' bʌ ti pejtelel chuqui tac leco.

¹⁰ Mi añ juntiquil ti la' tojlel mach bʌ sʌquic cha'añ ti' caj tsa' loq'ui i p'ʌtʌlel i wiñiclel che' ti ac'ʌlel, yom mi' loq'uel ya' ba'añetla, mach yomic ya'añ la' wic'ot.

¹¹ Pero che' wolix i bʌjlel majlel q'uiñ, yom mi' cha'len ts'ʌmel; che' bʌjlemix q'uiñ mux i mejlel ti cha' ochel ya' ba'añetla.

¹² Yom añ jump'ejl ajñibʌl ya' ti' junwejlel ba' tempʌbiletla cha'añ ya'i mi la' cha'len ta'.

¹³ Yom añ la' cha'añ ja'el junts'ijt te', cha'añ mi la' c'ʌn la pic jiñi lum ba' mi la' cha'len ta'; che' ujtemetixla ti ta', yom mi la' mujlan ti lum.

¹⁴ Come ya'ʌch añ lac Yum Dios la' wic'ot ya' ba' mi la' tempan la' bʌ, cha'añ mi' coltañetla yic'ot cha'añ mi' yʌq'ueñetla ti la' c'ʌb jiñi la' contrajob; jiñi cha'añ sʌc yom ya' ba' mi la' much'quin la' bʌ, cha'añ ma'añic chuqui bi'bi' mi' q'uel ti la' tojlel, ame i tʌts' i bʌ lac Yum ti la' tojlel.

Mandar tac che' bajche' yom mi' yajñelob wiñicob x'ixicob

¹⁵ Mach yomic ma' pʌy majlel ba'añ i yum juntiquil x'e'tel mu' bʌ i c'otel ti puts'el ti a tojlel.

¹⁶ Mi caj i cha'len chumtʌl ya' ti a tejclum ya' baqui mi' mulan ajñel; mach yomic ma' tic'lan.

¹⁷ Mach yomic ts'i'lel x'ixic ti' tojlel i yalobilob Israel, mi yomic mi' melob che' bajche' tsi' meleyob ya' ti Sodoma jiñi i yalobilob Israel.

¹⁸ Mach yomic ma' ch'ʌm tilel i tojol i ts'i'lel x'ixic mi i tojol i ts'i'lel wiñic ti' yotot lac Yum Dios, mi cha'añic ma' ts'ʌctesan a t'añ tsa' bʌ a wʌc'ʌ, come bi'bi' ti' wut lac Yum Dios majqui jach mi' mel che' bajche' jiñi.

¹⁹ Mach a wersa c'ajtiben i jol taq'uiñ ti' tojlel a pi'ʌl, mi cha'añ i bʌl ñʌc'ʌl, mi yam bʌ añ tac bʌ i c'ʌjñibal yom bʌ mi' tojbentel i jol.

²⁰ Jiñi mach bʌ israelic mi' mejlel a wersa c'ajtiben i jol taq'uiñ, pero jiñi a pi'ʌl ti Israel mach ma' wersa c'ajtiben i jol taq'uiñ, cha'añ che' jiñi mi caj i coltañet lac Yum Dios ti pejtelel mu' bʌ la' mel ti jiñi lum ba' mi caj la' wochel ti chumtʌl.

²¹ Che' ma' wʌc' a t'añ ti' tojlel lac Yum Dios cha'añ chuqui mi caj a mel, yom ma' ts'ʌctesan ti ora, come isujm lac Yum Dios wersa mi caj i c'ajtibeñet, che' jiñi añ a mul mi ma'añic tsa' ts'ʌctesa.

²² Pero mi ma'añic chuqui tsa' wʌlʌ cha'añ chuqui mi caj a mel, ma'añic a mul.

²³ Pero mi tsa' wʌc'ʌ a t'añ, yom chʌn c'ajal a cha'añ yic'ot yom ma' ts'ʌctesan che' bajche' tsa' wʌq'ue a t'añ lac Yum Dios, cha'añ ma' wʌc' jiñi majtañʌl pasem bʌ ti a pusic'al che' bajche' tsa' wʌc'ʌ a t'añ.

²⁴ Che' ma' wochel ti' ts'usubil a pi'ʌl ti chumtʌl, mi' mejlel a mʌc'ben i ts'usub jinto ma' ñaj-añ, pero mach yomic ma' wis tuc' sujtel ti a wotot.

²⁵ Che' ma' wochel a tuc' trigo ya' ti' cha'añ yam bʌ a pi'ʌl, mi' mejlel a tuc' ti a c'ʌb, pero mach mejlic a tsep ti machit.