Deuteronomio 22 - Jiñi Tsiji' bʌ Wen T'añ cha'añ Estudio

¹ Mi tsa' q'uelbe sajtem bʌ i wacax o mi i tʌñʌme' a pi'ʌl, mach yomic che' jach ma' q'uelben; yom ma' chucben majlel jiñi a pi'ʌl.

² Mi mach cʌñʌlic a cha'añ i yum, o mi ñajt to chumul, yom ma' poj otsʌben i yʌlac' ya' ti a jamil. Ya' yom mi' c'ʌlʌl cʌytʌl jinto che' mi' c'otel i sajcan i yum. Che' jiñi mi caj a cha' sutq'uiben.

³ Che'ʌch yom ma' mel ti' tojlel i burro, che' ja'el ti' bujc yic'ot cha'añ pejtelel chuqui tac jach mi' sajtel ti' tojlel a pi'ʌl, mi tsa' taja; yom ma' lotben cha'añ ma' cha' aq'uen i yum.

⁴ Mi tsa' q'uelbe i burro mi i tat wacax a pi'ʌl che' yajlem ya' ti bij, mach che'ic jach yom ma' to'ol ñumel; yom ma' coltañ ti' techol.

⁵ Jiñi x'ixic mach yomic mi' lʌpben i pislel wiñicob, mi jiñic wiñic mach yomic mi' lʌpben i pislel x'ixicob; come ts'a'lebil ti lac Yum Dios majqui jach mi' mel che' bajche' jiñi.

⁶ Che' ma' taj i c'u' xte'lemut ti ti' bij ti' c'ʌb te', o ti lum, mi ya'añ i tuñ o mi i yalix, mi pʌctʌbil to i cha'añ i ña', mach yomic ma' chucben i ña' yic'ot i yal.

⁷ Mi caj a col majlel i ña', cojach i yal mi' mejlel a chuc sujtel cha'añ uts'at chuqui mi' yujtel ti a tojlel yic'ot cha'añ mi' ñajt-añ a ja'bilel.

⁸ Che' ma' mel tsiji' bʌ a wotot, yom ma' joy mʌcben i jol; cha'añ che' jiñi ma'añic mi caj i c'otel ti a wenta mi añ majqui tsa' yajli ya' ti' jol a wotot.

⁹ Ma'añic mi caj a pʌc' a ts'usub yic'ot yam bʌ pʌc'ʌbʌl tac, cha'añ ma'añic mi' junyajlel sajtel ti' pejtelel jiñi pac' tsa' bʌ a pʌc'ʌ yic'ot i wut a ts'usubil.

¹⁰ Mach yomic temel ma' c'ʌn ti top' lum jiñi tat wacax yic'ot burro.

¹¹ Mach yomic ma' lʌp a pislel melbil bʌ ti' tsutsel tʌñʌme' temel yic'ot lino bʌ pisil.

¹² Che' ma' mel a tsuts bujc cha'añ ma' mos a bʌ, yom ma' ts'is jaxbil bʌ puy ya' ti jujump'ejl i xujc.

Mandar tac che' bajche' yom mi' ñochtan i yijñam wiñic

¹³ Che' añ juntiquil mu' bʌ i pʌy i yijñam, mi tsa' caji i jop'ben i mul, che' bʌ tsa'ix i pi'le,

¹⁴ mi tsa' caji i to'ol sajcʌben i mul, mi tsi' yʌlʌ: “Tsa' c pʌyʌ ili x'ixic, che' bʌ tsa' c pi'le, mach chʌn xch'oquix tsa' c taja”,

¹⁵ che' jiñi i tat i ña' jiñi xch'oc mi caj i ch'ʌmbeñob tilel i yejtal i ch'oclel ti' tojlel jiñi xñoxob ya' ti ti' jiñi tejclum.

¹⁶ I tat jiñi xch'oc mi caj i su'beñob jiñi xñoxob: “Joñon tsa' cʌq'ue xch'oc bʌ calobil ili wiñic cha'añ i yijñam, pero wʌle wolix i ts'a'len;

¹⁷ wʌle wolix i to'ol sajcʌben i mul, woli' yʌl: Mach chʌn xch'oquix tsa' c taja a walobil. Pero q'uelbenla i yejtal i ch'oclel jiñi calobil”. Che' jiñi mux i wel tʌsben i pislel jiñi xch'oc bʌ i yalobil ti' tojlel jiñi xñoxob ya' ti tejclum.

¹⁸ Che' jiñi, jiñi xñoxob ya' ti tejclum mi caj i chucob jiñi wiñic cha'añ mi' jats'ob ti asiyal.

¹⁹ Mux i yʌq'ueñob i toj multa jo'c'al (100) sʌsʌc taq'uiñ cha'añ mi caj i yʌq'uentel i tat jiñi xch'oc, come tsa'ix i to'ol ac'ʌ ti ajlel juntiquil xch'oc ti Israel. Jiñi xch'oc mi caj i chʌn cʌytʌl cha'añ i yijñam yic'ot jiñi wiñic mach mejlic i choc loq'uel ti' yotot ti pejtelel ora.

²⁰ Pero mi isujmʌch cha'añ mach xch'oquix tsi' taja,

²¹ che' jiñi mi caj i chucob loq'uel ya' ti ti' yotot i tat, mi caj i julob ti xajlel jiñi wiñicob año' bʌ ti' tejclum jinto mi' chʌmel, come tsi' mele chuqui bi'bi' che' bʌ tsi' cha'le ts'i'lel ti' yotot i tat. Che' jiñi mi caj ti lajmel chuqui leco ti la' tojlel.

²² Mi añ majqui tsa' tajle che' ñolol yic'ot juntiquil x'ixic am bʌ i ñoxi'al, mi caj i laj bʌ chʌmelob, jiñi wiñic tsa' bʌ i pi'le jiñi x'ixic, yic'ot jiñi x'ixic tsa' bʌ pi'lenti. Che' jiñi mi' caj ti lajmel chuqui leco ti' tojlel Israel.

²³ Mi añ juntiquil xch'oc c'ajtibilix bʌ i cha'añ juntiquil wiñic, pero mi añ majqui tsi' taja ya' ti tejclum, mi tsa' ñole yic'ot,

²⁴ mi caj la' chuc loq'uel ti' cha'ticlelob ya' ti ti' jiñi tejclum cha'añ mi la' julob ti xajlel jinto mi' chʌmelob; mi caj i chʌmel jiñi xch'oc cha'añ ti' caj ma'añic tsi' c'ajti i coltʌntel ya' ti tejclum, ixcu jiñi wiñic mi caj i chʌmel cha'añ ti' caj tsi' pi'le jiñi c'ajtibilix bʌ xch'oc. Che' jiñi mi caj i jilel chuqui leco ti la' tojlel.

²⁵ Pero mi añ juntiquil wiñic tsi' taja jiñi c'ajtibilix bʌ xch'oc che' añ ti cholel, mi jiñi wiñic tsa' caji ñolch'in cha'añ mi' pi'len jiñi xch'oc, cojach jiñi wiñic mi caj i chʌmel cha'añ tsi' tic'la jiñi xch'oc,

²⁶ pero jiñi xch'oc ma'añic chuqui mi caj la' tumben; come ma'añic i mul cha'añ mi' chʌmel. Come ili mulil lajalʌch che' bajche' juntiquil mu' bʌ i contrajin i pi'ʌl cha'añ mi' tsʌnsan.

²⁷ Come jiñi wiñic tsi' taja ya' ti cholel, pero jiñi xch'oc c'ajtibilix bʌ tsi' cha'le oñel pero ma'añic majqui tsi' yu'bibe i yoñel cha'añ mi' coltañ.

²⁸ Mi añ juntiquil wiñic tsi' taja juntiquil xch'oc maxto bʌ c'ajtibilic, mi tsi' pi'le yic'ot mi añ majqui tsi' q'uele,

²⁹ jiñi wiñic tsa' bʌ pi'le jiñi xch'oc mi caj i yʌq'ueñ lujump'ejl i yuxc'al (50) sʌsʌc taq'uiñ i tat jiñi xch'oc; pero jiñi wiñic mux i pʌy jiñi xch'oc come tsa'ix i pi'le yic'ot mach mejlic i choc loq'uel ti pejtelel ora che' cuxulob to.

³⁰ Ma'añic majqui yom mi' pʌyben i yijñam i tat, yic'ot mach mejlic ti bi'b-esʌntel i wʌyib i tat.