Deuteronomio 21 - Jiñi Tsiji' bʌ Wen T'añ cha'añ Estudio

Che' mach cʌmbilic majqui tsi' cha'le tsʌnsa

¹ Che' ya'ix chumulet ti jiñi lum mu' bʌ i yʌq'ueñet a Yum Dios, mi tsa' tajle juntiquil xchʌmel ya' ti jamil, che' mach tsiquilic majqui tsi' tsʌnsa,

² jiñi xñoxob yic'ot jiñi juezob a cha'añ mi caj i majlel i q'uelob yic'ot cha'añ mi' p'isob i ñajtlel jiñi tejclum tac am bʌ ti' joytʌlel ba'añ jiñi xchʌmel.

³ Jiñi xñoxob ti jiñi tejclum lʌc'ʌl bʌ añ ba' tsa' tajle jiñi xchʌmel, mi caj i pʌyob tilel juncojt alʌ xch'oc wacax maxto bʌ c'ʌmbilic ti e'tel.

⁴ Jiñi xñoxob ti jiñi tejclum mi caj i pʌyob majlel jiñi xch'oc wacax ti jump'ejl joctʌl bulul bexel bʌ, ba' maxto picbilic jiñi lum yic'ot ba' maxto añic chuqui pʌc'bil, ya'i mi caj i c'ʌsbeñob i bic' jiñi xch'oc wacax.

⁵ Che' jiñi mi caj i c'otelob jiñi motomajob i yalobilo' bʌ Leví, come yajcʌbilobʌch i cha'añ lac Yum Dios cha'añ mi' melbeñob i ye'tel yic'ot cha'añ mi' su'beñob wocolix i yʌlʌ, yic'ot jiñobʌch jiñi mu' bʌ caj yʌlob che' bajche' yom mi' toj-añ pejtelel wocol.

⁶ Ti wi'il pejtelel jiñi xñoxob ya' bʌ añob ti jiñi tejclum lʌc'ʌl bʌ ba' tsa' tajle jiñi xchʌmel, mi caj i pocob i c'ʌb ti' pam jiñi xch'oc wacax tsa' bʌ c'ʌsbenti i bic' ya' ti joctʌl.

⁷ Mi caj i yʌlob ili t'añ: “Ili j c'ʌb lojon ma'añic tsi' beq'ue ch'ich', mi tsa'ic j q'uele lojon.

⁸ C Yum lojon, ñusʌbeñob i mul jiñi israelob mʌmbilo' bʌ a cha'añ. Mach a wʌq'ueñob i toj jiñi ch'ich' mach bʌ añic tsi' beq'ueyob jiñi israelob.” Che'ʌch mi caj i ñusʌbentelob cha'añ jiñi ch'ich' tsa' bʌ bejq'ui,

⁹ che' jiñi mi caj a wʌc' ti ñusʌntel jiñi mulil ti la' tojlel, che' mi la' mel chuqui uts'at ti' wut lac Yum.

Ti' chajp ti' chajp mandar tac

¹⁰ Che' ma' loq'uel majlel ti guerra ya' ba'añ a contra, che' a Yum Dios mi yʌc' ti a c'ʌb jiñi a contrajob yic'ot che' ma' cʌch sujtel lamital,

¹¹ mi tsa' q'uele ti' tojlelob juntiquil i t'ojol bʌ x'ixic, mi tsa' mula, mi tsa' pʌyʌ cha'añ a wijñam,

¹² uts'at ma' pʌy majlel ti a wotot. Jiñi x'ixic mi caj i jujchin i tsutsel i jol yic'ot mi caj i set' i yejc'ach,

¹³ mi caj i joch i pislel lʌpbil bʌ i cha'añ che' bʌ tsa' pʌjyi tilel, mi caj i cʌytʌl ti a wotot cha'añ mi yuc'tan i tat i ña' jump'ejl uw. Ti wi'il mi' mejlel a wajñel a wic'ot; che' jiñi i ñoxi'aletix yic'ot a wijñamix jiñi x'ixic.

¹⁴ Pero mi ti wi'il mach uts'atic tsa' caji a q'uel, mi caj a wʌc' ti majlel baqui jach yom; pero mach yomic ma' chon ti taq'uiñ, mi yomic ma' wotsan ti a mozo, come tsa'ix a pi'le.

¹⁵ Mi añ juntiquil wiñic cha'tiquil bʌ i yijñam, mi c'ux mi' yu'bin juntiquil pero mach c'uxic mi yu'bin jiñi yam bʌ, mi ti' cha'ticlelob añobix i yalobil, pero mi jiñi ñaxan bʌ i yalobil i cha'añʌch jiñi x'ixic mach bʌ c'uxic mi yu'bintel,

¹⁶ ti jiñi q'uiñ che' bʌ jiñi wiñic mi caj t'oxben i yalobilob chuqui añ i cha'añ, mach mejlic i chilben i yʌscunlel jiñi ñaxan bʌ i yalobil jiñi mach bʌ c'uxbibilic bʌ x'ixic cha'añ mi yʌq'ueñ ti' wenta i yalobil jiñi c'uxbibil bʌ x'ixic.

¹⁷ I yalobil jiñi x'ixic mach bʌ añic mi' c'uxbin, wersa mi caj i q'uel che' bajche' ascuñʌl bʌ i yalobil, jiñi cha'añ mi caj i yʌq'ueñ cha'yajl i ñumel che' bajche' jiñi yaño' bʌ, come jiñʌch i tejchibal i p'ʌtʌlel, jiñi cha'añ i cha'añʌch i yʌscunlel.

¹⁸ Mi añ juntiquil am bʌ i yalobil wen jontol bʌ yic'ot xñusa t'añ bʌ, mach bʌ añic mi' jac'ben i t'añ i tat i ña', anquese mi' ju'sʌbentel i pusic'al pero ma'añic mi' jac',

¹⁹ che' jiñi i tat i ña' mi caj i chucob yic'ot mi caj i pʌyob majlel ba'añ jiñi xñoxob año' bʌ ti tejclum, ya' ti ti' jiñi tejclum ba' chumulob,

²⁰ mi caj i su'beñob jiñi xñoxob año' bʌ ti tejclum: “Ili calobil lojon wen jontol jax yic'ot xñusat'añ ti junyajlel. Ma'añic mi' jac'beñon lojon c t'añ; xwo'lel yic'ot xlemoñel.”

²¹ Che' jiñi pejtelel jiñi wiñicob año' bʌ ti ti' tejclum mi caj i julob ti xajlel, mi caj i chʌmel. Che'ʌch mi caj ti jilel chuqui tac leco ti la' tojlel, yic'ot ba' ora mi yu'biñob pejtelel israelob, mi' cajelob ti bʌq'uen.

²² Mi añ majqui tsi' mele ñuc bʌ mulil cha'añ mi' chʌmel, mi tsa' la' joc'choco ti te' cha'añ mi la' tsʌnsan,

²³ mach yomic mi la' cʌyben i bʌc'tal ya' ti te' ti jiñi ac'ʌlel; pero yom mi la' wersa mucben i bʌc'tal ti jiñi jach bʌ q'uiñ, come chocbil ti Dios jiñi mu' bʌ i joc'chocontel ti te'. Che' jiñi ma'añic mi caj i bi'b-añ jiñi lum tsa' bʌ i yʌq'ueyet a Yum Dios, ya' ba' ma' chumtʌl.